1Ebraham wa duanga saing Urana libu axamandi disok xai sibuna.
2Baing Ebraham wagi lipuxing oxatama wasa mana xalingindi bunging xumana, ma saing bala ba, “Uta rimama hawa bu uharingia haruanga haringina manga.
3Ung guharua haringina mana Urana yanoa, Urana sabaluniam xaung titiam, binabu ung sanga umogu haing tela na garagua liwe mana Kenan haingdi, mana titia ngawa mana li.
4Ung sanga ula titigia bu usok mana haing tela mala mana nga bakbagigua bu oxop mana Aisak bu yau.”
5Ne lipuxing oxatamga harua ba, “Nabu hainga hauxana ba yunga yabanoa, bing tabaru? Bila ba bing ngaxap garama mala ung titimia?”
6Baing Ebraham haxuya ba, “Labu oxop garagua mala muli titigiau tai.
7Urana sabalunam, ina xap nga tibugua numania xaung bakbagigudi titidingia. Saing harua haringina, ba yunga titia baguli na bakbagigua. Urana bagula soxi uleginama muga naung mala titigia bu ung sanga oxop garagua haininoa.
8Nabu hainga sanga ma ranguaung te, bing haruanga haringina la ulibu manga labu ribaunggu tai. Ne labu oxop garagua mala muli titigiau tai.”
9Baing lipuxing oxatama ta rimanoa hawa mana kindi, Ebraham baing harungia haruanga haringina ba libu axamang longga Ebraham harungiadi ba.
10Baing lipuxing oxatama xap kameldi 10 xaung presendi. Baing xap xalaxaladi saing ila mana Naho tauninoa mana titia Mesopotemia.
11Ila sok baing libu kameldi dikinu haxek rangua lang banggumgam taun rubinia. Bungbung baing, haingdi dima ba duxu lang.
12Baing sabu bila li, “Urana ung sabanga mana lipuxigu sabanga mana Ebraham, ung sanga ulibu kubolu mana lipuxigu haringina, bu oxatagua sok xai ba.
13Ngawa haxek lang bangumgamia bu haing nanung numamdi dima ba duxu lang.
14Binabu ngabala haing nanung tela ba, ‘Ung sanga utatua borima bu ngagung lang?’ Nabu harua ba, ‘Unung, nga bagula ngasina langa na kamelimdi,’ bing ina naga hainga umogu na lipuxim oxatamga Aisak. Nabu axamandi disok bila li, bing ngaxabia ba ina naga, uhauli lipuxigu sabanga.”
15Lipu oxatama sabu muauyu, baing Rebeka sok. Xori bori langgam yaxunia. Rebeka, Betuel nahanginoa. Ne Betuel, Milka Naho tang garading luba. Naho Ebraham sabanganoa.
16Haing nanuna Rebeka haing xai sibuna, kinu rangua lupdi teguyu. Baing ri banggumia saing xu lang saing haing muli ma.
17Baing lipu oxatama luki mala rangua saing sung lang.
18Baing Rebeka harua ba, “Yanam unung.” Hata sibuna li tatua boria mari saing tuxu rimania saing yunga na nung.
19Nung masup baing Rebeka harua ba, “Nga sanga ngaulia kamelimdi xauna bu dinung sanga dibaxagi.”
20Baing hata sibuna li matuxuya langa mana siang gubiningana asaxa dinung mana ba, libu bila ba laing ding longga dinung sanga.
21Ne lipu oxatama harua te, ina bagu ing ganina. Bo ba xabia Urana libu oxatanoa sok xai, kimbo tegu.
22Kamel dinung lang masup, haing libu oxatama xap ring gol luwa Rebeka rimania. Mauxading bila 5 gram. Ne raxu taining tainina mauxanganoa bila 100 gram.
23Baing lipu oxatama harua ba, “Sanga ubala nga. Ung gaxarea nanuhanginoa, uhatumia sanga ganangana ba ngakinu ranguang yambong.”
