Jopo 38

1

2

3

4

5

14

19

31

38

39

40

41

42

¹Porambaiye minyuo apu epeyamo dokona rakapana Kamongo dokome Jopo pii lamaiya. Kamongo dokome letamo.

²Emba apimi nambana singinya renge dokona piso serese? Emba pii kapa palya nao kekenge pii lenge akali dake.

³Angi akali karenge doko suu pyao roya karapala nambame piso singi pii pisaro dokopa isingi yano pyape.

⁴Nambame yuu muu dupwa wasiyu dokopa emba dokona kareese? Dokona kando siinde ramo doko dopa pyuo lao kandee lao polo langipi.

⁵Yuu kameya apiyakale serale lao apimi suu piyase? Dee apimi yuu liti dupwa makande pyuo kandeyase? Pii dupwana isingi peparae kapa langirisi?

⁶Yuu doko akimi pingi pyaro karase? Dee yuu muu pinjingi dusipana kaname paka pyaro karamo doko apimi kareyase?

⁷Yuu gii yangama dokopa bui dupwa kenane pyao nyuo malu palyiyaminyi dokopa yake panda karenge dupwa rae maiyuo pii porakaeyo ketae leyami.

⁸Ipwa kota doko singi dokona soo neta yuunya epa nana lao apimi kambu kii minyaro kareyase?

⁹Namba dokome ipwa kota doko iminjingi dupwame nyuo yaki pipala kopa dokome yambe piyu lyakande.

¹⁰Ipwa kota liti piramo yuu pinjingi dupwa nambame rombo palyuo reteyo. Retapala kame pyuo kii palyiyu.

¹¹Dopa pipala nambame ipwa baa lamaiyuo, Dake kapa andakele pee lao sepeleneŋe dee kamame andake ingyuo puŋu paŋu lao soo paa napala dakena banya kasakole minyuo pondoma pingi renge doko yaki nyuo liti pinya, leyo.

¹²Jopo emba ando karene yuu gii dusipana yuu yangelyamo doko dopa pyuo yango rali pinya lao lamaisi?

¹³Embame yuu yango neta koo epelyamo dokome yuu muu doko minyarala nyepala minyaro karo wambu koo yalu pyuo karaminyi dupwa minyuo walu walu lakana lao lamaisi?

¹⁴Yuu yangelyamo dokopa yuu kungu rapu kukipi lama lamape dupwa liti pira pira pyuo rombo palyuo pano singi.

¹⁵Yuu yango neta rao yanga paupau lenge dokome wambu yulu koo pingi dupwa pii nana lao neta ranyi pyambungi.

¹⁶Emba ipwa kota doko guu lenge dokona pengese? Emba ipwa kotana isa panda dokona kimbu warendo kalyo pengese?

¹⁷Mendemepe emba yuu iminjo kondo kondo lenge kumungi panda dokona rapu pingi kame kii doko lasaka pingisi?

¹⁸Yuu dake andakepe panda kukipi apiyakale lao silisi? Sere ramo doko namba langipi.

¹⁹Yuu yanganyi peengepe iminjinyi peengepe dolapo anja piso epelyamo lao emba silisi?

²⁰Embame dolapo anjali pao liti pipala kala pena lao larese?

²¹Doo leto dupwa piri lao sepala leto. Renge doko yuu muu dupwa wasiyunu dokopa akali andapae dopale doko karenge karo pii lao silyu.

²²Nambame randake kapape apupi dupwa retenge panda doko emba pao kandengese?

²³Randa eparamo yuu giipi yanda pela paraminyipape dopalena rapa rapa pyuo dopalena suu pyao retenge.

²⁴Emba poraiya minyuo epenge kata dorena piso neta pyakaeyo epenge mare dokona pengese?

²⁵Apimi apu epena lao suu nyakamingisi dee apimi yuu gala lao poraiya andake dokona lao kata wapwakamingisi?

²⁶Yuu wambu pali nange dupwana apimi apu epo pena lengese?

²⁷Apimi yuu oo lasi ipwa epa nangepe dupwa isoko andena lao ipwa pingisi?

²⁸Apu pipyaepe dolapo nakambana rakange mende karengese?

²⁹Bange randake kapa yale ase lenge dokome ipwa dupwa kapu kyuo kana inginyi pyambuo dee ipwa kota dupwa manda ranyi pyambuo pingi dokona endangi doko apisi?

³¹Bui kingi Pelaetese lenge lapo karaminyi dupwa embame nyuo kambwa pyao mendakyapala bui kingi Orayone lenge karenge dupwana panda doko dopako pyuo nyuo alowa pingisi?

³²Ee kana lyakange dupwana bui dupwa embame rapu pyuo pingisi? Embame bui kingi Mena Beya Kameya Beya Kukipi lenge dolapo dusa pena dusa pena lao lamaingisi?

³³Yake panda dopa pyuo sinya dopa pyuo sinya lao minyaro silyamo doko apa pipala silyamo lao emba singisi? Dee embame dopale ingyuo yuu dake wasarese?

³⁴Embame kopa dupwa kando pii poraiyuo lapala emba rombe lalana apu epena lao lamaingisi?

³⁵Embame yuu pele pinya lare ramo dokopa dokome emba karare dokona epapala namba embena kendemande pingi emba letene dopa pyuo piru, larase?

³⁶Apimi ipwa Naele pona dokona yaka kingi aipisi lenge yaka omani yale petamo doko ipwa andake palipyamo lao lamairase? Panda yaka kola kali doko apu epelyamo lao apimi lamairase?

³⁷Api mende soo gisingi mendeme kopa dupwa yaka lapala nyuo

³⁸kapu kyuo apu dokome sinjimu dupwa soo yuu inginyi pyambuo epenge dopa pyuo epena lao pirase?

³⁹Mena laene dupwa nakamana palenge anda dokona isaro palenge dokopape nakamana kananda dupwana yalu piro singi dokopape

⁴⁰embame mena laene dupwana nenge nena lao kotakamyuo laene yakane lopo karenge dupwa nenge sikya pyuo nena lao maiyuo pingisi?

⁴¹Yaka orapene lenge dupwa lopo ralo karengepe dee yakane dupwa namba kando lopoe lenge dokopape wambu apimi nenge pingisi?