Yobu 9 - Bibeli Luayãtaalá

Yobu 9

Click on verse(s) to share them!

¹Ɔ̃ Yobu mɛ̀:

²Sĩanaɛ, má dↄ̃ màa. Kpelewa gbɛ̃nazĩna yã́ aↄ na Luaɛi?

³Tó gbɛ̃́ ye lɛkpaakɛaànↄ, yã́ mɛ̀n ↄ̀aa sↄo guu a fↄ̃ mɛ̀ndo zã́siwào.

⁴Aà ↄ̃nↄ kɛ̀ zài mɛ́ aà gbãa zↄ̃ↄ. Démɛ a fↄ̃ giɛ̀, ade i bↄ aafiai?

⁵Ì gbɛ̀sĩsĩↄ sↄ̃, aaliↄ dↄ̃o, ì ń fuangba ń pↄkũmao.

⁶Ì tↄↄlɛ lualua à sↄ̃, ì to a gbapɛlɛↄ zĩazĩa.

⁷Ì yã'o ĩatɛ̃ɛ, ↄ̃ ì gí bilɛi, ì pↄ́ku saanaↄla.

⁸Ɔ̃mɛ musu kpàlɛ ado, ì táa'o ísia ikooaↄwa.

⁹À saanaↄ kɛ̀ gudoũ, Kífɛ̃nɛna ń Ko nɛadeo ń pↄ́ pↄ́ kú gɛↄmidↄkĩi oiↄ píi.

¹⁰Ì yãzↄ̃ↄkɛ, wìli fↄ̃ dↄ̃̀o, ì yãbↄnsaɛↄ kɛ, a lɛ́ vĩo.

¹¹Ì gɛ̃mala, mili aà eo, ì gɛ̃zɛa, mili aà wɛ́pao.

¹²Ì pↄ́ símá, démɛ a fↄ̃ giɛ̀i? Démɛ a fↄ̃ oɛ̀, bↄ́ ńlɛ kɛ màaii?

¹³Lua lí to a pↄkũma kpàlɛo, baa Ílɛnↄbↄ zↄ̃ↄ dↄnlɛdeↄ vlãnàuɛ̀.

¹⁴Mapi sↄ̃ má fↄ̃ yã́zãsiwàe? Má fↄ̃ lɛkpaakɛaànↄe?

¹⁵Baa tó ma yã́ na, má fↄ̃ wewào. Ɔ̃mɛ ma yã́kpalɛkɛna ũ, sema mà sùuugbɛawà.

¹⁶Tó ma lɛzùaàzi mɛ́ a wèa, a yãmaae? Mi sio.

¹⁷Ì ma gbɛ̃gbɛ̃ yã́ yↄↄna yã́iɛ, ì ma kɛ'ĩa kpɛ́lɛkpɛlɛ pã.

¹⁸Ìli tó ma wekĩi eo, ì ma tó ń nↄ̀sɛpusuoɛ.

¹⁹Tó gbãa yã́ɛ, aàpi mɛ́ zↄ̃ↄ. Tó yã́gↄ̃gↄ̃aɛ sↄ̃, démɛ a aà sísii?

²⁰Tó ma mɛ̀ ma yã́ mɛ́ na, ma lɛ́ a yãdamalaɛ. Tó ma mɛ̀ má tàae vĩo, a ma ɛɛboɛ.

²¹Má tàae vĩoa? A yãe vĩ lↄo, mi saka mazĩa wɛ̃niu.

²²Yã doũɛ, asa lá málɛ o, ì tàaesaideↄ ń gbɛ̃vãiↄ midɛ píi.

²³Tó yã́ mↄ̀ ga ìnɛ́ kã́ndo, ì tàaesaideↄ láanikɛ ń yã'ea guu.

²⁴Tó bùsu gↄ̃̀ gbɛ̃vãiↄ ↄzĩ, ì pↄ́ku yã́kpalɛkɛnaↄ wɛ́aɛ. Tó aàpi no, dé ni?

²⁵Ma gↄↄↄ gɛ̃a wãa dɛ bàalɛnala, aalɛ tá ń bao, a kee nao.

²⁶Aalɛ gu baa vĩ lán kɛfu gó'ilɛnawa, lán kúu sua pↄ́wawa.

²⁷Baa tó ma mɛ̀ má yã́ pↄ́ má kũa bↄ ma nↄ̀sɛu, mí a oa wee mà yákpãinadↄ,

²⁸ma wãwã a iwãa ka ma pↄaɛ. Má dↄ̃ kɛ́ ńyↄ̃ to yã́ bↄmanↄ nao.

²⁹Lá wàlɛ ma gwa tàaede ũ, bↄ́yãi má ĩada mazĩawa pã lↄi?

³⁰Baa tó ma zu'ò ń mↄsↄnao, ge ma a ↄ pìpi ń kasagbↄ̃o,

³¹ńyↄ̃ ma zu ɛ̀ pɛ̀lɛadeuɛ. Baa ma pↄkasaↄ aaↄ ye ma gĩyãio.

³²A dɛ gbɛ̃nazĩna ũ lamawao. Má fↄ̃ yã́zãsiwà wà gbasa gɛ́ yã́kpalɛkɛkĩi sãnuo.

³³Tó gbɛ̃e kú wá kↄ́ↄ ũ, aↄ iko vĩwá wá gbɛ̃ↄn pla wápii,

³⁴i aà go'ↄ zɛ lé, vĩa zↄ̃ↄ pↄ́ málɛ kɛɛ̀ a gɛ́ aɛ lↄo.

³⁵Má vĩakɛɛ̀ lↄo, míↄ yã'o, asa má dↄ̃ mazĩawa, má dɛ lá wàlɛ ewao.

BREAK EVERY YOKE
Creating and distributing free Bible translations for the web and mobile phones to every tribe on Earth. Click to learn how you can support this work!

Yobu 9123456789101112131415161718192021222324252627282930313233343536373839404142