1Ɔ̃ Sua gbɛ̃́ Bilidada yã́zãsìwà à mɛ̀:
2Ńyↄ̃ↄ yã́ bee taa o e bↄɛ ni? Ńlɛ yãbↄlɛ bùuu.
3Lua ì yã́zɛde fuangbaa? Gbãapiide ì yãmaa bãdɛa?
4Lá n nɛ́ↄ duunakɛ̀ɛ̀, a tò aa ń tàaeↄ gbɛ'è.
5Tó n Lua kĩ́i wɛ̀ɛlɛ, mɛ́ n sùuugbɛ̀a Gbãapiidepiwa,
6tó ń gbãsĩ vĩo mɛ́ ń maa, baa e tia a fɛlɛ n wɛ̃nagwa, i n bɛ yã́ gↄ̃́gↄ̃nɛ a zɛ́wa.
7N gwea káau a kɛnɛ pↄe ũo, n gwea gbɛzã aↄ kã́fĩa vĩ maamaaɛ.
8Gbɛ̃́ ziↄ la, ní ↄ̃nↄ pↄ́ an deziↄ kpálɛkɛ̀i dↄ̃.
9Asa nɛ́ zĩ́anaↄn wá ũ, wá yãe dↄ̃o, wá kua dṹniau ì gɛ̃zɛa lán uenawaɛ.
10Gbɛ̃́ zipiↄ yã́ a n wɛ́ kɛ̃o lé? Aa ń nↄ̀sɛ guu yã'onɛ.
11Kɛfu ì kɛ maa dã̀nasaie? Fee ì zↄ̃ↄkũ isaia?
12Tó wi zↄ̃o, baa ń a lá'isikɛo, a lá ì giigaga àa dɛ sɛ̃ↄla píi.
13Màa a dɛ ń gbɛ̃́ pↄ́ Lua yã́ sã̀aàguo, beewa tãmaa a luayãdansai nɛ́.
14Sↄuba nian do ↄ̃ ì a náaikɛ, dã̀nsaba ↄ̃ ì gbãa'ewà.
15Ì sↄ̃kpalɛ bapizi, ↄ̃ bapi lí fↄ̃ aà kũ̀o. Ì didi bapiwa, ↄ̃ bapi ì fua.
16A gↄ̃naↄ ì dagua káau lán lí pↄ́ ìↄ í vĩ ĩatɛ̃ gbãaiwa,
17ↄ̃ a zĩ́naↄ ì fĩakↄ̃i gu gbɛdeu, ì gɛ̃ gbɛↄu.
18Tó wa ga wòlɛ a pɛ́kĩi, gupi ì lelekpaaàzi à mɛ: Má n dↄ̃ yãao.
19Zɛ́ pↄ́ a sɛ̀pi pↄna lɛ́n we, ↄ̃ pↄpãleↄ ì bↄlɛ tↄↄlɛpiwa.
20Lua lí gí tàaesaidezio fá, mɛ́ ìli vãikɛnaↄ gba gbãao.
21A to ǹ yáalↄ tia, ní kúkuakɛ.
22A wida n zangudeↄwa, gbɛ̃vãipiↄ bɛ a gↄ̃ bɛzia ũ.