24Baing Rebeka haxuya ba, “Nga Betuel garanoa, ina Naho Milka tang garadinga.
25Tauna tatubang xai sibundi ba kamel daxangdi xaung numia sanga numa luna ba akinu mana.”
26Baing Ebraham lipuxing oxatama gung king tuxundi turu saing sabu na Urana.
27Baing harua ba, “Ngabo ngaiti Urana yanoa, sabangua mana lipuxigu sabanga Ebraham. Ina libu xai sibuna mana. Urana xap nga ma maringing sibuna rangua lipuxigu sabanga bakbagindi.”
28Baing Rebeka luki mala numia saing bala bauna mana baraxinta sok.
29Baing Leban Rebeka sabanganoa, bagu ring xaung raxudi Rebeka yungxania xaung rimania, saing lungu naxuyanga rangua Rebeka. Baing luki mala sok mana li mua lang banggumgamia.
31Ne Leban harua ba, “Yanam, Urana libu xai maung baing. Uma tala numia. Labu uwa la liu tai. Ngatongtongia yabama baing xaung kamelimdi yabadinga.”
32Baing lipu oxatama luxu numia. Ne Leban bala lipuxing oxatamdi ba dunia axamandi mana kameldi bu disina tatubang xaung anginga nadi. Baladi xauna ba daxap lang ma bu didamia kidingdi.
33Ne kimuya daxap angingadi ma, ne Ebraham lipuxing oxatama harua ba, “Nga sanga ngaxang sap te. Ngabaxanga haruangagudi to.” Baing Leban bo ba, “Sangau ubaxanga nadi to.”
34Baing harua ba, “Nga Ebraham lipuxing oxatama.
35Urana libu xai sibuna mana lipuxigu sabanga saing baxagi mana xaxalaladi. Urana sina axamang xumana na bila sipsip meme, bulmakau, silba, gol xaung lipu oxatam haing oxata olanggamdi xaung kamel xaung donki.
36Ne haininoa Sara wa xanronggi saing hayau gara lup tela. Saing lipuxigu sabanga sina xaxalala longga ba na gara baguba.
37Saing harua haringina nanga ba, ‘Labu umogu haing tela Kenan na garaguau tai, mana titia ngawa manadi Tegu. Ung bagula ula mana nga tibugu bakbagindi bu usok mana haing tela bu yau garagua.’ Lipuxigu sabanga harua bila li. Libu nganaxu mana haruanganoa.
39“Ne ngabala lipuxigu sabanga ba, ‘Nabu hainga ma rangua nga te, bing tabaru?’
40“Baing harua ba, ‘Nga lipua nganaxu mana Urana xuanoa Urana bagula soxi uleginam tela bagula ma ranguaung bu libu oxatama sok xai. Binabu ung sanga oxop garagua haininoa maluxu mana tibugu bakbaginoa.
41Nabu ula ranguadi, bing haruanga ulibu manga sanga ribaung te. Ne ula rangua nga bakbagigudi bu uxusunga na tegu bing alali ribaunggu tai.’
42“Baing bungbung, ngasok lang banggumgamia ngasabu bila li, ‘Urana sabanga mana lipuxigu sabanga Ebraham, hatata libu oxatagua sok xai banggumgamia.
43Bagu hatata ngawa haxek lang banggumgamia. Nabu haing nanung tela ma bu xu lang, bing ngabala ba, “Ung sanga ulia nga lang borimia bu nganung?”
44Nabu harua ba, “Unung, nga sanga ngasina langa na kamelimdi xauna,” bing ina naga hainga umogu na lipuxigu sabanga garanoa naga.’
45“Ngasabu mua, baing Rebeka sok. Xori bori langgam yaxunia saing riba xu lang banggumia, saing ngabala ba, ‘Ung sanga ulia nga lang?’
