Ayuba 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ayuba naxa a yaabi,

²«N na birin kolonxi nɔndi ra. Ala nɔma nɔndi fide adama ma di?

³Xa Ala na kiiti safe, adama tan mu nɔma a dɛ tongode a kanke ra.

⁴A tan nan gbe na lɔnni nun sɛnbɛ ra, nde nɔma tide a kanke?

⁵Ala nɔma geyae talade e tide, a e mafindi a xa xɔnɛ kui.

⁶A nɔma bɔxi bunyi rasɛrɛnde, a a bɔɔ a ra.

⁷A nɔma soge nun tunbuie ifɔɔrɔde.

⁸A tan nan koore itala, a a ɲɛrɛ baa mɔrɔnyie fari.

⁹A tan nan tunbui birin sa, kankan na a yire.

¹⁰A bara fe xungbee raba won mu nɔma naxee fahaamude. A xa kaabanakoe mu nɔma kɔntide.

¹¹A nɔma dangide n sɛɛti ma, n mu a to. A lɔɛ, n mu nɔ a tode.

¹²Nde nɔma a xa se tongoxi ragbilende? Nde nɔma a falade a bɛ, ‹I na munse rabafe?›

¹³Ala mu gbilenma a xa xɔnɛ fɔxɔ ra. Yɛtɛ igboe xaxili tide birin birama a ya i.

¹⁴N tan, n a yaabima di? N wɔyɛn mɔɔli mundun falama a bɛ?

¹⁵Hali nɔndi sa na n bɛ, n mu nɔma tide a kanke. N ma kiitisa madiɲɛfe nan tun luma n yi.

¹⁶Xa n sa a xili, a naxa n yaabi, n mu lama a ra a bara a tuli mati n na,

¹⁷barima a bara n tɔɔrɔ a gbe ra, a bara n ɲaxankata na ki tun.

¹⁸A mu n luma n xa malabu, a bara n ma xɔnɛ xun masa a ɲaaxi ra

¹⁹N mu nɔma a ra, barima a sɛnbɛ gbo n bɛ. Muxu nun Ala mu nɔma makiitide, barima kiitisa mu na muxu tagi.

²⁰Hali n sa tinxin nu, n dɛ mu nɔndi fima n ma. Hali yunubi mu na n ma nu, n dɛ kiiti rakanama nɛ n na.

²¹Yunubi na n ma? N mu a kolon N nimisaxi n ma duniɲɛigiri nan tun na.

²²N tan bɛ, a birin keren, barima Ala tinxintɔɛ nun tinxintare birin ɲaxankatama.

²³Gbaloe na tinxintɔɛ li, Ala mu na tɔɔrɛ toma.

²⁴Tinxintare na bɔxi nde sɔtɔ tinxintareya kui, Ala a niyama kiitisae xa tin na ra. Xa Ala mu a ra, nde a ra fa?

²⁵N ma simaya xulun gila bɛ, A ɲɔnma beenun n xa hɛɛri sɔtɔ.

²⁶N ma simaya dangima alɔ kunkui, alɔ sɛgɛ naxan goroma tɔxɛyɔrɛ ma.

²⁷N na a fala, ‹N xa nɛɛmu n ma mawa ma, n xa ba sunnunxi, n xa n sɛnbɛ so,›

²⁸n ma tɔɔrɛ nan birin luma n magaaxu ra. N a kolon i mu nɔndi fima n ma.

²⁹N to bara yunubi sɔtɔ, n nɔndi fenma n yɛtɛ bɛ munfe ra?

³⁰Hali n sa n maxa nɛ ye tinsexi ra, hali n sa n bɛlɛxɛe maxa xɔsi ba se ra,

³¹i n nagoroma nɛ boora, n xa raɲaaxu n ma dugie ma.

³²Ala mu luxi alɔ adamadi, n nɔma naxan xilide kiiti ma, alako n xa n gbe fala, kiitisa xa kiiti sa muxu tagi.

³³Kiitisa yo mu na naxan nɔma kiiti sade n nun Ala tagi.

³⁴Ala xa a xa wuri bɔnbɔ ti se ba n xun ma, a xa a xa fe magaaxuxi ba n yi ra,

³⁵alako n xa nɔ wɔyɛnde a ra gaaxutareɲa kui. Kɔnɔ n ma fe to mu na ki xɛ, n xa lu n keren.»