Hiop 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Mürin, ewe Samol mi Lapalap a pälüeni Hiop seni lon ewe mölümöl o apasa,

²“En iö pwe ka afatangaua ai kapasen öüröür ren kapas esap wor mirit lon?

³Kopwe ütä o tipeni tipen mwän. Ngang üpwe aisinuk, nge en kopwe pälüeniei.

⁴Ia ka nom ie, lupwen üa föri longolongun fanüfan? Kopwe üreniei ika ka weweiti.

⁵Iö a filätä aükükün ika iö a selipichi? Ifa usun, ka silei?

⁶Met ekewe üren fanüfan ra fot won? Ika iö a isetiu ewe föün lepwokuku,

⁷lupwen ekewe fün lesosor ra kölfengen, nge nöün Kot kewe chon läng meinisin ra mweireir fän pwapwa?

⁸Iö a apüngalong matau lon lenian, lupwen a puwu seni leutun fanüfan?

⁹Ngang ewe mi pwölüela matau ren kuchu o filiti ngeni rochopwak.

¹⁰Üa aükü kiännin matau o föri asaman me amwöchün.

¹¹Üa apasa, ‘Iei ükükün toauom, nge kosap lu seni. Om kewe no mi pöchökül repwe kaüla ikei.’

¹²Ifa usun, Hiop, ka fen allük fän eu lon ränin manauom pwe epwe ränila o aiti ngeni mallen rän lenian,

¹³pwe epwe amwöchü lesopun fanüfan o asupala ekewe aramasangau seni?

¹⁴Saramen akkar a apwäöchü uluulun fanüfan usun pwäöchün maken impwang won pwülüpar, a pwä lapalapan usun a pwä lapalapen eu üf.

¹⁵Saramen lerän a kon saram ngeni ekewe aramasangau, iei mine resap chüen tongeni föri ar föföringau.

¹⁶Ifa usun, ka fen tori ekewe puächen matau ika ka fetal won epin matau?

¹⁷Ifa usun, eman a fen aküna ngonuk ekewe asamalapen mäla, ika ka fen küna ekewe asamalapen rochokichin rochopwak?

¹⁸Ifa usun, ka weweiti watten fanüfan? Kopwe üreniei are ka silei ekei mettoch meinisin.

¹⁹Ia a nom ie ewe al mi alela ngeni ewe lenien saram? Nge ia a nom ie ewe lenien rochopwak?

²⁰Ifa usun, ka tongeni emweniir ngeni lenier, ika ka silei alen lenier?

²¹Ewer, en ka silei pwe ierum ra fokun chomong, pun ka fen uputiu, lupwen fanüfan a fis.

²²Ifa usun, ka fen tolong lon ekewe imwen iseis sno, ika ka küna ekewe imwen iseis ütten fau?

²³Üa amoleretä fän iten ewe fansoun osukosuk, ewe fansoun fiu me maun.

²⁴Ifa alen ewe leni ia saram a tötä me ie pwe epwe tinfeil? Ika ia ewe asepwälin ötiu a enifeil won fanüfan me ie?

²⁵Iö a tuw eu warawar fän iten ewe üt mi püngümong o föri alen ewe inefi fiti chopulap?

²⁶Iö a apüngätiu üt won eu fanü ia esap wor aramas ie, won eu fanüapö esap so?

²⁷Iö a achöchönü ewe fanü mi pwasapwas o pön, pwe fetil epwe märitä?

²⁸Ifa usun, a wor semen ewe üt, ika iö a nöünätiu chiin amwurenipwin?

²⁹Iö inelapen ais, nge iö a nöünätiu sno seni läng?

³⁰Ekewe koluk ra pöchökülela usun fau, nge won ewe matau a föüla.

³¹Ifa usun, ka tongeni rifengeni selin ewe mwuchiechien fü iter Mweriker, ika apichi selin ewe fü itan Öniön?

³²Ifa usun, ka tongeni alinga ekewe mwuchiechien fü lon ar fansoun, ika alinga ekewe fü iter Uwölö me Tämailapen efeng?

³³Ifa usun, ka silei akoten läng? Ifa usun, ka tongeni anüküchara än Kot nemenem won fanüfan?

³⁴Ifa usun, ka tongeni kökkötä ngeni ekewe kuchu pwe püngümongun üt epwe püngütiu womw?

³⁵Ifa usun, ka tongeni tinala ekewe inefi pwe repwe fiila, repwe feito reöm o apasa, ‘Äm ikei?’

³⁶Iö a atolonga tipachem lon letipen aramas, ika iö a atolonga weweöch lon ar ekiek?

³⁷Iö a tipachem le aleani ekewe kuchu? Iö a tongeni äpea ekewe lenien koluk mi nom läng pwe repwe niitiu won fanüfan,

³⁸pwe ewe pwül moromor epwe pwakakala, nge ekewe föün pwül repwe pachfengen?

³⁹Ifa usun, ka tongeni liapeni ochän ewe laion, ika amötü ekewe nienifön laion, lupwen ra echik,

⁴⁰lupwen ra op lon lenier ika asousoula lon pwanger?

⁴¹Iö a amongöni ekewe ängä, lupwen ra äsfeil ren ar echik, lupwen apaner kana ra siö ngeniei, pun esap wor ener mongö.