Job 9

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Chayno niptin Job cutichir niran:

²«Nogapis musyaycämi rasunpa chayno cashantaga. Diospa ñaupancho manami pï runapis ‹juchaynaj cä› ninmanchu.

³Tayta Dios waranga cuti tapuptinpis runaga ni jucnayllatapis manami cutichinmanchu.

⁴Tayta Diosga fiyupa yachajmi, munayniyojmi. ¿Piraj payta ichipar allicho quëdanman?

⁵Tayta Diosga puntacunatapis chucchurachinmi. Rabyar juchurachiptinpis jircacunaga manami cuentata gocunchu.

⁶Paymi camacächin cay pacha sicsicyananpäpis, simintuncuna llojshicänanpäpis.

⁷Paymi mandan inti mana yagamunanpaj, goyllarcuna mana achicyananpäpis.

⁸Quiquillanmi syëlutapis mashtariran. Lamar pullchajyaycaj jananpapis purin.

⁹Janajcho tucuy casta goyllarcunatapis paymi camaran: ‹Osa Mayor›, ‹Orión›, ‹Pléyades› jutiyoj goyllarcunata, sur caj-läpa aypalla goturaycaj goyllarcunatapis.

¹⁰Payga tucuy-niraj mana atipaypaj milagrucunatami ruran. Chaycunaga yupaytapis mana atipaypämi.

¹¹Tayta Dios ñaupäpa päsaptinpis manami ricashächu. Päsariptinpis manami mayashächu.

¹²Imata charicurcuptinpis ¿piraj payta ‹ama› ninman? Imata ruraptinpis ¿piraj paytaga ‹¿imatataj ruranqui?› ninman?

¹³«Tayta Dios rabyacurcorga manami fäsi alliyanchu. Rahabta yanapajcunapis paypa ñaupanmanmi gongurpacun.

¹⁴Chayno captenga ¿imanöparaj payta cutichëman? ¿Ima rimaycunawanraj paywanga tapunacöman?

¹⁵May-jina juchaynaj carpis manami chapacuytaga camäpacöchu. Tayta jueznëtaga ruwacuyllami ruwacö.

¹⁶Tapunacunäpaj gayaptë pay shamushpanga noga nishätaga imatapis capas manami cäsupämanmanchu.

¹⁷Ichanga löcu wayra usharamänanpämi payga camacächinman. Imatapis mana ruraycaptillämi guerëcunapis piyurpacäcunman.

¹⁸Fiyupami llaquicachimanman. Jämayta cachanalläpäpis balurnë manami canmannachu.

¹⁹Callpäman yäracuptëpis ¡payga mas munayniyojmi! Demandacuptëpis, ¿piraj gayachinman?

²⁰‹May-jina juchaynaj, allillata ruraj cä› niptëpis, ‹juchayojmi canqui› nimanmanmi.

²¹Juchaynajmi cä. Ichanga manami imananpischu. Cawaytaga yamacashanami caycä.

²²Tayta Diosga llapantapis iwalmi rican. Chaymi payga illgächin juchayojcunata, juchaynajcunatapis.

²³Imapis päsaptin juchaynaj runacuna wañuptin, juchaynajcuna llaquicuptin Diosga ricayllami ricapan.

²⁴Cay pachatana cachaycun fiyucunapa munayninman. Juezcunapa ñawincunatana chaparcun. Chaycunata Dios mana ruraptenga chauraga ¿pitaj ruran?

²⁵«Cuytipitapis mas rätumi watäcunaga päsarisha. Cushicuytapis manami tarishcächu.

²⁶Bïdäga päsacun ancash can'wa mayuta päsacojnömi; chipshata ricärir anca lluyllucarcur cörrejnömi.

²⁷‹Llaquicuycashäta gongaycur cushishana goyäshaj› niptëpis,

²⁸fiyupa llaquicuycashämi manchachiman. Tayta Dios gamga ‹juchayoj› niycämanquimi.

²⁹Juchayoj caycashpänaga imapänataj callpachacushäpis.

³⁰Jabunwan may-jina maquëta mayllacuptëpis, lijyawan mayllar cupacuptëpis,

³¹Gamga asyaj mitumanmi jatirpamanquipaj. Chaura röpäpis melanäcamanganami.

³²«Nogaga Diosta manami runa-masëtanöga imatapis nëmanchu. Manami ‹aywashun autoridächo arriglananchïpaj› nëmanpischu.

³³Diospäwan nogapäga canman juc juez, ishcanëta alli arreglamänanpaj.

³⁴Chauraga Dios castigaycämashanpitapis manchaycächimashanpitapis chapämanmanmi.

³⁵Chauraga mana manchacuypami parläman. Nogaga manami waquinnöga shimipa shimipaga cuntistashcächu.