Job 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ne migkaǥi si Job,

²“Uya, tutuu heeyan is lalag nu. Piru hengkey is paaǥi para igkepaahà te etew he wazè din salà diyà te etuvangan te Megbevayà?

³Minsan ebpekidlalis pa sikandin te Megbevayà diyà te hukmanan, ne wazè din egkehimu, su is nengkelibu he insà kandin te Megbevayà ne wazà minsan sevaha zutun he egketavak din.

⁴Metau wey utew mekeǥeǥehem is Megbevayà. Hentei man is nekezaag he nekigkuntada kandin?

⁵“Kenè en sikandin ebpetizaan, ne edhuyungen din is menge vuntud ne egkengetempag heini tenged te pauk din.

⁶Ibpelinug din kayi te tanà puun diyà te nesevukan kayi.

⁷Pinaaǥi zà te kebmandù din ne egkehimu he kenà edsilà is andew wey kenà edsiǥa is menge vituen.

⁸Iyan dà sikandin midempas te langit, wey iyan dà sikandin ebpekepeengked te menge vaǥel.

⁹Iyan sikandin mibaal te grupu te menge vituen he egngezanan te Oso, Belatic, Penikapan, wey menge vituen diyà te zivavà he vahin te kelimbaǥan.

¹⁰Mibaal sikandin te egkein-inuwan he menge vaal he kenà egketegkad wey kenà egkevilang.

¹¹Emun edseǥazan e zin ne kenè ku sikandin egkaahà wey kenè ku egkeǥezam.

¹²Emun duen din egkesuatan te egkuwa, ne wazà ebpekeeǥen kandin. Wazà etew he zuen din gehem te kedriklamu ke hengkey is ebeelan te Megbevayà.

¹³Wazà eǥena te Megbevayà is pauk din. Minsan si Rahab is umuuǥup te dragun, ne ebpekeseludu te Megbevayà tenged te egkehandek kandin.

¹⁴Umbe, wazà egkehimu ku he pengalang para kenà a mezezeeti te Megbevayà.

¹⁵Minsan wazè ku salà kenè ku egkepengelangan is keugelingen ku emun edezeetan e zin. Iyan dà egkehimu ku is kebpehizuhizu te Megbevayà he Meghuhukum ku.

¹⁶Minsan edhengyuan ku sikandin he ebpeetuvangè key ne ebpezumazuma, ne kenè e zin gihapun ebpemineǥen.

¹⁷Su ibpaantus e zin he henduen be te edel-asen a te vagyu, ne ibpeiseg din is kegkesekiti ku te wazà hinungdan.

¹⁸Henduen be te kenè e zin en ibpeǥeǥehinawa te menge mesakit he ibpaantus din kedì.

¹⁹Emun desen is ed-ahaan, ne utew mezesen sikandin! Ne emun sinumbungà, ne wazà ebpekesumbung kandin.

²⁰Minsan wazè ku salà, edhukuman e zin gihapun te silut tenged te ebpengeǥiyen ku he idlavan ku te keugelingen ku.

²¹Minsan wazà igkesawey kedì ne wazà keniyan bali kayi te kediey. Egkeepesan ku is untung ku.

²²Su ebpeked-iring dà is midtinazeng wey wazà; su edezeetan te Megbevayà is metazeng wey is lalung.

²³Ed-engit dà sikandin emun segugunà ebpatey is metazeng tenged te vangkit.

²⁴Mibpeveyveyaan din te menge lalung is kelibutan. Edsebpengen din is mata te menge meghuhukum. Emun kenà iyan sikandin mibaal kayi ne hentei ves?

²⁵“Utew meǥaan he ebpenlavey is menge andew te untung ku; henduen be te edhuna pa he meǥaan te ebpekidlumbà. Nenlavey heini zuma te kegkeseeng.

²⁶Uya, utew meǥaan he edlavey is untung ku; iring keǥaan te meǥaan he untuzà etawa vanug he edawi.

²⁷Minsan kenà ad edriklamu wey kenà ad edseengseeng, ne egemen ad,

²⁸egkahandek a ǥihapun te menge elentusen he ebpekeuma kayi te kedì. Su netuenan ku he kenè din ed-isipen he wazè ku salà.

²⁹Su ǥuntaan ed-isipen e zin he mekesesalà, umbe wazà pulus te tinguhè ku he idlavan ku te keugelingen ku.

³⁰Minsan pa ke edsebunan ku is tivuuk he lawa ku su para lumpiyu a,

³¹id-ahuk e zin gihapun diyà te vesaken he vudsi, su para minsan is bisti ku egkeremerik kedì.

³²Kenà etew is Megbevayà iring kedì, umbe kenè ku sikandin egkevarew wey kenè ku igkesumbung diyà te hukmanan.

³³Angin pezem ke zuen ebpekepeteliwazà kenami he edhusey kenami te zezuwa.

³⁴Ne igkepeengked din is Megbevayà te kedlagkut kediey, su para kenà ad mahandek.

³⁵Ne zutun, kenà ad egkahandek is egkaǥi ziyà te kandin, piru ǥuntaan kenè ku pa heini egkehimu.”