1Na Job el topuk ac fahk,
2Aok, nga lohng nufon ma ingan tari. Tusruktu ma ya mwet se ac ku in eis kutangla el fin lain God in pacl in nununku?
3Kut ac alein fuka nu sel? El ku in siyuk tausin mwe siyuk Ma mwet uh tiana ku in topokla.
4God El arulana lalmwetmet ac kulana; Wangin mwet ku in alein nu sel.
5El ku in moklela na eol uh in kitin pacl, ac wangin eteya, Ac kunausla eol inge ke ku lun kasrkusrak lal.
6God El supwama kusrusr lulap ac mokleak infohk uh; El osrokak sru lulap ma loangeak faclu.
7El ku in sikulya faht uh in tia takak, Ac oru itu uh in tia kalem ke fong.
8Wangin mwet tuh wi God laknelik kusrao, Ku futungya fintukun ma sulallal inkof uh.
9God El oakiya kais sie u in itu inkusrao — su orala petsa ke luman Bear Lulap soko, Mwet Sru Kosro se, ac Tamtael itkosr, oayapa itu nu epang.
10Kut tia ku in kalem ke orekma usrnguk lal uh, Ac mwenmen ma El oru inge wangin safla kac.
11“God El fufahsryesr ye mutuk, a nga tia ku in liyal.
12El eis ma El lungse, ac wangin mwet ku in kutongilya; Wangin mwet ku in fahk, ‘Mea kom oru an?’
13Kasrkusrak lun God uh tia ku in ekla. El kunausla mwet lokoalok lal Su kasrel Rahab, ma sulallal inkof uh, ke Rahab el lainul.
14Ke ma inge, nga ac konauk fuka kas in sang topkol?
15Finne wangin ma sufal luk, pwayena ma nga ku in oru Pa nga in siyuk ke pakoten sin God, su nununkeyu.
16Tusruktu, El finne lela nga in kaskas, Nga tia lulalfongi mu El ac porongeyu.
17El supwama paka upa in tuh sringilyu ac kanteya monuk, Ke na wangin sripa.
18El tia ase pacl in momong luk; A El nwakla moul luk ke mwe keok upa.
19Ya nga ac srike in lainul? Ku nga ku in lain God? Ya nga ac usalak nu ke nununku? Mea, oasr mwet ku in oru Elan som?
20Moul luk uh nasnasna ac nga inse pwayena nu sel, tusruktu kas luk uh oru oana in oasr koluk luk, Ac oana in ma nukewa nga fahk uh ma ac akkolukyeyu.
21Wangin ma sufal luk, tuh nga mansis na. Nga arulana srungala moul luk.
22Wangin sripen ma nukewa. God El ac kunauskutla, finne oasr ma koluk lasr ku wangin.
23Fin mwet wangin ma sufal la se misa in kitin pacl na, Na God El ac isrun.
24God El sang faclu nu inpoun mwet sulallal. El oru mwet nununku uh kewa in sulongunla. Fin tia El pa oru ouinge uh, na su?
25“Len luk uh kainglana, ac wangin sie sin len inge wo.
26Moul luk uh kasrusr mui oana oak soko ma mui oemeet uh, Oana luman mui lun sie eagle ke el ac pwesrouli nu fin soko rabbit.
27Nga fin ac fahk mu nga ac mulkunla ma nga toasr kac uh, Ac srike in ekulla ngetnget asor luk in pwar;
28Tusruktu nga esamak mwe keok nukewa luk ac nga sangeng Mweyen nga etu lah God El srakna pangon mu oasr ma sufal luk.
29Ke nunkeyuk mu oasr ma sufal luk uh, na mwe mea nga in suk?
30Wangin soap ac ku in ohlla ma koluk luk uh.
31God El sisyuyang nu in sie luf na fohkfok, Ne nuknuk nga nukum inge, a mwekyekinyu pac.
32Funu mwet se pa God, nga lukun ku in topkol, Usalak nu in nununku ac oru aksuwos lasr uh we.
33Tusruktu wangin mwet ku in tu inmasrlosr Ac nununkekut kewa.
34Tari, nimet nununkeyu, O God! Sruokya mwe aksangeng lom an likiyu!
35Nga tia sangeng. Nga ac kaskas, Mweyen nga etu insiuk sifacna.
