Əyyub 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹O zaman Rəbb qasırğanın içindən Əyyuba belə cavab verdi:

²«Məsləhəti savadsız sözlərlə qaranlığa salan bu kimdir?

³İndi kişi kimi belinə qurşaq bağla, Sual verəcəyəm, Mənə cavab ver.

⁴Mən yerin təməlini qoyarkən haradaydın? Anlayışın varsa, söylə.

⁵İndi ki bilirsən, De görüm, yerin ölçüsünü kim qoydu, Yaxud yer üstündə ölçü xəttini kim çəkdi?

⁶Nəyin üstündə onun təməlləri quruldu? Kim onun guşədaşını qoydu?

⁷Onda dan ulduzları birgə nəğmə oxuyurdu, Bütün ilahi varlıqlar sevincdən haray salırdı.

⁸Dəniz bətndən çıxıb fışqırarkən Onu qapılar arasında kim bağladı?

⁹Ona buludları libas, Qatı qaranlıqları qundaq etdim.

¹⁰Onun sərhədini çəkdim, Qapı və cəftələrini qoydum.

¹¹O vaxt dedim: “Buraya qədər gəlib o tərəfə çıxmayacaqsan, Qürurlu dalğaların burada dursun”.

¹²Sən ömründə səhərə buyruq verdinmi? Şəfəqə yerini göstərdinmi?

¹³Belə ki yer üzünün ucqarlarını tutsun, Üstündən pisləri çırpıb atsın.

¹⁴Torpağın quruluşu dəyişir, Möhür vurulanda palçıqda əksi qalan kimi, Libasdakı qırışlar kimi gözə görünür.

¹⁵Pislərin nuru batırılar, Qaldırdıqları qolları qırılar.

¹⁶Dənizin mənbələrinə getmisənmi? Dərinliyin dibində gəzmisənmi?

¹⁷Ölüm dərgahı sənə göstərilibmi? Ölüm kölgəsinin qapılarını görmüsənmi?

¹⁸Dünyanın həcmini dərk edə bilirsənmi? De görüm, bunların hamısını bilirsənmi?

¹⁹İşıq məskəninə gedən yol haradadır? Qaranlığın yeri haradadır?

²⁰Onları yerlərinə apara bilərsənmi? Evlərinin yolunu bilirsənmi?

²¹Əlbəttə, heç nə anlamırsan, Çünki onlarla eyni vaxtda doğulmusan! Yaşın bu qədərdir.

²²Qar anbarlarına girmisənmi? Dolu anbarlarını görmüsənmi?

²³Mən onları dar gün üçün, Döyüş və müharibə günləri üçün saxlayıram.

²⁴Hansı yolla işıq yayılar, Yer üzündə şərq küləyi qopar?

²⁵Kim sellər üçün arx, İldırım üçün yol açdı ki,

²⁶Kimsəsiz yerləri, İnsan yaşamayan çölləri sulasın,

²⁷Səhralar – biyabanlar doyunca su içsin, Yaşıl ot bitsin?

²⁸Yağışın atası varmı? Şeh damlalarını kim yaratdı?

²⁹Buz kimin bətnindən çıxdı? Göylərdən düşən şaxtanı kim doğdu?

³⁰Sular nə zaman daş kimi bərkiyir, Dərinliklərin səthi donur?

³¹Ülkər ulduzlarını bağlaya bilərsənmi? Orionun bağlarını aça bilərsənmi?

³²Hər bürcü öz vaxtında çıxara bilərsənmi? Böyük, Kiçik Ayı bürcünə yol göstərə bilərsənmi?

³³Göylərin qanunlarını bilirsənmi? Allahın hakimiyyətini yer üzərində qura bilərsənmi?

³⁴Başına bol yağış yağsın deyə Buludları səsləyə bilərsənmi?

³⁵Şimşəkləri göndərə bilərsənmi getsinlər, Sənə də “bax buradayıq” desinlər?

³⁶Kim ürəyə hikmət qoydu, Dərk etmək üçün şüur verdi?

³⁷Kim buludları ağılla saya bilər? Göyün tuluqlarını kim boşalda bilər?

³⁸Onda toz yatıb yer bərkiyər, Kəsəklər bir-birinə yapışar.

³⁹Dişi aslanlar üçün ov ovlaya bilərsənmi, Gənc aslanların qarnını doyura bilərsənmi

⁴⁰Yuvalarına girəndə, Kolluqda pusqu quranda?

⁴¹Kim qarğaya yem verə bilər Balaları Allaha fəryad edəndə, Acından vurnuxanda?