46“Baing hata sibuna li tatua bori langa saing harua ba, ‘Lipu sabanga unung. Nga bagula ngasina langa na kamelimdi xauna.’ Nganung masup baing ulia kameldi.
47“Baing ngaxusunga ba, ‘Ung gaxarea garanoa?’ “Harua ba, ‘Nga Betuel garanoa, Naho Milka tang garadinga.’ “Ne ngata ringa mana yungxanoa, xaung raxudi mana rimandi.
48Baing ngagung kigu tuxundi titia saing ngasabu na Urana. Saing ngaiti Urana yanoa, Urana lipuxigu sabanga Ebraham inia. Ina xap nga ma maringing sibuna rangua lipuxigu sabanga sabanganoa numania. Bu sanga ngaxap nanuhanginoa mala bu yau lipuxigu sabanga garanoa.
49Tauna abo alibu kubolu maringina mana lipuxigu sabanga bing abala nga maringina, ne tegu sanga abala nga xauna. Binabu ngahatum ba ngalibu baru.”
50Leban Betuel tang dahaxuya ba, “Urana ina libu alaba am sanga am gaharua baru.
51Rebeka wau. Oxop bu tang gala. Ina sanga yau lipuxim sabanga garanoa, bila Urana harua baing.”
52Ebraham lipuxim oxatam lungu haruangadinga saing turu ba sabu na Urana.
53Kimuya xap yauyaunga silba gol xaung imang xai sibundi saing sinadi na Rebeka. Sina yahanga maxangmaxana na Rebeka sabanganoa xaung bauna.
54Hangixayangua sup baing Ebraham lipuxing oxatama daxang xaung dinung saing dikinu. Baing buraraging sibuna dimesa saing Ebraham lipuxing oxatama harua ba, “Ngabo ngagoxoya muli rangua lipuxigu sabanga.”
55Ne Rebeka bauna xaung sabanga daharua ba, “Ayunga Rebeka wa ranguam sanga xaidapdi 10 disup to, kimuya ina mala.”
56Baing Ebraham lipuxing oxatama harua ba, “Ang sanga abili nga te, Urana libu oxatagua sok xai lo. Alungu ngabo ngagoxoya mala rangua lipuxigu sabangua.”
57Baing daharua ba, “Tawagi haing nanuna bu taxusunga murunganoa.”
58Baing duwagi Rebeka ma, saing duxusunga ba, “Ubo ula rangua lipua baguli?” Baing harua ba, “Awa, ne ngabo ngala.”
59Baing disoxi hainga wasa mana Rebeka ba tang digabu Ebraham lipuxing oxatama bu dila xaunga.
60Saing disina guxama na Rebeka bila li, “Hamungamam, ung bagula usok haing gara xumanam. Binabu bakbagimdi ditatua bixuadingdi, bu daxap titidinga.”
61Baing haing oxatama Rebeka tang dirung kameldi ubudingia saing disu mana Ebraham lipuxing oxatama. Mana kubolua baguba lipu oxatama xap Rebeka mala.
62Mana bungina laba Aisak yunga longa titi lang banggumgam duxu ba, Lang banggumgam Urana inia lulianam bu bagu nga. Baing ila wa mana longa Negep.
63Xaidap tela bungbung ila haxa mana long tela tatubang raxapdi saing bagu kameldi dima.
64Saking Rebeka bagu Aisak saing yunga kamel saing ri ma.
65Xusunga Ebraham lipuxing oxatama ba, “Gaxarea haxa ma rangua kira?” Lipu oxatamga harua ba, “Lipuxigu sabanga.” Baing Rebeka xap imanga toxonia saing kaukau ramramonoa.
66Lipu oxatama naxuya na Aisak mana baraxinta libudi.
67Aisak xap Rebeka mala bauna numania, Sara, baing yau ba. Aisak muruna mana Rebeka, baing gamonoa yaha muli. Muga gamonoa mauxana, namua na bauna mati baing.
