1Mugamugau sibuna, Urana tongtongia sabaluna xaung titi.
2Ne titi babung te, long olang. Labiana kaukau lang suang sabanga, saing Urana Aningonoa tangaxa etuaʼm langa.
3Baing Urana harua ba, “Lulianoa sok,” baing luliana sok.
4Baing Urana bagu luliana saing yaha mana baing hata luliana xaung labiana.
5Urana uxu luliana ba, “xaidap,” ne uxu labiana ba, “yambong.” Tauna, yambonga ila sup, buraragina sok—xaidap taininauba.
6Baing Urana harua ba, “Ganangana sok lia mana hata langdi.” Baing ganangana sok. Urana hata langdi mana hataing luwa, hataing etuaʼm xaung hataing hawam. Baing sok bila ba.
8Urana uxu ganangana ba, “sabaluna.” Tauna, yambonga ila sup, buraragina sok—xaidap luwauba.
9Baing Urana harua ba, “Lang hawamdi digugunia mana long taininau sanga mana long mamasana sok.” Baing sok bila ba.
10Urana uxu long mamasana ba, “titi,” saing uxu lang guguniangama ba, “tek.” Baing Urana bagu saing yaha mana.
11Baing Urana harua ba, “Titia libu axamang xangxana disok: anginga xaung xuyadingdi, xaung xaidi xaung maradingdi, taining tainina disu mana xadingdi.” Baing sok bila ba.
12Titia libu axamang xangxana disok: anginga xaung xuyadingdi, xaung xaidi maradingdi, taining tainina disu mana xadingdi. Baing Urana bagu saing yaha mana.
13Tauna, yambonga ila sup, buraragina sok—xaidap tuwauba.
14Baing Urana harua ba, “Luliandi disok sabalunia sanga mana dahata xaidap xaung yambong, saing duwa mana dimogu nianigesakdi xaung xaidapdi xaung nianidi,
15saing luliandi disok sabalunia bu disina saxaxangana titia.” Baing sok bila ba.
16Baing Urana tongtongia luliang sabanga luwa, luliang sapsambagiak wasa mana xaidaba xaung luliang kaxukana wasa mana yambonga. Tongtongia hatungdi xauna.
17Baing Urana tadi sabalunia mana disina saxaxangana titia,
18duwasa mana xaidaba xaung yambonga, saing dahata luliana xaung labiana. Baing Urana bagu saing yaha mana.
19Tauna, yambonga ila sup, buraragina sok—xaidap luwadi luwadiuba.
20Baing Urana harua ba, “Tega baxagi mana asaxa xangxana xumang sibuna walingamdi saing mang disok sanga mana doti etua titia makisi sabalunia.”
21Binabu Urana tongtongia asaxa sabanga tekkamdi xaung axamang tekkam teladi diyum mauli tegia, disu mana baudingdi, xaung mang xangxandi, disu mana baudingdi. Baing Urana bagu saing yaha mana.
22Baing Urana sina guxama nadi, harua ba, “Ahayau xumana bu abaxagi maluxu tegia, saing mangdi xuana ahayau xumana titia.”
23Tauna, yambonga ila sup, buraragina sok—xaidap luwadi luwadi hiliadingauba.
24Baing Urana harua ba, “Asaxa xangxana disok titia, disu mana baudingdi: nangnangdi, asaxa dahaxa mua titia, xaung abungindi, disu mana baudingdi.” Baing sok bila ba.
25Baing Urana tongtongia asaxa abunginadi disu mana baudingdi, xaung asaxa dahaxa mua titia, disu mana baudingdi. Baing Urana bagu saing yaha mana.
26Baing Urana harua ba, “Tatongtongia lipudi disok bila kira sibura li. Baing duwa etua mana song tekkamdi xaung mang sabalunamdi, etua mana asaxa nangnangdi xaung axamang longgalo dahaxa mua titia.”
27Binabu Urana tongtongia lipudi disok bila ing sibuna; maxuna, tongtongiadi disok bila ina; tongtongiadi lup haing.
28Baing Urana sina guxama nadi, harua ba, “Ala ahayau xumana, abaxagi mana titia. Awa etua mana axamandi duwa titia. Awa etua mana song tekkamdi xaung mang sabalunamdi xaung asaxa longgalo dahaxa mua titia.”
29Baing Urana harua ba, “Abagu, ngasina anginga xuyanam longgalo duwa titia nang xaung xai maranam longgalo nang. Bagula duwa angiaimdi.
30Baing ngasina xailong gamatang longgalo xaung xauyanga longgalo duwa anginga na asaxa abunging longgalo, xaung mang longgalo xaung asaxa longgalo dahaxa mua titia.” Baing sok bila ba.
31Urana bagu axamang longgalo tongtongiadi, saing yaha sibuna manadi. Tauna, yambonga ila sup, buraragina sok—xaidap tuwa tuwauba.
