Job 8

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Chayno niptin Shúa jutiyoj partipita caj Bildadna niran:

²«¿Imaycamaraj chayno manacajcunata rimaycanqui? Rimashayquicunaga löcu wayranöllami.

³Munayniyoj Tayta Diosga ¿mana alli arriglanchuraj?

⁴Capas wamrayquicuna juchata rurasha canga. Chaymi Tayta Diosga castigasha canga.

⁵Munayniyoj Tayta Diosmanna yäracuy. Mañacuy cuyapaycushunayquipaj.

⁶Juchata mana ruraypa alli cajllata ruraptiqui Tayta Diosga cuydashunquipämi. Chauraga alli goyaytanami tarichishunquipaj.

⁷Ima-aycata charashayquipis manami tincongapächu charänayquipaj caycajman tincurachiptiquega.

⁸«Unay caj runacuna imanöpis cawashanta mayacachay. Unay runacuna imanöpis goyashanta yachacuy.

⁹Noganchëga ganyanllarämi yurishcanchïpis. Manami imatapis musyanchïchu. Llantuy päsarejnöllami päsarinchïpis.

¹⁰Unay cajcunami ichanga willapäshunquiman. Ima-aycatapis yachachishunquiman.

¹¹Totoraga gocha-gochacunallachömi wiñan ¿au?

¹²Chaypis pipis mana rutuycaptillanmi berdiraycashallancho chaquicäcun waquin guewapita mas ñaupata.

¹³Chaynöllami päsan fiyucunatapis, Tayta Diosta gongaycärejcunatapis. Rurayta yarpashancunapis manami camacannachu.

¹⁴Yäracur chapacuycashanga pachcapa llicannöllami.

¹⁵Llicanman charicuptinpis manami awantangachu. Pachcapa wasinman tucnacuptin ushacäcojno ricaconga.

¹⁶Fiyucunaga caycan shanaycashan öra intëru wertapa jacha mashtaraycajnömi.

¹⁷Chay jachacunaga pergacunacho sapichan; nircur wiñar lätarga llapan rumitami chapacurcun.

¹⁸Chaycho caycajta pipis achuriptenga manami pipis musyangachu chay pergacho cashanta.

¹⁹Chaynömi ushacan alliman chayashanpis. Ruquenga wiñamun juc jachacunana.

²⁰«Alli runataga Tayta Dios manami gonganchu. Fiyu runacunatapis manami yanapanchu.

²¹Tayta Diosmi camacächenga yapay asinayquipaj, yapay cushicunayquipaj.

²²Chiquishojcunami ichanga pengaycho cangapaj. Fiyu runacunapa wasincunapis illgangami.»