1Yambong baing Urana uleginam luwadi ba tang disok mana long sabangga Sodam. Baing Lot rung mua gugunianga yabania haxek mana long sabangga ba xaluxinia. Bagudi, baing mesa mala ranguadi, saing gung king tuxundi titia saing turu mari.
2Harua ba, “Lipu sabanga luwa mana, nga lipuxim oxatama. Xai mana tang gama numagia. Tang gadamia kimdi saing akinu. Buragin to ala ba.” Baing tang dahaxuya ba, “Tegu. Amtam bagula tam gakinu la li gugunianga yabania li.”
3Ne Lot haxi dingtang buk, binabu tang dila rangua numania. Tau na dingtang, tau salanga salalangang teguam, saing tang daxang.
4Tang dikinu teguyu, baing lipu Sodamgam longgalo, gananundi digabu lipu haringindi, dima dilip numua.
5Duwagi Lot ba, “Lipuadi bunggu dima ranguaung duwa bi? Oxopdi masok ma bu am gakinu ranguadi.”
6Lot sok mala sabasabia ranguadi saing riba xalua.
7Xusungadi haringina ba, “Riagu mana, alungu to. Labu alibu kubolu diana bau tai.
8Abagu, nga nanuhangigu luwa, ne tang dikinu rangua lup tela teguyu. Bagula ngaxap dingtang ma ranguang bu asahi murungaima mana dingtang. Ne lipu luwadi li, labu alibu axamang tela mana dingtanggu tai, namua na duwa numagia maluxuʼm wasangagua.”
9Dahaxuya ba, “Uhaya! Yabama la li te, binabu maring ba ubiliamgu tai! Kubolua am galibu maung bagula doa sibuna mana kubolua am galibu mana dingtang!” Baing dahayuyu mala rangua Lot ba dutu saha xalua.
10Ne lipu luwa tang duwa numa lunia dita rimadingdi masok dituxu Lot saing daxai maluxu, saing diriba xalua.
11Sup, baing tang dilibu lipuadi ba maxading dahaxatu, gananundi digabu lipu haringindi. Binabu sanga dibagu xalua te.
12Baing tang duxusunga Lot ba, “Ung bakbagim tela duwa la liu? Longamdi? Garamdi? Kimbo ungia tela duwa mana long sabangga li? Oxopdi masok sangua longga li,
13namua na bagula tam gahanggalangia long sabangga li. Toxoratamona lungu harungianga xumana buk mana longga li, binabu soxi amtam ba am gahanggalangia.”
14Binabu Lot ila rangua lipu luwadi dimogudi ba diyau nanuhangindi, saing baladi ba, “Tang gamesa bu asauya long sabangga li sap, namua na Toxoratamona bo ba hanggalangiauba.” Ne tang dahagaxa ba harua halinga na dingtang.
15Namoningguba, baing Urana uleginam luwadi dahaxi Lot ba, “Umesa sap! Oxop hainima xaung nanuhangim luwadi duwa la li. Nabu tegu, bing bagula asup bungina lipuadi li daxap doa.”
16Ne Lot halisi, ila sap te. Binabu lipu luwadi ba tang dituxu rimania xaung hainina xaung nanuhangindi rimadingdi saing daxaidi masok sangua long sabangga ba, duwa xai. Namua na Toxoratamona usingadi.
17Tang daxaidi masok laing sup, baing hata sibuna li tela harua ba, “Aluki mala sap nam amati! Labu axugia saing abagu mala muliu tai. Xaung labu ayagua monga mana long gomania bau tai! Aluki mala sap bimbia nam amati!”
18Ne Lot harua nadi ba, “Lipu sabanga luwa mana, tegu! Labu atabina nga ngalibu bila bau tai!
19Ulungu to. Usingangam xaung haulingam manga bing xai sibuna xaung oxop nga muli. Ne sanga ba ngaluki mala bimbia te, nam hanggalangiangua xap nga bu ngamati.
20Ubagu, long tela wa hataina lo. Haxek sanga mana ngaluki mala mana. Long kaxukana ba. Unai nga bu ngaluki mala mana bu ngadali salaga.”
21Baing harua na ba, “Sangau. Bagula nganai xusungangama. Baulga ngahanggalangia long kaxukana ba te.
22Ne ula la ba sap, namua na sanga ba ngalibu axamang tela sap te, laing usok mana longga ba to.” (Numua naga duxu longga ba Soa.)
23Lot sok mana longga Soa maringina mana xaidaba haing.
24Baing hata sibuna li Toxoratamona libu siang salpa buyamang yabinamdi diri mana long sabangga Sodam xaung Gomora.
25Baing ina naga, hanggalangia long sabangga luwadi ba xaung lipu longga duwa mana long luwadi ba xauna. Hanggalangia long gomana ba masup, xaung axamang longgalo duwa mana ba.
26Ne Lot haininoa xugia saing bagu muli mala kimuya, baing xugia sok bila mosak gigina.
27Buragina buraraging sibuna baing Ebraham mesa saing goxoya mala muli mana longga muga li Toxoratamona maxania.
28Bagu mari gomia Sodam xaung Gomora xaung mana goma longgalo, saing bagu yap bunuxuyanoa buxuixui mahaing mana titia ba, bila yap sabangua tau raxang tela.
29Baing ina naga, bungina Urana hanggalangia long sabanga gomana luwadi ba, hatumia muli Ebraham, saing xap Lot sangua hanggaliangua xap long sabanggadi Lot wa manadi ba.
30Lot gabu nanuhanging luwa disauya longga Soa saing duwa bimbia, namua na maxuwa ba wa Soa. Gabu nanuhanging luwa duwa guhia.
31Xaidap tela nanuhanging sabangua harua na kixinginoa ba, “Tibura wa duanga ba, saing la li lipu te ba kinu rangua kitam, bila lipu titiamdi dilibu.
32Tauna, talibu tibura nung wain bu kakahana. Baing sanga ba takinu rangua bu bakbagira bagula disup te.”
33Yambongga baguba baing tang dilibu tibuding nung wain haringing sibuna, saing nanuhanging sabangua luxu rangua saing kinu rangua. Ne ina xabia te bungina nanuhanginoa luxu ma kimbo bungina sok mala.
34Buragina baing nanuhanging sabangua harua na kixinginoa ba, “Bunggu ngakinu rangua tibugu. Yambong bagula talibu nung wain bu kakahana muli. Baing uluxu mala ukinu rangua bu xap gararadi masok bu bakbagira bagula disup te.
35Binabu yambongga baguba dilibu tibuding nung wain muli, saing nanuhanging nanunoa luxu rangua saing kinu rangua. Ne ina xabia te muli bungina nanuhanginoa kinu kimbo bungina mesa.
36Baing ina naga, Lot nanuhanging luwadi tang gamoding mana tibuding.
37Sabanganoa garang luba, saing uxu yanoa ba Moap. Lipudi hatata tauxudi Moapdi, ding mugangadinga naga.
38Kixinginoa xauna garang luba, saing uxu yanoa Ben-Ammi. Lipudi hatata tauxudi Amondi, ding mugangadinga naga.
