Hiobe 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Hiobe e iŋuc mume Suhiŋic Bilidadizi dâŋ okacne kecʒiŋuc bâtikiecnewec:

²“Micgaonec dâŋ racne sasawa wahakac i mo dameŋko moc behecmu?

³Manakic, Anutu e wiac sâctiri moc mi eekac, erâ dâŋ tiŋne i moc mi muhasickeekac.

⁴Otâ ŋokâfâcge jaŋe sâqocne bahuc Anutu bunao bapie juju bapa‐jeŋicte sâcko okacne bazu‐jarewec hâcne.

⁵Irec go Anutu bapafâre e wira wâwâsic ecnehuc aki anonoc egareocte numucnezemec.

⁶Go iŋuc ehuc maŋɋaɋachec â siocmâc juhaŋtec Anutuzi mocwâc maicgurâ hone soŋaŋ egarehuc go â wiacfâcge ŋoŋe juju biaŋ tahac‐ŋopaocmu.

⁷Anutu e iŋuc egarehuc mafa mâriri mârâc fogarewec irec sâc sirickehuc tahacguocmu.

⁸“Ŋic mârâc jumbiŋ jaŋe maŋɋârâŋ dâŋ mujumbieŋ irec mu gufuc ec, ehuc mamacfâc‐nâŋec jaŋe weniŋuc mana tarambiŋ i hone manazemec.

⁹Nâŋâc ɋâricne fuambeneŋ tinac ekacte wiac moc mi manaeŋgopeneŋ, juju dameŋ‐nâŋec i owâ ririŋte nâkumuc fuaekac iŋucne.

¹⁰Ŋic maŋɋârâŋhec mârâc jumbiŋ jaŋere dâŋ honec, ehuc jaŋe weniŋuc mujumbieŋ i mana tarazemec.

¹¹“Hehembaŋ i opâ sohoŋ tâmiricko sâcne mi fuaekacte mâreŋ kereŋnao mi bâfuaeŋgopeneŋ.

¹²Opâzi ʒicke kereŋ eme wiac i soka sanaŋ mi ehuc ɋaŋa ururuc eha hetâcnerâ wiac i me i bapane mi eekac.

¹³Anuture nikec‐jopaekac ŋic i jaŋe hehembaŋte sâc, jaŋe Anutu râpeckerâ jujure woworic mocwâc mi bâfuaniŋmu.

¹⁴Jaŋe bameŋte qâruruo roweckepie tâcneocmu, â ŋaferuŋ mucko basanaŋkezo muhuc bâtâcneniŋmu.

¹⁵Jaŋe ficjeŋic ʒaŋkekicne ira roweckepie rândiŋkeocmu me dopeckezo epie sifu ŋenʒaŋnerâ waha qaocmu.

¹⁶Ŋic hehesicne jaŋe, hoezi hofâ qinʒiŋ tâpiri jareme fua sokac erâ hae mâreŋ sâcke‐fâreeŋgopieŋ irec sâc.

¹⁷Gâtâ‐jeŋiczi qânâ râreckehuc basanaŋkeekac, erâ sachawecko raʒic wefuc ehuc qiŋ herâ domaekac.

¹⁸Eme ŋiczi unucke behec epene dodoma tacticne sawa foocmu.

¹⁹Manakic, ŋic hehesicne e irec sâc hâcne, e omaeme jujutac‐ticnao ŋic moczi fuarâ juocmu.

²⁰“Erâ manac: Anutu ŋic bahacmâc mi behec‐jopaocmu, â ŋic hehesicne jaŋe wâc mi bafic‐jopaocmu.

²¹E micge baafeckeme gâgâwi faio jucmu, ehame nameŋ bipicgao ʒeridâŋzi sasawa fohuc juzejec.

²²Eme qaisocgueŋgopieŋ jaŋe mimi bâfua‐jareocmu â ŋic sindaŋne jaŋere fic hae bâsiroweocmu.”