1Niani luwa disup baing xaitamoxi Isipkama mip. Ina mip ba ina li haxek mana Langga Nail.
2Baing bagu bulmakau 7 tutubing xai sibundi disauya langga saing dahaing ma, daxang tatubang mali lang rubinia.
3Tauna, kimuya bagu bulmakau 7 disauya langga saing dahaing ma muli. Tuatuading saing diang sibundi. Dima dili rangua bulmakau bakbak teladi lang rubinia.
4Baing bulmakau tuatuandi ba daxang bulmakau 7 xaiyadi ba saing dingarudi masup. Xaitamoxi bagu mibinga baguli laing sup, baing mesa.
5Kimuya kinu baing mip muli. Mana mibinga luwa ina bagu resi toxong 7 disok mana resi tuang taininau. Resi tuang toxonadi ba sabanga sibundi, saing aningoding xumang sibuna. Saing daxauxau ba daxaudi.
6Baing kimuya resi toxong teladi disok. Xaidap salianoa taudi saing aningodingdi kaxukang sibundi.
7Tauna resi toxong kaxukanadi ba ditatua resi xai 7 aningoding xumana ba. Tauna, xaitamoxi mesa saing xabia ba ina mip.
8Baing buraraging sibuna mesa saing hatum xumang sibuna. Baing wagi Isip lipu xabiangamdi xaung lipuadi dibagu axamandi duwa hisangia. Ina baxanga mibinganoa nadi, ne lipu tela sanga mana ba baxanga mibinga luwadi ba namuxidinga te.
9Tauna, kimuya lipua wasa mana wain mana xaitamoxi bala xaitamoxi ba, “Hatata bagula ngabaxanga mauxangan tela ngalibu.
10Waleu ugamiam am lipuxim oxatamdi, saing usoxi nga xaung lipua wasa mana salanga numanoa, saing utam salagia maluxu mana lipu haungingamdi yanamidinga numanoa. Lipua wasa mana numa.
11Mana yambong tela ngamip, ne ina xauna mip. Ne tam mibingamamdi namuxiding.
12Ne gananung tela mana bakbakka Hibru wa ranguamtam. Ina lipu oxata olanggam mana lipu haungingamdi yanamidinga gaxarea wasa mana numua. Baing tam gabaxanga mibingamamdi na. Tauna ina baxanga mibingamamdi namuxidingdi namtam.
13Baing axamandi disok maxung sibuna bila ina harua ba. Ngaxap muli oxatagua ne dingelia lipua wasa mana salanga numanoa.”
14Xaitamoxi Isipkama ma lungu haruanga baguba, baing bala lipu oxatamdi ba dila daxap Yosep ma. Baing hata sibuna li dila salak numania saing daxap. Yosep gasi tambung saing xuyaxuya imangindi. Baing daxap mala rangua xaitamoxi.
15Tauna, xaitamoxi bala Yosep ba, “Ngamip, ne lipu tela te ba baxanga mibinga li namuxinoa. Ne lipu daharua ba, ‘Nabu ulungu mibinga li, ung sanga mana ubaxanga namuxinoa.’ ”
16Ne Yosep haxuya ba, “Nga sibugu bing tegu. Ne Urana ina sanga mana baxanga mibingama namuxinoa maringina naung bu uyaha sibuna ba ulungu.”
17Baing xaitamoxi harua ba, “Ngamip bila ngali Langga Nail rubinia.
18Baing ngabagu bulmakau 7 tutubing xai sibundi diyunga langa saing dahaing ma. Baing dungguti daxang tatubang lang rubinia.
19Kimuya bulmakau 7 xan teladi dahaing ma, tuatuading saing doyang sibundi. Nga ngabagu bulmakau doyana na bila maluxu mana Isip te.
20Baing bulmakau tuatuandi ba daxang bulmakau xaiyadi ba, saing dingarudi masup.
21Daxang baing ne bila daxang teguyu. Tegu. Didoa sibuna bila waleu. Baing kimuya ngamesa.
22“Kimuya ngakinu baing ngamip muli. Ngabagu resi toxong 7 disok mana resi tuwang taininau. Sabanga sibundi, saing aningoding xumang sibuna, saing daxauxau ba daxaudi.
23Baing kimuya resi tuang 7 disok, xaidap salianoa saladi saing dahabati, baing aningodingdi kaxukang sibundi.
24Tauna, resi toxong kaxukang sibundi ba ditatua resi toxong 7 adi aningoding xumang sibuna ba. Baing bungina ngamesa ngawagi lipuadi daxabia axamandi duwa hisangia bu ngabaladi mana mibingagudi. Ning lipu tela sanga mana baxanga mibinga luwadi ngabagudi li namuxidinga.”
25Baing Yosep bala xaitamoxi ba, “Mibingam luwadi namuxidinga maxang taininau. Urana hatanga naung axamanoa bo ba libu.
26Bulmakau tutubing xaidi ba mogu niani 7, ne resi toxong 7 xaiyadi ba mogu niani 7. Dimogu axamang taininau.
27Bulmakau 7 toatuandi xaung resi aningong teguamdi dimogu niani 7 gesak sabangua bagula sok.
28“Bila ngabalaung baing Urana hatanga naung axamanoa bo ba libu.
