1Wal Bilded brom det kantri gulum Shuwa bin tok langa Job,
2“Haulong yu garra toktok, bat nomo tok enijing?
3Yu reken det boswan God gin stapam pipul brom abumbat feyago?
4Imbin meigim yu bigininimob pei blanga olabat nogudbalawei wen deibin dai.
5Bat if yu gibit miselp langa im en stat jidan raitwei, wal im garra meigim yu jidan brabli gudbinjiwei.
7En yu garra jidan brabli ritjwan igin langa det taim weya garra kaman, mowa ritjwan den wen yubin jidan basdam.”
8Wal Bilded bin kipgon tok, “Blanga wi grengrenfathamob bin brabli klebabala. Wal yu garra len brom olabat.
9Blanga wi ronwan laif im shotwan, jis laik shedo weya gowei, en wi sabi oni lilbit.
10Bat blanga wi ol pipul garra titjimbat yu garram brabli klebabala main ebrijing deibin sabi brom olabat grenfathamob en grengrenfathamob.
11“Wal yu sabi detlot bilibong gras oldei gro brabli gudwei langa bilibong.
12En wen det woda draiyap detlot bilibong gras draiyap du, bifo detlot najalot gras.
13Wal im lagijat du wen enibodi gibit bekboun langa God, en im nomo sabi im wei, en im garra binijap.
14Nomeda deibin oldei trastimbat langa samting, bat det samting im brabli wikwan, jis laik spaidaweb
15weya kaan holdimap yu strongbalawei, en yu buldan.
16Nogudbala pipul jidan jis laiga plent garram loda bushis weya gro langa san.
17Olabat pudum olabat rutpat raidaran langa rok.
18Bat if sambodi pulumap det plent garram det rutpat, olabat draiyap, en nomo enibodi bin sabi imbin jidan deya.
19En dei kaan jidan deya igin, en nyuwan bushis gro deya. Lagijat du nogudbala pipul jidan brabli hepiwan oni blanga lilwail, en wen dei binij najalot pipul oldei kaman.
20“Wal wi sabi God laigim gudbala pipul, en im nomo album nogudbala pipul.
21Blanga tharran na im garra meigim yu jidan brabli gudbinjiwan, en im garra meigim yu laflafbat igin.
22Bat God garra panishim detlot enami blanga yu en im garra meigim olabat jidan sheim en olabat garra gowei olagijawan.” Lagijat na Bilded bin tok.
