Hiop 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mürin, Hiop a apasa,

²“Ellet, üa fen silei meinisin mine ka üreniei. Nge ifa usun än eman aramas epwe tongeni küna pwüng me fän mesen Kot?

³Are eman aramas a mochen anini ngeni, esap tongeni pälüeni eu me lein engeröü kapas ais.

⁴Kot a tipachem o fokun pöchökül. Iö a pwäk ngeni an epwe ü ngeni?

⁵Kot a amwökütükütü ekewe chuk o atururetiu lon an song, nge aramas resap silei me mwan.

⁶A achecha fanüfan o amwökütü seni lenian, a pwal achecha üran kana.

⁷A allük ngeni akkar pwe esap tötä, a amwöchü ekewe fü pwe resap tin.

⁸I chök a förätä ekewe läng o fetal won nonoon lematau.

⁹Kot a förätä ekewe fü iter Uwölö me Öniön me Mweriker, pwal ekewe muchiechien fü mi nom ör.

¹⁰A föri mettoch mi tekia esap wor eman a tongeni weweiti. A föri mettoch mi amwarar esap wor eman a tongeni aleani.

¹¹Lupwen a feila ünüki, üsap tongeni nengeni, lupwen a lu seniei, üsap tongeni küna.

¹²A turufi mine a mochen, nge esap wor eman a tongeni pinei. Iö a tongeni aisini, ‘Met ka föri?’

¹³Kot esap aükätiu an song. Ekewe chon alisi Rahap ra chapetiu arun pechen.

¹⁴Ifa usun ai üpwe tongeni pälüeni Kot? Ifa usun, meni sokun kapas üpwe tongeni eäni ngeni?

¹⁵Inamwo ika üa pwüng, nge üsap tongeni pälüeni. Üa chök tongeni tüngor ngeni Kot ai we soukapwüng, pwe epwe ümöümöch ngeniei.

¹⁶Ika mwo ngang üpwe kökköri Kot, nge i epwe pälüeniei, üsap lükü pwe epwe rongorong ngeni ai kewe kapas.

¹⁷Pun a atatakisiei ren eu mölümöl o achomonga kinasei, nge esap wor popun.

¹⁸Kot esap mwüt ngeniei pwe üpwe ngasangas, nge a amasoua manauei ren riaföü.

¹⁹Ika iei eu akufufengenin pöchökül, nengeni, i a kon pöchökül. Nge ika iei eu angangen kapwüng, iö a tongeni kökköri?

²⁰Inamwo ika üa pwüng, püsin kapasen awei epwe apwüngüei. Inamwo ika esap wor ai tipis, i epwe pwärala pwe üa tipis.

²¹Ikamwo esap wor ai tipis, nge üsap püsin ekieki inisi. Üa anioputa manauei.

²²Aramas meinisin ra wewefengen. Iei mine üa apasa pwe Kot a niela ätewe esap wor an tipis usun chök ätewe mi tipis.

²³Lupwen feiengau a aworato mäkai, i a takirin ämängau ren än ewe chon pwüng feiengau.

²⁴Lupwen eu fanü a tolong lepöün ekewe aramasangau, Kot a pwölüela mesen ekewe soukapwüng. Are esap i, iö chök a föri?

²⁵Ränin manauei ra müttir sü seniei, lap seni müttirin eman chon sä. Ra süla, nge esap wor feiöch lor.

²⁶Ra säila seniei usun chök müttirin efoch waseres, ra müttirila usun chök müttirin eman ikel mi tur won liapan.

²⁷Are üa apasa, ‘Üpwe manlükala ai siö, üpwe likitala ai wowongau pwe üpwe wopwapwa,’

²⁸nge üa chök niuokus ren ai kewe riaföü meinisin, pun üa silei pwe Kot esap atolongaei lon tettelin chon pwüng.

²⁹Are üa nom lon tettelin chon tipis, pwota üpwe weiresmwäl, nge esap wor lomotan?

³⁰Ikamwo üpwe limetiei ren sop o limetöchü pei ren sarasko,

³¹nge Kot epwe chök aturueilong lon eu pwang mi anou, pwe püsin üfei epwe anioputaei.

³²Pun Kot esap eman aramas usun ngang pwe üpwe tongeni pälüeni, ika aipwe tongeni kapwüngfengen.

³³Amwo epwe wor eman chon aför lefilem pwe epwe anomu pöün wom me ruoman,

³⁴pwe Kot epwe ükütiu le apwüngüei, nge an eniwaei esap chüen aniuokusuei.

³⁵Mürin üpwe kapas, nge üsap niuokusiti Kot. Nge usun nonomi iei üsap tongeni.”