Job 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Bab-Dummad burwa-ooreged-bipirmaknaidba Jobʼga sunmakded. Weyob ega sogded:

²“¿Be doasunna? Emide be, an-binsaed-nikarbadgi be bengunaigu. Emide be, binsaedsuli sunmaknaigu.

³Be an-abin gwisgudena, an bese egisodo, bule be an-abin-imakodibe.

⁴”An napneg-e-sailamar-urbenaigua, ¿bia be gudiinsunna? ¡Anga be sogena, be nue-ibmar-wisye soged!

⁵¿Doa napneg-naid-e-dungued imaksa? ¿Doa napneg-dungued wilubdaknai gusa?

⁶Napneg-e-sailamar, ¿ibu-birgi bukwasunna? ¿Doa degite, e-akwasaila sisasunna?

⁷Deunni, niis-buksurmar namaknanaigu, degi, baliwiturmar yeer-itogedba oichomaknanaigu, ¿be gudii? Be gudisulid, be sated.

⁸”Deunni, demar napagi-nagudgua, ¿doa ega abingued-igar mesissunna?

⁹An demargala moryobi mogirmar nasiksagua, degi, ega garsonyobi mogirmar-gudureged nasiksabargua, ¿be gudii?

¹⁰Ani an demarga abingued-igar nasiksagua, yawagak-dummaganyob ega an nasiksagua, e-yawagakgi yabiyob ega an nasiksabargua, ¿be gudii?

¹¹Demarga an weyob sogsagua: ‘Wese be warmakoed, bar be naosurye. Be-daomakedi, wese iirmakbukwa guoye,’ ¿deunni be gudii?

¹²”¿Negmeegwad-naguega bolegoedga be sogsa, naguye?

¹³¿Negmeegwad bela napneggi-naguye be sogsa, adi, dule-isganamar magar daklegegar?

¹⁴Neg-meegwadbali napneg-e-yar-mullugana magar daklenonidaed, e-daklegedi morgi-morgomar-akar-akar-odolesayob daklenonidaed.

¹⁵Degidbali, dule-isganamar negmeegwad-abin ambikuosurmalad, dule-isgana-e-garganguedi, bela bergunonikoed.

¹⁶”¿Ar be wila-arad-naid-solase be aideapi? ¿Bela be dii-ulakbali bipirmaksa?

¹⁷Deginbali, ¿burgwed-negse be aideapbali? ¿Dule-burgwarmalad-e-galuse be arbi?

¹⁸¿Napneg-dungued be wisi? Ar be we-ibmar nue-wisile, degite, be anga sogdo.

¹⁹”Deginbali, ¿be wisbali, bia gwallu-meegwad-neg sii? ¿Be wisbali, bia negsichid-neg sibali?

²⁰¿Sunna be we-ibmarmar e-igarmarba-moed be imake? ¿Sunna be gannar e-negse sedabali?

²¹Be wisirgebed, ar be deunni bato be gwalulesargebed. Ar be dikasurgus gudisursi.

²²”¿Ar dambed-sibudikmalad-sabolebukwad be dakapsi? ¿Dii-ologan-akwaga-binyarmalad-sabolebukwad be dakapsi?

²³An dii-ologan-sabolebukwadi, naibid-dummad-ibagi-ebugega an sabobukwad. Degi, bila-onoged-ibagangi-ebugega, urweleged-ibagi-ebugega an sabobukwad.

²⁴¿Be wisi, negmeegwad bia noardae, degi, igi nasguddae? ¿Be wisi, dad-nakwedsik-burwa-goled igi onoardae?

²⁵”¿Be wisbali, doa dii-dummad owie? ¿Doa dii-dummadba-mesa mar-ogollomakmai imake?

²⁶¿Doa nega-dulesulidganba dii owie? ¿Doa dule-buksurmaladba napaneg oge?

²⁷¿Doa gaganmar-aradik-oniega, dii owie? ¿Doa napa-dutuu-imakega, dii owie?

²⁸”¿Dii-wiedde bab nikasi? ¿Doa boo ogwalulesibali?

²⁹Be anga sogena, ¿bia dii-gwamakaled soblesii? ¿Doa dii-sibudikid onisibali?

³⁰¿Doa dii akwayob-dutusuli imake? ¿Doa demar-dummad-naid osatelegega imake?

³¹”¿Sunna be niisgwamar-Pléyadesʼye-nugad danar-danar-naguega imake? ¿Sunna be niisgwamar-Oriónʼye-nugad aisakiega be imake?

³²¿Sunna be bolegoedba niisgwamar-danar-danar-nanaid, e-wachiba-onogega be imake? ¿Sunna be niisgwamar-Osa-Mayorʼye-nugad, degi, Osa-Menorʼye-nugad nabir-bipirmakega be imake?

³³¿Be nibneg-seleged-igarmar-mamaid, be wisi? ¿Sunna be a-igarmar-mamaidba be napneg see?

³⁴”¿Sunna be mogirga sogsale, begi dii-dummad owiye?

³⁵¿Be-sogedba mar gotedae? ¿Be sunmakdele, bebali mala yoga ibsaardae?

³⁶Degite, be anga sogdo, ¿doa gannir-macheredga binsaed uksa? ¿Doa sikwi-gikamarga binsaed daksa?

³⁷¿Sunna be mogirmar ebise? ¿Doa napamar-sergudele, dinnaa nadele,

³⁸dutuu-imakegala dii owie?

³⁹”¿Sunna be achumigurmarga masgunned amie? ¿Sunna e-mimmigan masgi be omae?

⁴⁰Achumigur e-negyaba dukumamaile, sapur-yaba masbina gudimalale, ¿sunna ega be mas amie?

⁴¹¿Ar bee be sikwisichimar masgi omae? E-burwigana yoggusgudimalale, degi, mas-satedba ukudmaad-gudiidba, anse gordimalale, ¿ega be mas amie?”