Yuba 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Yuba yi a yabi, a naxa,

²“Ɲɔndin na a ra, n na a kolon a na kii nin, anu adamadiin nɔɛ tinxinɲɛ ayi di Ala yɛɛ ra yi?

³Xa muxuna nde waxi Ala matandi feni, hali Ala a maxɔdin sanɲa ma wuli keden, a mi a yabɛ hali keden pe.

⁴Fekolonna nun sɛnbɛn birin a tan nan xa. Nde nɔɛ Ala matandɛ, na feen mi saran a ra?

⁵A geyane bama e funfuni, a mi e rasogin, a yi e raxuya ayi a xɔlɔni.

⁶A bɔxɔn naxuruxurunma a dɔxɔdeni, a yi bɔxɔn bunne raxuruxurun.

⁷A na falan ti sogen xa, sogen mi tema, a yi sarene ratagan dɛgɛ.

⁸A tan nan keden koren daxi, a sigan ti fɔxɔ igen mɔrɔnne fari.

⁹A bata Kanko Gbee sare kurun nun Donso sare kurun nun Dii Tɛmɛ Solofere sare kurun nun yiifari fɔxɔn sarene da.

¹⁰A fe gbeene ligama muxun mi naxan famunɲɛ, a kabanako feene liga naxanye mi nɔɛ yatɛ.

¹¹A danguma n dɛxɔn ma, n mi a toma. A lɔma ayi, n mi a yigbɛma.

¹²A naxan xasunxi fangani, nde nɔɛ na bɛ a yii? Nde susɛ a maxɔdinɲɛ, fa fala, ‘I nanse ligama?’

¹³Ala mi xɛtɛma a xɔlɔn fɔxɔ ra, hali ige yi ninginangan Raxabi nun a walikɛne xinbi sinxi Ala bun ma.”

¹⁴“Nayi, n tan nɔɛ a yabɛ nanse ra? N falan mundun tiyɛ a yɛtagi?

¹⁵Hali n tinxin, n mi a yabɛ, n na n makiti muxun nan mafanma.

¹⁶Hali n na a xili, a yi a ratin, n mi lɛ a ra xa a tuli matiyɛ n xuiin na.

¹⁷Amasɔtɔ a bata n halagi foye ɲaxin na, a yi n ma fure dɛɛne rawuya ayi, bun mi naxan ma.

¹⁸A mi tinma n yi yengi a faɲin na, koni a n nalugoma xɔlɛn nan na.

¹⁹Nde sɛnbɛ gbo dangu birin na, xa a tan mi a ra? Nde n xilima kiti sadeni, xa a tan mi a ra?

²⁰Hali n yi tinxin, a n yalagima nɛn n ma falane xɔn. Hali sɔntaren nan yi n na, a yi n yitɛ sɔnmaan na.

²¹Sɔntaren nan n na, koni n mi fa n yɛtɛ yatɛxi, n bata n mɛ n niin na,

²²a birin keden, nanara n na a falama fa fala a Ala sɔntaren naxɔrima nɛn alo muxu ɲaxina.

²³Xa gbalon fa, a faxan ti sa, Ala sɔntarene tɔrɔyaan magelema nɛn.

²⁴A dunuɲa sama muxu ɲaxine sagoni, a yi kitisane yɛɛne raxi. Xa a tan mi a ra, nde fa a ligɛ?”

²⁵“N ma siimayaan mafura danguɛ dangu gilaan na, n ma lɔxɔne e gima, n mi hɛrin toma,

²⁶e mafura alo kunki gbala daxina igeni, alo singbinna naxan sinma suben ma.

²⁷Xa n na a fala, n naxa, ‘N xa ɲinan n ma mawugan xɔn, n yi n ma sunun lu na, n yi n sɔbɛ so,’

²⁸n gaxuma nɛn n ma tɔrɔn birin yɛɛ ra, bayo n na a kolon a i mi n yatɛ sɔntaren na,

²⁹n kolonma tinxintaren nan na i yɛɛ ra yi. Nanfera n na n yɛtɛ xadanma fuuni?

³⁰Xa n na n maxa safunna ra, xa n na n yiine raxa libin na,

³¹i n nasinma nɛn lɔxɔn xɔrɛ ra, n yi raɲaxu n ma dugine yɛtɛɛn ma.

³²Muxu mi a tan na alo n tan, n mi nɔɛ a yabɛ, hanma nxu siga kiti sadeni.

³³Tagi yitɔn muxu mi nxu tagi, naxan nɔɛ a yiin sɛ nxu firinna birin ma

³⁴naxan a dunganna bɛ n fari, alogo a nɔrɔn nama fa n magaxu.

³⁵Nayi, n yi falan tima nɛn, n mi gaxu a yɛɛ ra. Koni n bata a kolon a n kedenna na a ra.”