AYUBA 38

1

2

3

4

5

14

19

31

38

39

40

41

42

¹Akũ Dikiri yã wè Ayubaa zàga'ĩa gũn à pì:

²Dí mɛ́ àtɛn fayasariyã ká ma ↄ̃ndↄ̃laa?

³Ǹ futɛ ǹ zɛ lán nɛ́gↄ̃gbɛ̃ bà, mani n la yãi, ĩni wema.

⁴Kũ ma andunia kàtɛ, ń kú mámɛɛ? Tó ń dↄ̃na vĩ, ǹ omɛnɛ.

⁵Dí mɛ́ à a zĩtɛ lɛ́ sèedaa lɛ̀ɛ? Dí mɛ́ à bàa yↄ̃̀a à gwàa? À de ń dↄ̃ↄ?

⁶Bↄ́ mɛ́ à zĩtɛ kũnaa? Dí mɛ́ à a ɛ̃ pɛ̀tɛ

⁷gↄrↄ kũ gudↄna susunɛnↄn tɛn ayuwii kɛ, malaikanↄ pↄnna wiki dↄ ń pínkii?

⁸Kũ ísira gu fↄ̃̀ à bò, dí mɛ́ à zɛ́ tàtaalɛɛ?

⁹Ma ludambɛ luku dànɛ pↄ́kasa ũ, ma gusira yĩ̀nɛ biza ũ.

¹⁰Ma a lɛ́zɛki dànɛ, ma zɛ́nↄ tàta ma gùrukpanↄ dàdan.

¹¹Ma pìnɛ: Ĩnigↄ̃ ká la ǹsun vĩalaro, n ísↄ̃kɛna gbãnanↄ ni zɛ la.

¹²Zaa lákũ ò n i nà n yã dìtɛ kↄnkↄnɛ yá? N boki mↄ̀ gudↄnaanɛ ziki yá?

¹³Gudↄnaa dì andunia kũ a lɛ́a de à gbãkɛ lán biza bà a yãvãnikɛrinↄ kↄ́tɛ.

¹⁴Àdi andunia litɛ kokũkokũ lán kwã kpɛ bà, kpinↄ dì bo gupuraa lán uta yĩyĩkↄ̃anaa bà.

¹⁵Àdi gí yãvãnikɛrinↄnɛ ò ń gusira yã kɛ, àdi ń ↄ sɛna musu ɛ́'ɛ.

¹⁶N gɛ ari zaa ísira ísɛ̃bokinↄa yá? N táa ò í lòkotoo pìi gãnun ziki yá?

¹⁷Ò ga bĩnilɛ gbànↄ mↄ̀nnɛ yá? N gyãwãn gãnulɛnↄ è yá?

¹⁸N andunia yàasa lɛ́ tàasii kà yá? Tó ń yã birenↄ dↄ̃ pínki, ǹ omɛnɛ.

¹⁹Gupura bɛ zɛ́n máa? Ń gusirakuki dↄ̃ yá?

²⁰Ĩni fↄ̃ ǹ gɛ́ kũńwo ń bùsun yá? Ń ń bɛ zɛ́ dↄ̃roo?

²¹Ń dↄ̃ sàee! À de ò n i gↄrↄ birea! À de n wɛ̃̀ lɛ́ vĩroo?

²²N gɛ̃ laasi kũ ma gu yĩda kàtɛn yá? N ma legũgbɛ dↄ̃̀ↄ è yá?

²³Madì utɛ ari warikɛgↄrↄa, madì gbarɛ zĩ̀kagↄrↄ zĩ.

²⁴Gupura dì bo mámɛ à dagulaa? Ifãboki kpa ĩa dì bo à da zĩtɛla deramɛɛ?

²⁵Dí mɛ́ àdi zɛ́ bo legũ dasinɛɛ? Dí mɛ́ àdi gu para surapũtãnaanɛɛ?

²⁶Àdi mↄtↄ pisi zĩtɛ kũ gbɛ̃ke kunloa, bee gbáranna kũ bisãsiri kunlo.

²⁷Àdi bɛzĩ kũ tàragaao yĩda kũ, àdi tó sɛ̃̀ butɛ gwe.

²⁸Legũ de vĩ yá? Dí mɛ́ à plí ìi?

²⁹Dí nɛ́'isↄn legũgbɛɛ dì bonn? Dí mɛ́ àdi suka i gbasa à kpáa?

³⁰Dí mɛ́ àdi tó í li à kɛ gbɛ̀ ũ à tó ísira musu kɛ kpakparakpaa?

³¹Ĩni fↄ̃ ǹ susunɛ mɛ̀n supplanↄ yĩ ǹ kakara yá? Ĩni fↄ̃ ǹ susunɛ azianↄ fãkↄ̃a yá?

³²Ĩni fↄ̃ ǹ mↄ'azia bo a gↄrↄa yá? Ĩni fↄ̃ ǹ gu mↄ susunɛ ko nɛ́rande kũ a nɛ́nↄnɛ yá?

³³Ń musu pↄ́nↄ doka dↄ̃ yá? Ĩni fↄ̃ ǹ ń ká kpatan zĩtɛla yá?

³⁴Ĩni fↄ̃ ǹ lɛ́ zu legũi de à sisi à í bo à n yaku yá?

³⁵Ĩni fↄ̃ ǹ legũpinanↄ gbarɛ ò da zɛ́n yá? Òdi su ò onnɛ ókↄ̃nↄ dí yá?

³⁶Dí mɛ́ à ↄ̃ndↄ̃ dà ludambɛ lukunↄnɛ à legũ maa? Dí mɛ́ à dↄ̃naa kpà sukaa à kpáa?

³⁷Dí ↄ̃ndↄ̃ mɛ́ à kà à ludambɛ lukunↄ naroo? Dí mɛ́ ani fↄ̃ à musu orozãnↄ kpákasia kɛɛ?

³⁸Tó a í bↄ̀tɛ, bùsu kori dì gↄ̃ bↄkↄtↄ ũ, làkpakↄ̃nↄnↄ dì nanakↄ̃a.

³⁹Mↄkↄ̃mmɛ ndì tofe ká músudanɛ, tó àtɛn nↄ̀bↄ dãdã dàkoo gũn yá? Mↄkↄ̃mmɛ ndì pↄ́ble kpá a nɛ́nↄa ò kã gↄrↄ kũ ò kú ń tòn yá?

⁴¹Tó kãakãanna nɛ́nↄ tɛn likara gui, òtɛn lɛ́ zu Ludai kũ pↄ́ble kĩ̀aḿma yãi, dí mɛ́ àdi pↄ́ble kpáḿmaa?