Job 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Ne midtavak si Bildad he tig-Shua te,

²“Keenu ke ves ed-engked he egkaǥi te iring keniyan? Ebpekeuringer ka, ne wazà pulus te ebpengeǥiyen nu.

³Kenà egkehimu he egurivizen te Mekeǥeǥehem he Megbevayà is kukuman etawa ebulegkuen din is hustu.

⁴Nekesalà is menge anak nu ziyà te Megbevayà, umbe ereg he edsilutan din sikandan.

⁵Iyan, emun edangep ka ziyà te Mekeǥeǥehem he Megbevayà wey ebpehizuhizu ka kandin,

⁶wey lumpiyu wey metazeng is menge ulaula nu, ne minsan guntaan segugunè ke zin edtevangi ne idlikù din is meupiya he kebpekesavuk nu.

⁷Ne is ketiǥeyunan he egkehimu he kenikew te huziyan he timpu ne edhuna pa he utew zekelà duen te nehuna he ketiǥeyunan nu.

⁸“Insai nu is nehuna he menge lapis te kevuwazan. Ne susiya nu ke hengkey is neseǥazan te menge lukes dan.

⁹Su henduen be te veǥu kiw pa he nengeetew ne zeisey zà is kenitew he netuenan, ne edlavey kiw zà kayi te kelibutan iring te alung he kenà ebpedayun.

¹⁰Pemineǥa nu sikandan su ebpenuruen ke zan te netuenan dan.

¹¹“Kenà egkeuyag is sedsed he ziyà edtuvù te wahig emun wazà wahig.

¹²Ebpatey heini zutun te kemulu pa pezem edtuvù su kenè pa timpu te kegerava zuen.

¹³Ne iring daan keniyan is egkepeveyaan te langun he etew he ed-iniyug te Megbevayà. Wazà egkeperateng te etew he wazà medsarig te Megbevayà.

¹⁴Is langun he edseriǥan din ne egkaamur-amur he iring te valey te kelelawà.

¹⁵Edsandig sikandin dutun piru egkevidtew haazà; ebpenggawed sikandin dutun piru egkepekas haazà.

¹⁶Emun ed-ahaan ta ne henduen be te meupiya is kebpekesavuk din; iring heini te pinemula he nepurungan mevinyaǥi wey nesilaan te andew. Edlangkat heini ziyà te lama

¹⁷ne ebpurung ebpendalid diyà te menge vatu.

¹⁸Iyan, emun egkevazut en heini ne wazè en edseǥipà kayi.

¹⁹Ne iyan heeyan ketepusan te kegkeuyag-uyag din, ne zuen en maan edliwan edtuvù duen te tanà he midtuvuan din.

²⁰“Benar iyan, he kenà ed-engkezan te Megbevayà is etew he wazà igkesawey te kebpengungubpaan din, ne kenè din edtevangan is lalung he etew.

²¹Ibpeuman ke zin ibpeengit wey ibpeuruhuy ke zin tenged te kegkelipey nu.

²²Ebpeel-elezan din is lalung he menge kuntada nu, ne edèdeetan din is menge pemilya zan.”