Job 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Migkaǥi si Elihu te,

²“Sikiyu is egkaǥi te uluwanen kew wey zekelà is netuenan niw, purungi a keniyu pemineǥa.

³Su iring te egketuenan te zilà ke hengkey is metaam wey kenà metaam he keenen, is telinga egketau zaan ke hengkey is hustu etawa kenà hustu he menge lalag.

⁴Umbe, edsevuten tew ke hengkey is hustu; ed-istudyuwan tew ke hengkey is meupiya.

⁵Su migkaǥi si Job te, ‘Wazè ku salà piru wazà a beǥayi te Megbevayà te kukuman he kenà a egkevintahaan.

⁶Minsan metazeng a, ed-isipen a he teruen. Minsan wazà salà he nehimu ku, mibeǥayan e zin te zaru he kenà egkeulian.’

⁷“Wazà etew he iring ki Job te utew egkesuat he edsudien.

⁸Metaam diyà te kandin is kebpekiduma te menge lalung wey mekesesalà he menge etew.

⁹Su ke sikandin te, ‘Wazà egkekuwa te etew emun edtinguhà sikandin te kebpenunuat te Megbevayà.’

¹⁰Umbe, pemineg kew kedì, sikiyu is egkaǥi he ebpekesavut kew. Kenà ebaal te mezaat is Mekeǥeǥehem he Megbevayà.

¹¹Ebelesan din is etew sumalà te vineelan din; edhimuwen din diyà te kandin is sungkad te vetasan te etew.

¹²Kenà egkehimu he ebaal te sayep is Mekeǥeǥehem he Megbevayà. Kenè din ebulegkuen is hustu he kukuman.

¹³Duen be midsuǥù kandin te kedumala te tivuuk he kelibutan? Wazà!

¹⁴Emun egkesuat is Megbevayà he egkuwaan din is gehinawa he imbeǥey zin te etew,

¹⁵ebpematey is langun he menge etew ne ebpekelikù dan diyà te tanà.

¹⁶“Emun duen nu kedsavut, Job, pemineǥa nu is egkeǥiyen ku:

¹⁷Ebpekezumala ve is Megbevayà ke kenè din egkesuatan is metazeng he kukuman? Maan is ed-isipen nu he mezaat is metazeng wey mekeǥeǥehem he Megbevayà?

¹⁸Kenè be ke mezaat wey wazà pulus te menge hadì wey menge upisyal edewayen te Megbevayà sikandan?

¹⁹Wazè din ibpelavi te menge pengulu; wazè din peburi is menge sepian lavew te menge pubri, su pudu zin sikandan linimbag.

²⁰Minsan is gemhanan he menge etew edtik-ew ebpatey ke mezukilem, he wazà etew he midhilavet kandan.

²¹Ebpekeventayan te Megbevayà is langun he ebeelan te etew.

²²Wazà merusirem he lugar he egkehimu he ed-elesan te menge lalung.

²³Kenè en kinahanglan he edtewaǥen din pa is etew he medhendiyà te etuvangan din su ed-imbistigahan din su wey zin mehukumi.

²⁴Kenè en kinahanglan he ebpenginginsà sikandin ke ereg be he ibpaawà diyà te kegkelavew zan is gemhanan he menge etew ne ed-ilisan te zuma.

²⁵Su netuenan din is menge vaal zan, id-awè din is gehem dan wey edèdeetan din sikandan minsan mezukilem.

²⁶Edsilutan din sikandan diyà te etuvangan te menge etew tenged te kelelalung dan.

²⁷Ebeelan din heini su ǥeina te mid-engked sikandan he edsunud kandin, wey wazè dan seǥipaa is menge paaǥi zin.

²⁸Edèdaaǥen dan is menge pubri, ne nezineg te Megbevayà is kebuyù dan te tavang.

²⁹Piru minsan ebpereremek wey ed-eles is Megbevayà, ne wazà ebpekekaǥi he kenà hustu is ebeelan din. Piru is tutuu, ebentayan te Megbevayà is menge etew wey is menge nasyun,

³⁰su wey zin meeǥen is kedumala te menge etew he wazà medtuu kandin he ebpekezezaat te menge etew.

³¹“Job, maan is kenè ka ed-uvey ziyà te Megbevayà is egkaǥi te, ‘Nekesalà a, piru ed-engked ad he ebaal te salà’

³²etawa egkaǥi ka te, ‘Ipeteuni nu kedì is salè ku. Emun nekesalà a ne kenè ku en ed-umanan te ebaal.’

³³Kenà ibeǥey te Megbevayà is hangyù nu emun kenè nu ed-engkezan is mezaat he vaal nu. Diyan te kenikew is disisyun ne kenà dini te kedì. Umbe keǥiya nu kedì ke hengkey is egkekaǥi nu.

³⁴Is menge etew he uluwanen wey ebpekesavut, he nemineg kedì,

³⁵ebpekekaǥi he is egkeǥiyen nu, Job, ne wazà mezumahi te ketau wey wazè din pulus.

³⁶Ereg ka he ebpurungan egezami su is menge lalag nu iring te menge lalag te lalung he etew.

³⁷Mid-umanan nu pa is salè nu pinaaǥi te kebpekidsukulè nu te Megbevayà. Edsudien nu wey ed-insultuwen nu is Megbevayà diyà te etuvangan dey.”