29Mana niani 7 bagula anginga xumang sibuna maluxuʼm Isip.
30Niani 7 muli bagula gesak sabangua sok. Baing lipuadi Isip bagula dahatum muli mana niani xaidi ba. Bagula gesak sabangua hanggalangia titia baguba.
31Baing hainglipudi bagula dahalingalinga sibuna nianiadi angiading xumana ba. Namua na gesakka sok kimu bagula doyang sibuna.
32Urana sina mibinga luwadi li naung bing namuxiding taininau. Namua na hatum ba libu axamanoa sok. Xaung hatanga naung ba maxaya te axamanoa bagula sok.
33“Tauna hatata umogu lipu hatuminga xaiyam xaung xabiangam bu wasa mana oxata longga maluxuʼm titia Isip.
34Xaung umogu yanam teladi xauna ba duwasa mana titia li mana niani 7 bungina anginga xumana. Yanamdi bagula dituxu sinak mana angingadi lipudi umangadingia mana hataina 5. Bu gabman xap hataing tela bila takis.
35Yanamdi bagula digugunia angingadi daxapdi mana niani xaiyadi ba. Duwaxata hawa maung bu digugunia residi bu ditadi maluxu numa angingamia maluxu mana long sabanggadi.
36Bungina niani 7 gesakkamdi disok Isip, hainglupdi bagula daxap anginga yanam diguguniadi matabu ba. Binabu hainglupdi sanga dimati mana gesakka te.”
37Xaitamoxi Isipkama xaung lipuxing oxatamdi dilungu Yosep haruanganoa saing dinai mana.
38Baing xaitamoxi bala lipuxing oxatamdi ba, “Urana Aningonoa wa mana lipua li. Lipu tela te ba tamogu bu libu oxata li.”
39Tauna xaitamoxi bala Yosep ba, “Urana hatanga naung axamandi, binabu lipu tela hatumingang xai xaung xabiangang xai bila ung te.
40Bagula ngamogung bu usok gabman mana titigua xaung haing lup ngayuadi. Bagula dilungu haruangama. Nga xaitamoxi yagua ing ganina bagula wa etua maung.”
41Tauna, xaitamoxi bala Yosep ba, “Ulungu to. Hatata ngamogung ba uwa gabman mana titi hataing longga maluxu Isip.”
42Baing xaitamoxi sau raxunoa mari saing sau mana Yosep. Raxua ba xaitamoxi mogunganoa wa mana. Xaung xaitamoxi yauyau Yosep mana imanging gumanging sibuna. Saing hing gimunggimung gol tela mana.
43Baing yunga Yosep haxa mauli mana xaitamoxi karis inia tela. Lipuxing oxatamdi dimuga saing duwagi ba, “Xaiyam daxangua!” Mana kubolu naga xaitamoxi mogu Yosep sok gabman mana titi hataing longga maluxu Isip.
44Baing xaitamoxi bala Yosep ba, “Nga xaitamoxi ngaharua. Lipu tela Isip sanga libu axamang tela murungania te. Tegu. Bagula xusungaung muga to.”
45Baing xaitamoxi sina yaya Sapenatpanea na Yosep xaung sina haing tela na Yosep. Haingga ba yanoa Asenat, Patipera garanoa. Ina lipu hananiangam mana long sabangga Heliopolis. Baing Yosep haxa mauli saing bagu titi hataina longga maluxu Isip.
46Yosep nianindi 30 mana bungina ungguti oxatua mana xaitamoxi Isipkama. Baing Yosep sauya xaitamoxi saing haxa mauli mana titi hataing longga maluxu Isip.
47Mana niani xai 7 anginga xumang sibuna disok Isip.
48Baing mana nianidi bagudi ba Yosep gung anginga xumang sibuna. Ina gung anginga umangamdi maluxu mana long sabanga taining tainina numading angingamdi.
49Resiadi Yosep gungdi numa angingamia ba xumang sibuna bila ulangulangdi saing Yosep sanga ba suxuyadi.
50Niani gesakkamdi disok teguyu, baing Asenat Yosep haininoa hayau gara lup luwa. Asenat Potipera garanoa. Lipu hananiangam mana long sabangga Heliopolis.
51Baing Yosep harua ba, “Urana hauli nga, baing ngahalingalinga riagudi xaung tibugu sibindi.” Binabu uxu garang matuaua yanoa ba, Manase.
52Harua xauna ba, “Urana sina garua nanga mana longga ngasok mana mauxanganoa mana ba.” Binabu uxu garang nanunoa ba Epraim.
53Bungina niani xaidi disup.
54Baing niani gesakkamdi disok bila Yosep harua ba. Gesak sabangua sok mana titi teladi xauna. Ne maluxu Isip bing anginga xumang sibuna.
55Kimuya bungina gesaga sok mana titi hataing longga maluxu Isip. Haing lipudi ditang rangua xaitamoxi ba uliadi anginga. Baing xaitamoxi baladi ba, “Ala abagu Yosep bu alibu bila harua.”
56Baing bungina gesaga sok mana titi hataing longga maluxu Isip, baing Yosep xaxa anginga numandi saing hainglipudi digim anginga namua na gesaga sok doa sibuna mana titi longgalo.
