1Idi siya di, sinongbatan Diyos si Job babaen si napigsa ay dagem yan kanana,
2“Sino ka ay mangipalawlawa sin sirib ko? Ipaammom sin kalim ay magay ammom.
3Ipailam di kinalalakim ta songbatam din salodsod ko.
4“Intoy kad-am idi insaad ko nan lobong? May kod, mankali ka mo waday ammom.
5Sino di nangikeddeng si lokod na? Sino di nanlokod si kaannawa na? Ammom amin na, ay baken siya?
6Intoy naisaadan din tokod di daga? Sinoy nangiamag sin naisaadana?
7Sin parbangon di agew ay doy, nan-es-esa ay nankanta din tatalaw ya nanbogaw din aanghel gapo si ragsak da.
8“Sino di nangin-eb ta matngel din baybay idi kabala sin oneg di daga?
9Sak-en di nangipabado si liboo sin baybay et nilikomotak si bolinget.
10Insaad ko di beddeng din baybay et sinaradoak din eneb na.
11Et inbilin ko sin baybay, ‘Engganas sa et anggoy di gedeng mo. Iparit ko ay labsan din napigsa ay dalloyon mo din gindeng ko.’
16“Ay inmey ka aya sin obbog sin oneg di baybay? Ay pinadas mo ay nandan sin lanad na?
17Ay naipailan sik-a din segpan di mabolinget ay kad-an di natey?
18Ay ammom di kadakdaken din daga? Somongbat ka mo ammom dana.
19Ay ammom di panbeeyan di pat-a ya bolinget?
20Ay kabaelam ay ipangos daida sin somaaan da?
21Mo siya ay kabaelam, adi pay wada ka sin timpo ay naparsuaan di lobong. Enggay nakanakay ka baw kayman!”
