Hiobe 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Bilidadizi iŋuc âzâcneme Hiobe e dâŋ okacne kecʒiŋuc bâtikiecnewec:

²“Eha, dâŋ mukomec i mârâc jaha mana‐fârepo; mâc ine ŋiczi weniŋuc erâ Anuture maio bahac fâsâc domaocmu?

³Me ŋiczi Anutuhec dâŋ mu qaqatarac sâcne eocmu? Aricne, e Anutuzi wiocneme arecne wâŋ tauseŋ eocmuo ine okacne mocjaha mac bâtikiecneocte eipieocmu.

⁴Manakic, Anutu e maŋɋârâŋ â tâpiri sâkohec juekac, irec ŋic moczi sanaŋkerâ maŋbâiŋ sâcne mi ecneocmu.

⁵E tiki ututuŋ jaha bârâriec‐jopaekac, ehuc aaricko bâsirowec‐jopaekac.

⁶Anutuzi mume homeŋ bame mâreŋzi ɋiɋiteckeekac, erâ mâreŋte ŋesiŋ i wâc qiriŋ qaekac.

⁷Anutu e ʒoaŋ aka hecneme mi wefuocmu, â bâpiŋ hecke‐jareme mi tamaeniŋmu.

⁸E moczi moc bafickeha sambâŋ mi qaratiewec, erâ temboŋzi huhuckerâ feha fainao âte sanaŋkehuc rawec. Eki hâcne bâpiŋ bâfuac‐jopahuc kecʒiŋuc jaŋe wâc râec‐jopawec:

⁹Raru, demeŋ ɋafâc, rowaŋ qosac erâ juwic mâreŋte bâpiŋ wiac.

¹⁰E wiac qeŋ bipinehec, ŋiczi mi mamana tarane â mâsi wiac wowosene tâmiric baekac.

¹¹Manakic, Anutu e nowarume mi ʒâŋitaekopac, me fâre niniŋkehuc rame mi hone taraekopac wâc.

¹²E wiac i me i nâwoc rozo mume mozi aka hecneocmu? Me mozi ʒiŋuc moc wiocneocmu: ‘Go wemo wiac ekomec?’

¹³“Anuture aariczi biac mi omaekac, e râsifâc‐ticne jaŋe Rahaba oâ sâkozi maŋbâiŋ ecneha bafickembiŋte bâsirowec‐jopawec.

¹⁴Anuture fuŋne iŋuc fohame no weniŋuc erâ dâŋ okacne sâcne bâtikiecnepemu?

¹⁵No bahacmâc juipiehuc dâŋ okacne bâtikiecnepemurâ eipiekopac, irec e mumutara‐nane jukacte mana‐nareocte numucnezo sawa manasukopac.

¹⁶No ere maio fuapemurâ mana‐narezac mecne, erâ ine sifu dâŋnanere hazec mi mecne râezac.

¹⁷Eki hâcne mume fuŋne tâmiricko wiac hâhâwicnezi fuarâ sipiricnuekac.

¹⁸E nokafe hezipore aka henareekac, ehuc wiac enareekac sasawa izi mamana sâqoc sawa bâfua‐nareekac.

¹⁹No sanaŋkerâ Anutu ʒoɋac sâcne ecnepemu? Me dâŋgieo râezo mupe mozi sâcne ecneme raocmu?

²⁰No nahac bahacmâc â siocmâc juekopac, erâ ine sifu dâŋ mupe sâqoreekac. No kiŋ tâmiric juekopac, erâ ine sifu Anutuzi mana‐nareme kiŋhec jukopac tinac eekac.

²¹No bahacmâc juekopac, erâ ine juju‐nanere manape fârine mi eekac, irec no ʒuhuckerâ juzore takicnukac.

²²Juju biaŋne me sâqocne i erao fuŋne mocjaha efâreekac, irec no ʒiŋuc mukopac: E ŋic bahacmâc â sindaŋne mâmâc bâsirowec‐jopaekac.

²³Ŋic bahacmâc moc e wiac hâhâwicne fuacneme ututuŋ jaha hâmome Anutuzi hâhâwic‐ticnere erâ gâwiecneocmu.

²⁴Anutu e mâreŋ sâko mâreŋ i ŋic sindaŋne jaŋere meo râewec fokac, ehuc mumutara ŋic ʒâŋe tiŋtuŋ bacjopawec. Me Anutuzi wiac i mi ewecko ine mo ŋiczi ewec?

²⁵“Ŋiczi gasackeeŋgopieŋ irec sâc ʒoaŋ gie bapa‐nanezi gasackehuc juju biaŋ moc mi bâbâfua‐nare mâc nowarueŋgopieŋ.

²⁶Â juju dameŋ‐nane i woke marojâczi bakicnere gasackehuc raekac irec sâc beraŋnea gasackehuc ratâmireekac. Pizu pizuzi qâqâc motecne honerâ tara wahaekac irec sâc hâcne.

²⁷No ʒâic‐nanere nikecnuocte ʒeri bubiaŋ hawari bâfuarâ dâŋ gâgâwi ezepac.

²⁸No iŋuc muhape jaha ʒâic busâqoc‐nanezi mocwâc maicnume ʒiŋuc manaekopac: Anutu e nore maname kiŋhec ekac.

²⁹Anutu e nore maname iŋuc ekacte no wemocte tiŋke biaŋ epemurâ maŋgâŋ giene bapemu?

³⁰Sâqocne‐nane fokac i saifezi ʒure bâtâmirec eene mi ekac.

³¹Me eene muzac ine Anutu e sifu sohoŋ dodocko tuŋnume huzapo, eme ŋaqi qoruc‐nane ɋaɋacne i mocwâc babajune mi ezac.

³²Anutu e ŋic muzac ine dâŋ okacne sâcne bâtikiecnezapo, ehame dâŋgie bahuc dâŋnâhec mufâsâezapec.

³³Ʒi ine ŋicŋondeŋ‐nâhec moc mi jukacte moczi moc Anutu â no dâŋnâhec sâcne mi mutara‐nâcteocmu.

³⁴Anutu e ʒuhuckerâ mocwâc mi bâtiŋnuzejec, e norao wiac hâhâwicne bârârieme omaezejec.

³⁵E iŋuc eme no maŋnanere fuŋne manakopacte ere hâhâwic mi bajuhuc dâŋnane sâcne mupemu.