Yuba 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Nayi, Alatala yi Yuba yabi wuluwulu gbeeni, a naxa,

²“Nde i tan na naxan n ma fe ragidixine yidimima a xaxilitareya falane xɔn?

³Keli, i yitɔn alo xɛmɛ wɛkilɛxina, n xa i maxɔdin, i yi n yabi.”

⁴“I yi minɛn yi n to yi bɔxɔn bɛtɛn sama? A yɛba n xa, xa i ɲɔndin kolon.

⁵Nde dunuɲa danne sa, i na kolon ba? Nde lutini bandun a yi a maliga?

⁶Bɔxɔ xɔnna bɛtɛn saxi nanse fari? Nde a tongon gɛmɛn dɔxi,

⁷xɔtɔn ma sarene to yi bɛtine bama, Alaa malekane to yi gbelegbelema sɛwani?”

⁸“Nde fɔxɔ igen balanxi alogo a xa a raxara a dɔxɔdeni, a to yi minima a dadeni?

⁹N yi kundaan findi a dugin na, n yi kunda fɔrɛn findi a mafilin dugin na,

¹⁰n nan n ma sariyan sa a ma, n yi a danne sa, n to yi dɛɛne nun balan seene sama a ma.

¹¹N yi a fala fɔxɔ igen xa, n naxa, ‘I fama nɛn han be, i nama dangu be ra. I mɔrɔn gbeene danma be nin yati.’ ”

¹²“I bata yamarin fi xɔtɔnna ma i ya siimayani ba, hali sanɲa ma keden pe? I bata a miniden yita subaxan na ba,

¹³alogo a xa bɔxɔn suxu a danne ma, a yi a yimaxa, a yi ɲaxudene kedi?

¹⁴Sogen na te, a yi bɔxɔni yalan, a yigbɛ alo yii fɔxɔn bɛndɛni, a kɛnɛnna yi so dunuɲa xun na alo dugina.

¹⁵Koni, ɲaxudene kumama nɛn e waxatin na, e sɛnbɛn yi kala.”

¹⁶“I bata siga ba han fɔxɔ igen xunna? I bata i masiga ti fɔxɔ igen tilinna ma?

¹⁷Laxira so dɛɛne yita nɛn i ra ba? I sayaan so dɛɛne to nɛn ba?”

¹⁸“I bɔxɔna gboon yatɛn kolon ba? A fala n xa, xa i na feene birin kolon.

¹⁹I kɛnɛnna dɔxɔden kolon? I a kolon dimin konna dɛnaxan yi?

²⁰I nɔɛ e bɛ e yirene yi? I e konna kiraan bayen kolon?

²¹I lan i yi a kolon, to mi i tan naxan da.”

²²“I bata siga han ige xundin namaran dɛnaxan yi ba? I bata balabalan kɛsɛne ramaradene to ba?

²³N ne dɔxi gbalon waxatine nan yɛɛ ra, e nun sɔnxɔ nun yɛngɛ lɔxɔne.

²⁴I a kolon ba kɛnɛnna minin kiraan naxan xɔn? I a kolon ba sogetede foyen kelima dɛnaxan yi?”

²⁵“Nde kiraan nabaxi tule igen xa? Nde kiraan yitaxi kuye sarinna ra?

²⁶Nde tulen nafama bɔxɔn fari muxu yo mi dɛnaxan yi, e nun tonbonni muxe mi dɔxi dɛnaxan yi?

²⁷Nde igen nafama yire xarene ma, alogo sɛxɛn xa sabati?”

²⁸“Tulen fafe na ba? Nde xiila barixi?

²⁹Ige xundina nga na ba? Nde xunbenla barixi?

³⁰Igen xɔdɔxɔma alo gɛmɛna, ige xundin yi sa fufaan xun ma.”

³¹“Nde nɔɛ sare kuru Dii Tɛmɛ Soloferene yɔlɔnxɔnna tugunɲɛ? I tan nɔɛ sare kuru Donsona lutin fulunɲɛ ba?

³²I nɔɛ sare kurune raminɛ e waxatini ba, i yi sare kuru Kanko Gbeen nun a diine rasiga ti?

³³I a kolon ba yanban seene koreni sigama sariyan naxanye ma? I tan nan yanban seene sɛnbɛn nawalima bɔxɔn ma ba?”

³⁴“I xuiin tɛ han kundane ma kore xɔnna ma ba, i yi e yamari a tulen xa fa i ma?

³⁵I tan nan kuye sarinne rasigama ba, e yi a fala i xa, e naxa, ‘Nxu tan ni i ra?’

³⁶Nde fekolonna saxi muxun bɔɲɛni? Nde xaxilimayaan fixi a ma?

³⁷Nde nɔɛ kundaan yatɛ a xaxilimayaan xɔn? Nde nɔɛ ige sa seene xun sinɲɛ kore,

³⁸gbangbanna yi findi boron na, bɔxɔn kobelene yi dɔxɔ e bode ra?”

³⁹“I tan nan donseen soma yata gilɛn yii ba? I tan nan kamɛn bama yata sɛnbɛmane ma ba,

⁴⁰e nɛma sa e yinla kui, hanma e nɛma luxunxi subene yɛɛ ra?

⁴¹Nde donseen soma xaxaan yii, a diine na e xuini te Ala ma, a na siga na xun xɔn donse fendeni?”