Job 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elihú sïguir niycaran:

²«Noga nishäta wiyamay musyaj yachajcuna.

³Rinrinchi wiyaptenga pï imata parlaycashantapis rejsinchïmi. Gallunchïpis ima micuy cashantapis mayanmi.

⁴Chayno, noganchïpis tantiyacushun. Nircur nishun maygan alli cashantapis.

⁵Jobga nin: ‹Nogaga juchaynaj runami cä. Chaypis Diosga manami alliga arriglamanchu.

⁶Llullacuycämanmi «juchayojmi cä» nishpäga. Guerëcunaga manami allchacanchu, juchaynaj caycaptëpis› nir.

⁷«¡Jobnöga manami pipis canchu! Payga yacuta upojnöllami Tayta Diosta manacajman churarin.

⁸Payga munan mana allita rurajcunawan goturayllata, mana alli runacunawan iwal puriyllata.

⁹Payga nin ‹Dios munashanno allita rurashpanchïpis runaga manami imatapis chasquinchïchu› nir.

¹⁰«Ichanga musyaj yachaj runacuna sumaj wiyamay. ¡Yarpayllapis ama yarpäshunchu munayniyoj Tayta Diospäga ‹mana allitami ruran› u ‹llutantami ruran› nerga!

¹¹Payga cada runatami cutichin imanöpis rurashanpita. Cada runami imata rurashanpitapis chasquin.

¹²Rasunpami munayniyoj Tayta Diosga imatapis mana allita mana ruranchu, ni llutantapis mana ruranchu.

¹³Diosga intëru munduta mandananpaj mandaj cayta manami pipitapis chasquishachu.

¹⁴Tayta Dios munar jämayninta, espiritunta runapita shuntacurcuptenga

¹⁵llapan runami wañunman. Nircur cashgan allpamannami ticranman.

¹⁶«Job, imatapis tantiyaj cashpayquega sumaj wiyamay. Nishäcunata sumaj wiyay.

¹⁷Alli cajta chiquishpanga Dios manami mandanmanchu. ¿Imanirtaj gamga juchaynaj Diospaj parlanqui juchayojpänöpis?

¹⁸Raycuna, rispitädu runacuna fiyu captenga quiquincunamanmi Diosga ayñita cutichin.

¹⁹Payga manami mandajcunapa faburninchu. Pobricunata cachaycorga manami rïcucunata yanapanchu. Paymi llapan runacunatapis rurasha.

²⁰Runacunaga illajpitami wañucäcun. Chacaychönami mancharishpan sicsicyan; nircorga illaraycanna. Munayniyojcunaga manami runacunapa callpanwanchu illgan.

²¹Diosga ricaycanmi runacuna imallata rurashantapis. Musyaycanmi imano cawashallantapis.

²²Mana allita rurajcunataga yanauyaycaj chacajpis manami pacanchu.

²³Diosga runata manami willanchu arriglananpaj pay cajman aywananpaj.

²⁴Manami musyacachänanräpischu munayniyojcunata jitarinanpaj, chayman juctana ruquin churananpäpis.

²⁵Tayta Diosga pï rurashantapis musyaycanmi. Pacha chacarcuptin chayar illgarachinmi.

²⁶Fiyu runacunatanömi llapan ricaycaptin castigan.

²⁷Castigan mana wiyacuyta munajcunata, imano rurananpaj nishantapis mana cumlejcunata.

²⁸Chay fiyu runacuna ñacachiptinmi pobricunaga Tayta Diosta mañacuran. Chaura Tayta Diosnami wiyaran.

²⁹Dios mana rimacuptenga ¿piraj payta jitapanman? Dios ticracurcuptin runaga ¿imataraj ruranman? Paymi ricaycan marcacunatawan runacunatapis,

³⁰fiyu runacuna llullapaypa marcata mana mandananpaj.

³¹«¿Gamga Diosta willashcanquichu: ‹Juchatami rurashcä. Cananpitaga manami juchata rurashänachu› nir?

³²¿Nishcanquichu: ‹Mana musyaynëpa jucha rurashäcunata musyachimay. Mana allita rurasha carga yapayga manami rurashänachu› nir?

³³Diosta manacajman churasha caycaptiquipis ¿gam munashayquinöchuraj Tayta Diosga cutichishunqui? Chaytaga gammi acranayqui, manami nogachu. Mä gam nimay ari musyashayquita.

³⁴«Musyaj yachaj runacunapis, yachaj runacunapis wiyamaj cäga nenga:

³⁵‹Jobga parlaycan manapis tantiyaycarmi. Pay rimashanga caycan manacajcunallami,› nir.

³⁶Payga rimaycan mana alli runacunanöllami. ¡Chaymi Jobpäga sumaj mayacachäshun!

³⁷Jobga manami juchallatachu ruraycan. Jananmanpis mana wiyacojmi. Noganchi wiyaycashapis Diostaga manacajman churaycan. Jananmanpis Diospa contran parlan.»