Job 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Wal brom det saiklon YAWEI det trubala God bin tok langa Job,

²“Wotfo yu oldei tok detmatj wen yu nomo sabi enijing?

³Yu gitredi blanga luk mi feis du feis na. Yu reken yu gin ensim ola kwestjan mi askim yu?

⁴Hau aibin meigim dijan wel? Yubin deya wen aibin meigim dijan graun?

⁵Yu sabi hubin spredimat en meshurum dijan wel?

⁶Wanim holdimap dijan graun blanga jidan gudwei? Hubin lainimap ola ston langa ola kona langa dijan wel?

⁷Ailibala langa det taim na ola sta bin sing, en ola einjul bin preisimbat mi gudbinjiwei.

⁸Hubin meigim det solwoda stap langa im ronwan pleis,

⁹en bin gaburrumap det solwoda garram klaud?

¹⁰Wal mi na. Aibin bildimap haibala wol raidaran langa det solwoda, en aibin lokimap det geit.

¹¹En aibin tok, ‘Tharran strongbala weib blanga yu garra stap iya na! Im kaan gopas!’”

¹²Wal YAWEI bin kipgon tok langa Job, “Yu reken yubin dalim tharran san blanga gidap, en imbin lisin langa yu?

¹³Yu reken yubin holdim dijan wel en meigim im sheiksheik blanga meigim ola nogudbala pipul buldan jis laik wen yu sheikim das brom bleingkit?

¹⁴Wal wen det san gidap yu gin luk detlot hil brabli kliyawan, jis laik wen aibin peintim detlot.

¹⁵Detlot wikitmen laigim blanga wokaran ebri naitaim bat dei nomo laigim det deitaim, dumaji dei oldei lujim olabat pawa blanga dumbat ola nogudbala ting.

¹⁶Job, yubin godan en wokaran raitdan langa bodam langa det solwoda?

¹⁷Yubin luk tharran geit weya ola dedbala pipul oldei go thru?

¹⁸En hau big dijan wel? Yu dalim mi if yu sabi.

¹⁹Yu sabi weya det lait kaman brom en yu sabi weya det dakbala kaman brom?

²⁰Yu reken yu gin deigimbek dubala langa dubala raitwan pleis?

²¹Ai reken yu gin dum tharran, dumaji yubin olredi bon langa det taim wen aibin meigim ebrijing, indit?

²²Yubin deya langa detlot pleis weya mi oldei kipumbat ola sno en ola heilston?

²³Ai kipum olabat deya blanga yusum blanga panishimbat en teikoba ol difrinwan kantri.

²⁴Yu sabi weya tharran laitining im kaman brom, en weya det win brom sanraiswei bin go?

²⁵Hu yu reken bin meigim det wei blanga det thanda stom? Hubin jandimbat detmatj rein

²⁶langa detlot draiwan pleis weya nobodi jidan?

²⁷Hu yu reken meigim det rein weya oldei tjeinjim det draiwan kantri en meigim det gras gro brabli longwan en jidan brabli grinwan?

²⁸Hu det dedi blanga det dyu en det rein?

²⁹Hu gibit laif langa det brabli kolwan rein

³⁰weya im buldan kolwethataim, en detlot riba en bilibong go brabli aisiwan jis laik rok?”

³¹Wal YAWEI bin kipgon tok, “Yu gin meigim detlot sta gulum Sebensista en Sospen jidan gudwei garram olabat grup?

³²Wal yu reken yu gin wekimat detlot sta en pudum olabat langa olabat rait pleis, detlot sta gulum Bigwan Dipa en Lilwan Dipa?

³³Yu reken yu sabi detlot lowa blanga hebin? En yu reken yu gin meigim olabat jidan bos blanga dijan wel?

³⁴Yu reken yu gin dalim detlot klaud blanga jandimdan bigmob rein,

³⁵en det laitining gin lisin langa yu wen yu dalim im blanga dum?

³⁶Yubin titjimbat ola bard blanga sabi wotaim det rein en fladwoda garra kaman?

³⁷Yu reken yu gin kaundimap ola klaud o meigim ola rein buldan

³⁸langa ola buldas en meigim brabli madiwan?

³⁹“Wen detlot laiyan jidan hanggriwan yu go en album olabat hanting blanga olabat daga?

⁴⁰Yu jandim ola enimul langa olabat kemp?

⁴¹En wen detlot lilwan kro jidan hanggriwan en olabat oldei jingat langa mi blanga daga, yu oldei gibitbat olabat daga blanga meigim olabat sedisfaid?”