Job 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Na Bildad el fahk,

²“Safla sramsram in eng tuhtuh lom an?

³God El tia wi kifasla nununku suwohs lal uh; El tia ku in tia oru ma pwaye.

⁴Sahp oasr ma koluk tulik nutum ah tuh oru lain God. Pwanang El sang kaiyuk fal nu selos.

⁵Inge wona kom in forla ac siyuk sin God Kulana Elan kasrekom;

⁶Fin pwaye lah kom suwohs ac nasnas na, Na God El ac kasrekom. Ac folokonot mwet in lohm sum ac mwe kasrup lom nukewa tuh in mwe srui nu sum.

⁷Mwe kasrup nukewa ma El eisla liki kom Ac tia apkuran nu ke ma El ac sifilpa folokonot nu sum.

⁸“Srike liye luman lalmwetmet in pacl meet ah; Ac nunku ke ma pwaye su mwet lasr meet ah elos etala.

⁹Moul lasr uh fototo, ac wanginna ma kut etu; Kut ac wanginla oana ke lul uh sa na in wanginla.

¹⁰A lela mwet matu lalmwetmet lasr meet ah in luti kom; Porongo ma elos fahk uh:

¹¹“Loa uh tia ku in kapak yen wangin kof we; Tia ku in koneyukyak sayen acn furarrar uh.

¹²Fin wanginla kof, na loa uh pa ac uli emeet, Ke srakna mangosr ac soenna fal in orekmakinyuk.

¹³Mwet ma forla liki God uh elos oana loa inge; Finsrak lalos uh ac wanginla ke pacl se na ma elos mulkunla God.

¹⁴Elos sulela ahng lun pwepenu uh tuh in nien wikla lalos.

¹⁵Ku elos fin fungyang ke sie ang inge, ya ac ku in tapkulosyak? Ac elos fin sruok soko koa ke ang inge, ya ac ku in kasrelos tuyak?

¹⁶“Mwet koluk uh elos furarak in ima uh, Oana pulah su furarak ye faht uh.

¹⁷Okah kaclos uh ac punla eot uh, Ac sruokani ku eot nukewa.

¹⁸Na fin fifyak elos, Ac wangin inkelos yen elos tuh oan we meet.

¹⁹Aok, pwana inge luman engan lun mwet koluk uh; Oasr pac mwet saya ac sifil tuku ac aolulosla.

²⁰“Tusruktu God El tia ku in ngetla liki mwet su inse pwaye nu sel, Ac El tia ku in kasru mwet koluk uh.

²¹El ac fah lela kom in sifilpa israsr ac sasa,

²²Tusruktu El ac fah aklusrongtenye mwet su srungakom, Ac lohm sin mwet koluk uh ac fah wanginla.”