Job 34

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal Ilaihu bin kipgon tok,

²“Ol yumob men, yumob reken miselp klebabala, bat yumob irrim mi en yumob garra sabi wanim ai tok, im trubala,

³jis laik wi teistim daga garram wi tang if im gudwan blanga dagat.

⁴Wal wi garra tok gija blanga dijan trabul en gibit raitwan ensa.

⁵Job reken im brabli gudbala men en imbin tok, ‘God nomo gibit mi feyago.’

⁶Im reken God oldei tok im laiyinbala, en im garram detmatj pein nomeda im nomo bin dum eni nogudbala ting.

⁷Bat trubala, Job nomo garram eni sheim en im nomo garram eni rispek langa God.

⁸Im oldei go garram ola nogudbala pipul,

⁹dumaji imbin tok, ‘Nomeda if wi dum eni gudbala ting, blanga meigim God gudbinji, bat stil im nomo album wi. Najing.’”

¹⁰Wal Ilaihu bin kipgon tok, “If yumob klebabala, yumob irrim en teiknodis. Det boswan God oldei dum wanim rait.

¹¹God oldei peiyimbek ebribodi blanga wanim olabat dumbat.

¹²Det boswan God kaan dum eni nogudbala ting, dumaji im oldei gibit olabat feyago.

¹³Brom longtaim God bin meigim ebrijing jidan gudwei, en im na bos langa dijan wel.

¹⁴If God wandim deigimbek wi laif,

¹⁵wal wi garra ol dai en wi ol garra gobek langa graun.

¹⁶“If yu klebabala yu irrim mi wanim mi tok.

¹⁷Det trubalawan God, oni im na gin gibit wi feyago, bat yu stil tok nogudbalawei blanga im.

¹⁸Yuwai, God na gin panishim ola haibala bos hu jidan nogudwan en wikitwan.

¹⁹God na bin meigim wi holot, en im nomo gibit feyago oni langa detlot boswan en ritj pipul. Im oldei gibit feyago langa ebribodi en detlot po pipul du.

²⁰Nomeda det boswan gin abum detmatj pawa, bat im garra stil dai naitaim wen im nomo redi blanga dai, jis laik ebribodi.”

²¹Wal Ilaihu bin kipgon tok, “God oldei wotjimbat ebrijing wi oldei dumbat.

²²Nomo eni wikitwan pipul gin haidim miselp langa dakbala pleis brom God, dumaji nomo enibodi kaan dalim God wotaim im garra jadjim ebribodi.

²⁴God nomo askim enibodi, bat if im wandim im gin pudumat brabli haibala bos en pudum najalot langa olabat pleis.

²⁵Dumaji im sabi wotkain olabat, im binijimap olabat naitaim.

²⁶Sambala pipul wotjimbat wen im panishim detlot nogudbala pipul,

²⁷hu nomo irrim en teiknodis langa im.

²⁸Deibin tridimbat po pipul nogudbalawei en detlot po pipul bin oldei askimbat God blanga album olabat, en imbin irrim olabat en imbin album olabat.

²⁹Wen God nomo wandim blanga dum enijing, nobodi kaan faindim eni folt langa im.

³⁰Bat stil im panishim enibodi hu jidan boswan en oldei tridimbat ola pipul nogudbalawei.

³¹“Wal Job, yu garra dalim God yubin dum nogudbala ting.

³²Yu askim im blanga shoum yu wanim yubin dum rong wulijim yu kaan dum tharran igin.

³³Yu reken yu meigim ola lowa o God meigim? Yu garra dalim mi wanim yu reken. Ai kaan dalim yu. Wal yu garra jinggabat wanim yu reken.

³⁴Wal enibodi garram gudbala main gin luk en sabi yu oldei tok rabishwei en yu nomo tok raitwei.

³⁶Wal ai garra lafta prei blanga yu, wulijim yu garra ardimbat detmatj, dumaji yu tok jis laik detlot nogudbala pipul.

³⁷Yu oldei gibit bekboun langa God ola taim, en rait iya garram melabat yubin oldei mokimbat im du.”