SOHP 38

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹KAUN-O eri ketin sapeng Sohp sang nan melimel ehu, mahsanih.

²Ihs kowe me peikasalki koasoandi kan en ei kupwurokong sang nan omw koasoi en pweipwei oh soh audepe?

³Eri, ma kowe ohl emen, a uhda oh sapeng peidek kat me I pahn wiahong uhk.

⁴Ke mihmihki ia, ahnsou me I kapikada sampah? Sapeng ie, ma ke me loalokong.

⁵Ke ese ihs me koasoanediong sampah mwomwe? Ihs me sohngediong powe mehn sohngpe? Ia duwe, ke ese ihs me wiahda mepwukat?

⁶Dahme kin kolokol uhr kan me kin utungada sampah? Ihs me kin koasoanehdi takai me wia pwukakeimw en sampah?

⁷Nin sohrahn en tepin ahnsowo usu kan wiakihteieu kokoul, oh sapwellime tohnleng kan ngisingiski ar peren.

⁸Ihs me katekatenge oh kolokol perehpen madau, ni ahnsou me e kusukusupekda sang nan kapin sampah?

⁹Iei ngehi me koaduhpwalkihdi madau depwek kan oh kipekihdi rotorot mosul.

¹⁰Ngehi me kilelehdi irepen madau oh kolokol nan dewe.

¹¹Ngehi me mahsanihong madau, “Ke pahn lelete wasaht, ke sohte pahn daulihala! Omw pwuki kan pahn sawapeseng oh tokedi wasaht.”

¹²Sohp, mie pak ehu nindokon omw mour nin sampah wet me ke kamarainipeseng rahn?

¹³Mie pak ehu me ke koasoanehdi pwe marain en dakarada imwin sampah, de itikada aramas suwed kan sang wasa me re kin rukuruk ie?

¹⁴Marain en rahn kin kasalehda dohl oh wahu kan, duwehte likou limilim ehu. sansal duwehte nting ehu pohn pwehl.

¹⁵Marain en rahn nohn lingaling ong aramas suwed akan, oh kin karompwahsang irail en kapwaiada ar tiahk suwed koasukloal kan.

¹⁶Ke iangehr mi ni pwarer kan en nan madau kan? Ke iangehr keid nan kepin madau?

¹⁷Mie me kasalehionguhkehr wenihmw kan me kin perepere sahpw rotorot en me melahr akan?

¹⁸Ke dehdehki uwen laud en sampah? Eri, ma ke dehdehki mepwukat koaros, a sapeng ie oh ndahdo.

¹⁹Ke ese ia wasa marain kin kohsang ie, de tepin rotorot?

²⁰Ke kak kasalehiong ira ididien wasa ira kak lel, de kapwureiradohng wasa ira tepisang ie?

²¹I uhdahn ese me ke kak, pwehki omw mahsang ira, oh omw ipwidi mwohn sampah eh saikinte wiawihda!

²²Ke pwaralahngehr ni imwen nahk kan, wasa I kin nekinekid ie sinoh oh keteu aihs takai?

²³I kin nekinekidohng ahnsou apwal akan, ahnsoun pei oh mahwen.

²⁴Ke iangehr mi wasa ketipin kin dakada ie, de wasa me angin palimese kin ipido sang ie?

²⁵Ihs me weirada dewen keteu mosul me kin mwerediong nansapw, oh koakoahda elen melimel?

²⁶Ihs me kin kamwerehdi keteu wasa me sohte towe?

²⁷Ihs me kin kalamwurih sahpw madekeng kan, pwe dihpw en kak wosada ie?

²⁸Mie semen keteu de semen pwoaik?

²⁹Ihs me naitikihada aihs oh sinoh,

³⁰me kin kahrehiong pihl eh kekeluwakala, oh pahnsed wia-aihsla?

³¹Ke kak salihpene usu kan me adaneki Pliadis, de sapwadada selipen Oraion kan?

³²Ke kak kaweid mwekimwekid en usu kan me adaneki Pehr Laud oh Pehr Tikitik?

³³Ke ese duwen koasoandi kan en mwekid en pahnlahng, oh ke kak kawehwehda lipwen koasoandi pwukat pohn sampah?

³⁴Ke kak wering depwek kan, pwe re en koaduhpwalkinuhkedi pilen keteu?

³⁵Oh ma ke koasoanediong lioal en pir, e pahn dukiong uhk oh nda, “Iet ngehi, I pahn kapwaiada”?

³⁶Ihs me kin ndaiong menpihr me adaneki ipis me Pillap Nail pahn lapakehda, de kihng kan me e pahn keteuda?

³⁷Ihs me nohn kupwurokong pwe en wadekedi depwek kan, oh kamwerehdi keteu,

³⁸keteu me kin kapasapene pwelpar en sampah oh kakeluwakihala?

³⁹Ke kin rapahkihong kenen laion kisin mwenge, oh kansenamwahwihkihla kisin mwengeo nah kan,

⁴⁰nindokon ar kin rukuruk nan dewerail, de wonohn awiawih nan pasarail?

⁴¹Ihs me kin kamwenge menin pahnlahng kan, ni ar kin pipihrseli reperepen kisin mwenge, ni neirail kan ar kin liklikwerikin ie ar men mwengedahr?