Hiobe 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Eme Wofuŋ e ʒâʒâkiriŋ mâŋâŋmaŋko juhuc Hiobe dâŋ kecʒiŋuc mu wioc ecnewec:

²“Go mo ŋic mo irec maŋɋârâŋ‐nanere manabâc ekomec? Manakic, go iŋuc ehuc mutucgere fuŋne sawa bataniŋkekic.

³Irec go ŋic jâmbâŋ jukomecko faharerâ bifuŋge jomac, ehame no dâŋ mu wioc egarepe okacne bâtikie‐narec.

⁴“Go wena juhaŋtecne mâreŋ bâfuapo? Irec go mamana sâko moc fogarekacko nazac.

⁵Mozi sosoka‐ticnere sâc moc mutâcne‐narewec, me mozi sâcticne manaocte mucsâc fârewec?

⁶Wâtuŋ wiac‐ticne i wemo wiaczi dopeckeme qiŋ herâ domakac? Me mozi bâpiŋ jaŋe ʒeri gae hehapie â Anutu aŋelofâcne jaŋe kiwac qawac ehuc semuja hehapie jâmâ wâtuŋ‐ticne râeme huwec?

⁸“Hâwec sâko e mâreŋmaŋkonec qâcqâc qahuc wefume mozi fofo‐ticnao foocte kanaŋ hecnewec?

⁹Noni hâcne hâweŋzi foŋkehuc karoraczi rufacnepo.

¹⁰Noni hâcne hâwec maticne bafârepo, ehuc motâc hecnehuc basanaŋkepo.

¹¹Erâ wâc nonizia ʒiŋuc âzâcnepo: ‘Go ʒira ware mickezemec, ʒira hâcne siri sâkogezi bazuhuc fozejec.’

¹²“O Hiobe, go ɋiegaonecteaŋ fuŋkerâ juwefuhuc mutec hae moc furewec me?

¹³Me goki mutec hae fureme tatamaczi mâreŋ sâcke‐fâreha ŋic sindaŋne jaŋe haesoŋ‐jeŋickonec moc wahambiŋ me?

¹⁴Ʒoaŋ tatamacko mâreŋ wâcne facne jaŋe qoruc hawari biaŋ irec sâc fua tâcneeŋgopieŋ.

¹⁵Ʒoaŋte tatamaczi ŋic sindaŋne batamaec‐jopahame gie‐jeŋic sâqocne baniŋte quŋkeeŋgopieŋ.

¹⁶“Go hâwec ʒâkâŋ maŋnao hurâ hâwec ʒâŋene moc honemeŋ, me hâwec fâhâŋnao rac warec moc emeŋ me?

¹⁷Me hâmoc hae dapâc qisiric sanaŋ‐ticnehec irec motâc i ŋic moczi moc gowatuwec me?

¹⁸Mâreŋ sâko mâreŋ irec sâc weniŋuc fokac i go moc manakomec me? Go wiac mukopac sasawa irec fuŋne moc manakicko dâŋ okacne bâtikie‐narec.

¹⁹“Ʒoaŋ tatamac i wenirec ware fuaekac, â dapâc qisiricte qizecne wena fokac i go moc manakomec me?

²⁰Jahe wena ra mickenicmu i goki sâcne jasa jofatuc ecmu? Me sâcne bârisiec‐jofacmu?

²¹Go wiac i sâcne efârecmu, i no manakopac, go ʒiŋuczia ŋicqizec jâmbâŋ jukomec, erâ go juhaŋtecne jaha mâreŋ sâko mâreŋ bâfuapo i!

²²“No sinou â aisi hândâŋ râe guruc eekopac situâc ficnane i go moc ra honemeŋ me?

²³No wiac i ʒârâ hâriŋ â ʒika dameŋte biŋe bâmockerâ râe guruc eekopac hâcne.

²⁴Ʒoaŋ wefuekac â mura mâŋâŋzi fuŋkerâ qawareku fisiekac go hae hata ira moc rameŋ me?

²⁵“Mozi hoe micsâkore wâc moc bawec, me mozi ɋuŋ parandaŋte hata bâʒâwewec?

²⁶Me mozi mume hoezi ŋic mi jujuo tuhu mâreŋko heekac?

²⁷Me mozi mâreŋ hâfu roroc ekicne i bâgunuckeme sopâc kecɋaŋ wefuekac?

²⁸“Hoere mamac moc jukac me? Me mozi maniŋ titikucte mamac bâbâfua ekac?

²⁹Aisi â titikuc i mo neŋgocte bumaŋkonec fuame opâ sasawa jaŋe sanaŋkerâ qânâ iŋucne eeŋgopieŋ â hâwec fainezi aisi efâreekac?

³¹“Go demeŋ ɋafâc jaŋe sâcne dâtâc‐jopacmu? Me bobiri ʒâʒâfic‐ticne sâcne goroŋkecmu me?

³²Goki mutec bâpiŋ sasawa jaŋe dameŋ‐jeŋicko fua soŋ eniŋmu? Me mombaŋ bâpiŋ neŋgoc motec jaŋere hata sâcne jaza jowatuc ecmu me?

³³Go karoracte mumutâc fokac i moc manakicko ine mutec mâreŋte biŋe wâc sâcne eocmu me?

³⁴“Go karorac giedâŋ mucnetec gâpârehuc hoe erâ waha sâcne hembânâŋguocmu me?

³⁵Me bâbâriczi bâricneocte âzâcnetec sâcne waha fua‐garerâ ʒiŋuc gazaocmu: ‘No gore kiŋaŋ qapemurâ warekopac hâcne?’

³⁶Opâ rumi fisiocmu i mozi gararaweŋ wipe jazame manaeŋgopieŋ? Me hoe heocmu i mozi qâqâc ŋicne jaŋe mufua‐jareme manaeŋgopieŋ?

³⁷Maŋɋârâŋhec moczi karorac sâcne woseocmu me? Me mozi karorac herisierâ hoe hoŋkeme wahame

³⁸mâreŋzi qâhâckerâ bobohotac eekac?

³⁹“Laioŋ jaŋe qânâ hawec‐jeŋicko fohapie me sopâc uupicko ruc bahuc juhapie kâcɋene jaŋere nânâ sâcne bâfuacmu me laioŋ motecne jaŋe nânâ gumec‐jopatec nâ gapec sâcne eniŋmu me?

⁴¹Kâec kâec jaŋe nânâre hâmohuc sawao rac warec ehapie me motecfâc‐jeŋic jaŋe nânâre numu‐narepie mozi nânâ wiac‐jeŋic bâfua‐jareekac?