1Ne Urana hatum muli mana Noa xaung asaxa abungindi nangnangdi duwa rangua wagia. Baing libu yanga yubua titia, saing langa xaya.
2Lang maxandi xaung xalu longga sabalunia diriba ding, saing kuyua moti.
3Binabu langa xaya xaya mari. Xaidap 150 disup, baing langa xaya mari,
4saing mana xaidap 17 mana sobak 7 wagua taga mana bimbi tela mana titia Ararat.
5Langga xaya xayauyu laing sobak 10. Baing mana xaidap mugamugangama mana sobak 10 bimbi disok sabasabia.
6Xaidap 40 muli disup, baing Noa xaxa suanga tongtongia wagia,
7saing soxi okok tela mala. Ila ma laing langa mamasa titia.
8Baing soxi baxaliku mala bu bagu nabu langa mamasa titia.
9Ne baxaliku bagu long tela ba yagua te, namua na langa baxagi mana long longgalo. Binabu goxoya ma muli rangua wagia. Ta rimanoa masok saing xap baxaliku muli maluxu wagia rangua.
10Ragu xaidap 7 muli, baing soxi baxaliku mala muli.
11Bungbung sibuna bungina baxaliku goxoya ma muli, taranga xaiya olip long haun tela suxungunia. Baing ina naga, Noa xabia ba langa maxa ba.
12Ragu xaidap 7 muli, baing soxi baxaliku mala muli, ne bungina ila, goxoya ma rangua te.
13Noa nianindi 601, baing mana xaidap mugamugangama mana sobak mugamugangama mana niani baguba, langa mamasa titia. Baing Noa xaxa uronga hataing tela saing bagu titia mamasa ba.
14Xaidap 27 mana sobak luwa titia mamasa masup.
15Baing Urana harua na Noa ba,
16“Uri ma sangua wagua, ung gabu hainima xaung garamdi digabu hainidingdi.
17Oxop asaxa walingam longgalo duwa ranguaung mari—mangdi, asaxa nangnangdi abungindi. Oxopdi mari bu dahayau xumana, dibaxagi titia.”
18Binabu Noa ri ma, gabu garandi xaung haininoa xaung dingtung hainidingdi.
19Baing asaxa abunging nangnang longgalo xaung mang longgalo, axamang longgalo dahaxa titia, ding longgalo diri ma sangua wagua, dahaxa bakbak mari.
20Baing Noa tongtongia kabukabu tela ba hanania na Toxoratamona. Baing xap asaxa sigixingang teladi xaung mang sigixingang teladi, saing taudi ba hanania na Toxoratamona.
21Baing Toxoratamona yuyu samisami xai sibuna ba, saing harua na ing sibuna ba, “Labu ngahanggalangia titia muli bu haxuya lipudi kuboluding diandiu tai. Heku hatumingading longgalo dibaxagi mana kubolu diandi mana bungina duwa garauyu. Xauna, labu ngahanggalangia axamang walingamdi muliu tai, bila ngalibu muga ba.
22“Mana bungina titia wauyu, bunging umangama xaung bunging xauyangama bagula duwa, bunging xaringana xaung bunging salianoa bagula duwa, bunging xaidapkam xaung bunging kuyam bagula duwa. yambong xaung xaidap sanga disup te.”
