Hiobe 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elihu e ʒuhuckerâ dâŋ kecʒiŋuc muwec:

²“O ŋicbureŋ, ŋoŋe ‘Maŋɋârâŋhec juŋgopeneŋ’ iŋuc muŋgopieŋte ʒi dâŋnanere hazec râeniŋ.

³Nâŋâc nânâ wiac nâhonehuc, biaŋne me sâqocne irec fuŋne mana taraeŋgopeneŋ; iŋuc jaha ŋoŋe wemocte dâŋ moc manahuc, i maŋɋârâŋ dâŋ me mâcne irec fuŋne mi mana taraŋgopieŋ?

⁴Irec ʒi dâŋ fuakac i biaŋne me sâqocne i mana wosâc erâ fârine mutaniŋkenaŋ.

⁵Hiobe e ʒiŋuc mukac: ‘No bahacmâc jukopac, ehame Anutuzi ine sifu dâŋnane mi dopeckeekac.’

⁶E ʒiŋuc hâcne mukac: ‘No burec ehuc, bahac bâfuapo iŋuc wemocko mupemu. No bahacmâc juhape sifu huc wic bâbâsomiene tâmiric fua‐narewec.’

⁷Ŋoŋe ŋic Hiobe iŋucne moc honec‐jopa jumbieŋ me? E Anutu araŋ moc mi bacneekac.

⁸E ŋic sindaŋne jaŋere guruo juocte aŋackeekac, ehuc ŋic hehesicne jaŋere hata wâc âteekac.

⁹E ʒiŋuc hâcne muekac: ‘Ŋic moc e Anuture dâŋ mana rereŋ eocmu e wiac fârine i me i moc mi bâfuaocmu.’

¹⁰“Ŋic mamanahec ŋoŋe irec hâcne dâŋnanere hazec râeniŋ: Anutu bapafâre erao eebapa sindaŋne â hehesicne moc mi fokac.

¹¹E ŋic nâŋâc wiac ebac eeŋgopeneŋ irec katucne bazu‐nâreekac, ehuc juju bapa‐nâŋecte sâcko furine nâreekac wâc.

¹²Jâmbomac, Anutu bapafâre e wiac sindaŋne moc mi eekac, erâ dâŋnâŋec moc mi muhasickeekac.

¹³Anutu e mo ŋic mozi tâpiri bâfuacnewec? Me mozi mâreŋ sâko mâreŋ irec guriŋ bapa âkendâŋnewec?

¹⁴Anutu e jahacne sawa manasuhuc juju bâbâfua Mâro‐ticne nâwoc rome muzac

¹⁵ine ŋic nâŋâc ʒeŋgoma hâmorâ mocwâc gâc wândoc efârenʒapeŋ.

¹⁶“Ŋoŋe maŋɋârâŋhec juŋgopieŋko hazec râehapie dâŋ ŋazape mananiŋ.

¹⁷Anutu e mumutiŋ dâŋ qaisockehuc guriŋ bapa gie baekac, ŋoŋe iŋuc muhuc tiŋne â tâpiri rune qorickezo muŋgopieŋ me?

¹⁸Anutuzi hâcne ŋicwofuŋ â guriŋ bapa ŋic fekicne gâcne jaŋe sindaŋ hârindaŋ ehuc bâbâsifuc gie bapie mana‐jareme gâpâreekac.

¹⁹Eki ŋic ʒeŋgoma bâfuac‐nâpowecte ŋic fekicne me moneŋ mafa sâkohec jaŋere maname feha hapetac jaŋere maname wawahane moc mi eekac.

²⁰Jaŋe ŋafeo ututuŋ jaha hâmoniŋmu. Anutu e ŋafe ʒâŋiŋkoa fisi‐jareme siroweniŋmu, e gie sâko moc mi bahuc acmâc jaha jopaocmu hâcne.

²¹“Ŋic nâŋâc hata raeŋgopeneŋ i Anutuzi hone‐fâreekac.

²²Ŋiczi dapâc qisiric maŋnao raʒirâ Anuture maio soŋkerâ juju i moc mi fokac.

²³Ŋic nâŋâc Anuture maio fuapene dâŋnâŋec mutaraocte ʒâfo moc mi banâreekac.

²⁴E ŋic tâpirihec mu indiŋ boc mi ejarehuc mâc bârâriec‐jopaekac, ehuc âkehocfâc‐jeŋic râec‐jopaekac.

²⁵E eebapa‐jeŋicte fuŋne hone mana tarac eekacte ŋafeoa tuŋjopahuc qanʒaŋ‐jopaekac.

²⁶E ŋic sindaŋne jaŋe ŋic gâcne jaŋere ʒâŋe faio imac‐jopaekac hâcne.

²⁷Jaŋe Anutu bâjâpeniŋte takic‐jopame behembiŋ, â sâcmutâc dâŋticne râpeckembiŋte iŋuc ejareekac.

²⁸Jaŋe ŋic qarâ suriŋne qa bâʒâic ejarepie Anutu kio wâwâsic ecnepie wira wâwâsic‐jeŋic manawec.

²⁹E ŋic nâŋâcne wira wâwâsic mi manaocmuo ine mozi dâŋ moc sâcne mucneocmu? Â ʒâŋe mai‐ticne bâsoŋke‐nâreocmuo ine ŋic mocjaha me guru sâkozi sâcne mi honenaŋmu.

³⁰Ehame ŋic ʒâʒâicne jaŋe guriŋ bapa gie bahapie aka wâc sâcne mi hejarenaŋmu.

³¹“Hiobe, go Anuturao sâqocnege mufuahuc sâqocne mocwâc mi bacmurâ mupaŋkemeŋ me?

³²Go Anutuzi bahacge gaza gowatuc eocte moc numucnemeŋ? Â wiac hehesicne râpecke‐fârecmurâ musanaŋkemeŋ me?

³³Anutuzi wiac ebac eekac irec manatec mi sâckeha eki gore dâŋ reŋkehuc wiac ebac eocte mukic me? Erâ i nore wiac mâcne, i gore wiac, irec maŋgao dâŋ fokac i nâzâzemec.

³⁴Ŋic mamanahec jaŋe dâŋnanere manapie sâckeocmu, â ŋic maŋɋârâŋhec jaŋe nore dâŋ manarâ ʒiŋuc muniŋmu:

³⁵‘Hiobe e ŋic mutucne jaŋe dâŋ mueŋgopieŋ irec sâc mukacte fâri tâmiric efârekac.’

³⁶Irec ŋoŋe dâŋticne mana wosâc ehuc ʒiŋuc mananiŋmu: E ŋic sindaŋne jaŋe dâŋ mueŋgopieŋ irec sâc jaha mukac hâcne.

³⁷E sâqocne‐ticne râpeckeocte mi ecnekac, irec ʒâŋe fai‐nâŋecko âke sisic dâŋ muhuc Anutu maŋbâiŋ ecnekac.”