Ayuba 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Elihu naxa a masen,

²«Lɔnnilae, wo wo tuli mati. Xaxilimae, wo n ma masenyi ramɛ,

³barima tuli wɔyɛnyi sensima, alɔ nɛnyi donse sensima ki naxɛ.

⁴Won xa tinxinyi sugandi, won xa bira fe fanyi fɔxɔ ra.»

⁵«Ayuba naxɛ, ‹N tinxin, kɔnɔ Ala mu nɔndi fixi n ma.

⁶Hali n to tinxinxi, a bara n lu alɔ wule falɛ. N mu yunubi yo rabaxi, kɔnɔ n na tɔɔrɛ ɲaaxi kui.›

⁷Nde yaagi sɔtɔxi dangi Ayuba ra?

⁸A bara a ɲɛrɛ tinxintareya kui, a bara lu fe ɲaaxi rabae ya ma.

⁹A bara a fala, ‹Geeni mu na adamadi bɛ naxan birama Ala waxɔnfe fɔxɔ ra.›

¹⁰Xaxilimae, wo wo tuli mati n na. Ala nun fe ɲaaxi tagi ikuya, Ala Sɛnbɛ Kanyi mu tinxintareya kolon.

¹¹A mixie xa fe rabaxi sare ragbilenma e ma, a kote dɔxɔma e xun ma e nun naxan lan.

¹²Ala mu nɔma fe ɲaaxi rabade. Ala Sɛnbɛ Kanyi mu nɔma tinxinyi kanade.

¹³Nde a ti a xa duniɲa yamari? Nde duniɲa taxuxi a ra?

¹⁴Xa Ala mu a ɲɛngi saxi adamadie xɔn ma nu, a fa a xaxili nun a ɲɛngi ba e yi,

¹⁵adamadi birin faxama kerenyi nan na nu, e findi bɛndɛ ra.

¹⁶Xa xaxili fanyi na i yi ra, i xa i tuli mati n ma masenyi ra.

¹⁷Tinxintare nɔma duniɲa yamaride? I Tinxintɔɛ Sɛnbɛma nan kalamuma?

¹⁸I nɔma a falade mangɛ bɛ, ‹Mixi xuri di nan i ra?› I nɔma a falade kuntigie bɛ, ‹Wo ɲaaxu?›

¹⁹Ala mu mangɛ rafisa mixie bɛ, a mu bannae rafisa setaree bɛ, barima a tan nan birin daaxi.

²⁰Faxɛ man e birin tɛrɛnnama nɛ. Ɲamae e xunyi ikelima, kɔɛ kui e birin sɔntɔ. Sɛnbɛmae yati faxama nɛ fɔyɔgɔntɔn.

²¹Ala adamadie xa kira birin matoma, a e fɔxi igbɛ.

²²Dimi mu na naxan nɔma tinxintaree nɔxunde.

²³Ala hayi mu na tɛmui xɔnkuye ma mixi makiitife ra.

²⁴A nɔma sɛnbɛmae xun nakanade mafurenyi ra, a fa mixi gbɛtɛe dɔxɔ e ɲɔxɔɛ ra.

²⁵A na e xa fe ɲaaxi to, a nɔma e bade duniɲa ma kerenyi ra kɔɛ kui.

²⁶A nɔma e bɔnbɔde alɔ mixi kobi ɲama ya xɔri,

²⁷barima e mɛɛxi a xa sɛriyɛ nan na, e a xa kira bɛɲin.

²⁸E bara a niya setare wa xui xa Ala li. Ala tɔɔrɔmixi malima.

²⁹Xa Ala a sabari, nde nɔma a kalamude? Xa Ala a nɔxun, nde nɔma a tode? Adamadi mu nɔma na ra, ɲamanɛe yati mu nɔma na ra.

³⁰Ala mu tinxintare luma mangɛya kui, alako a xa gantanyi te ɲama bɛ.

³¹Na mixi mɔɔli mu a falama Ala bɛ, ‹N bara gbilen fe ɲaaxi fɔxɔ ra n ma ɲaxankatɛ xa fe ra.

³²N fe ɲaaxi naxan nabaxi, na masen n bɛ, n mu na rabama sɔnɔn?›

³³Ala lanma a xa a sare fi? I tan nan a matandife, n tan mu a ra, i tan nan yaabi tima.

³⁴Xaxilimae nun lɔnnilae naxee e tuli matixi n na, muxu birin bara lan yi ma:

³⁵Ayuba wɔyɛnfe xaxilitareɲa nan kui, lɔnni mu a yi.

³⁶Ayuba xa ɲaxankata han a dande, barima a xa masenyie mu tinxin.

³⁷A xa yunubi xun nan tun masafe. A wɔyɛnma muxu bɛ yɛtɛ igboɲa ra, A a xa Ala matandi xun masama a xa wɔyɛnyi ra.»