1Mana bungina baguba Yuda ina yunga sabangandi kixingindi saing ila wa rangua Hira lipu tela mana long sabangga Adulam.
2Baing Yuda bagu gara haing tela. Ina ba Kenan tela garanoa yanoa Sua. Ina yau hainga baguba saing tang duwa xauna.
3Saing hainga gamona saing hayau gara lup tela binabu Yuda uxu ba Er.
4Kimuya hainga gamona muli saing hayau gara lup tela muli saing ina uxu ba Onan.
5Tauna hainga hayau muli gara lup tela saing uxu ba Sela. Yuda wa mana longga Kesip saing hainga hayau Sela.
6Tauna garadi disok sabanga masup, Yuda xap haing tela na Er. Garang mugamugangama hainga ba yanoa, bing Tema.
7Ne Er kubolunoa bing doa sibuna Urana maxania binabu Urana ung mati.
8Tauna Yuda bala Onan ba, “Ukinu rangua sabangama haininoa. Ina mati lo, saing ina garan te. Hanaunaungua bila li, ung bing oxop sabangama haininoa bu sabangama ina garang bakbak.”
9Ne Onan hauxana ba xap garadi masok bila iniadi te. Binabu bungina kinu rangua haingga ba, ina bagu yunga langinoa matu olang mari titia, binabu bagula xap garadi masok na sabanganoa te.
10Kubolua bagu Onan libu diang sibuna Urana maxania, baing Ina naga Urana ung mati xauna.
11Kimuya Yuda bala longanoa Tema ba, “Ayuam mati lo. Ne bagula ula muli tibum numania bu uwa mua sanga mana garagua Sela, ina tubu sabanga.” Yuda harua bila ba, mana baraxinta, ina hatum ba, “Labu Sela xauna mati bila sabangang luwadi.” Tauna Tema la muli tibuna numania saing wa.
12Bunging maxaxaya sibuna mala tauna Yuda haininoa mati, ina Sua garanoa. Yuda ina sahi bunging usingangam saing ina ila mana longga Timna ba bagu lipudi duxuxuya sipsibindi buxadingdi. Soganoa, Hira mana longga Adulam, ila rangua.
13Baing lipu tela bala Tema ba, “Longam tibum ila Timna ba xuxuya sipsip buxandi.”
14Tema ina xabia ba, Sela tubu masup lo ne ding ditongtongia dingtang yaungadinga teguyu. Binabu ina unia imang usingangama ina sau mana bungina ayuana mati saing ina kaukau raramonoa mana imang kaxukan tela, saing ila rung daxanga sokina ila mana Enaim. Alaba long tela wa mana daxanga ila Timna.
15Yuda haxa ma saing bagu haingga ba baing ina hagaxa ba haing daxangam tela, mana baraxinta haingga baguli xabubua maxandi mana imang kaxukan tela.
16Tauna Yuda ila mana hainga baguli wa daxanga rubinia saing ina bala ba, “Nga murugu ba ngakinu ranguang.” Ne Yuda ina xabia ba, alali ina longanoa te, binabu hainga bala ba, “Saing usina baraxinta nanga muga to?”
17Baing Yuda harua ba, “Nga meme duwau. Bagula ngasina meme haun tela ma naung?” Baing hainga harua ba, “Alaing sangau, ne ung bing usina axamang tela bila mogunga mana haruanga uhau, baing bagula ngasina muli naung bungina usina meme nanga.”
18Tauna Yuda harua ba, “Bagula ngasina baraxinta naung bila mogunga mana haruanga ngahau?” Baing hainga harua ba, “Usina nanga axa baguli mana ta mogunga ma xaung waxuna ba ugoxi waxumtuania. Saing usina yayu haxangamga bagu urai hatata.” Tauna Yuda sina axadi bagudi li na hainga, saing ina kinu rangua saing kimuya hainga gamona.
19Tang dikinu masup saking Tema mesa saing ila, baing unia imang kaxukana kaukau ramramonoa ba saing ina ta muli imang usingangam mana ayuana mati ba.
20Kimuya Yuda sina meme haun tela na Hira saing soxi mala muli ba xap axamandi ina sinadi na hainga. Ne ina bagu haingga ba te.
21Binabu ina xusunga longga baguba moxondi ba, “Kabila haing daxangama bungingbungina rung mana daxanga Enaim?” Baing ding harua ba, “Tegu haing daxangam tela wa mana longga baguli te.”
22Tauna Hira ila muli rangua Yuda saing harua ba, “Nga ngabagu haingga baguba te, saing longga ba moxon daharua ba, ‘Tegu mana haing daxangam tela wa mana longga ba.’ ”
23Tauna Yuda harua ba, “Heku uyunga ina tuxu axadi ba. Labu usai mana haingga bau tai. Doa mana haing lup dimasisia kira. Nga ngasu mana haruanga ngahau, saing nga ngasina meme hauna ba mala na. Ne ung gubagu te.”
24Bila sobak tuwa disup, baing dila dibala Yuda ba, “Ung longama Tema haxa daxangia saing hatata ina gamona.” Baing Yuda ina harua haringina ba, “Axap mala bu arama yabia bu bagula ina mati!”
25Ne bungina daxap mala, Tema ina xap axadi Yuda ina sinadi na, saing sinadi mala rangua xaung haruanga baguli: “Nga gamogu mana axadi bagudi li tibuding. Ubagu xai axadi bagudi li, axamana mana ta mogunga xaung waxuna saing yayu haxangam. Ung hatum ba axadi bagudi li gaxarea iniadi?”
26Yuda ina bagu xabia axadi bagudi li saing ina harua ba, “Nga balau nga ngalibu mauxanganoa saing hainga baguli tegu. Ina bagula yau Sela nga garagua. Ne nga ngatongtongia tang yaungadinga teguyu.” Baing Yuda kinu muli rangua te.
27Bungina Tema bo ba hayau garua, ding disok mana ba gara luwa duwa gamonia.
28Mana bungina hayau, tela rimanoa sok muga binabu hainga hauli Tema mana hayau. Ina xap waxu sabuxan tela saing goxi mana gara ba rimanoa. Saing ina harua ba, “Gara baguli ina sok muga.”
29Ne gara ba xai ramanoa maxu muli saing kixinginoa ina sok muga. Tauna hainga baguli harua, “Baruta sibuna? Ung gutu saha maxixingua saing usok muga bo?” Baing ina naga ding duxu yanoa ba Peres.
30Kimuya sabanganoa waxu sabuxanoa wa mana rimanoa ina sok saing ding duxu yanoa mana Sera.
