1Ashiri, yuwash nda chinarana anush kambusur kizpur kambustarangu, anushsha Apanll, Taarashipan Jobaa tsiyatarangiya.
2Tsiyatku tárangiya. ¿Chaksha shiya? ¿Mayaamsha shiy ngutaritish ashiru tsiyataksha? ¿Nitaati shiy nuwaa izuuru yasakish? Nda. Ashirucha, ngutaritish tsiyatkish.
3Ashiriya, ¿kamapari yasareesha itsinsaru kamanichsha? Nuw shiyaa minam k'kuz mashchinllpa. Ashiri shiysha kamaningandama.
4¿Yuwapur tsapurunasee tinarangi anpur shiy yap taarangsha? Izuuru yasakeesha kamaninganda.
5Mishat, ¿shiy yasakish? ¿Chakaja tsapoo ashchiri metorpa tácheeru kasarang? Mishat, ¿chakaja, amb ashiru taachpa, átu tsapoo wayarang?
6Nuw tsapurunasee tinaranguri, ¿tamayareezi mbam wayarangi? ¿Chak tsapurunasee urutari neetsiri taachiya, átu wayaranga? ¿Ndusha nuw ashirangi?
7Nuw ashiranguri, tsangach ichingarusin washunand kis yaseerangusin, nuwapat sundaruri shambatkusin, íwar zamamtar ashiranganaya.
8Kungootssha maree tsapurunasish wantsush tashitungayaru, ¿chak kungoo piyam waanitam taachpa; tsapootssha waanitam taachpa, táranga? ¿Ndush nuw tárangi?
9Msaseetssha ashchiri maree kámanamaam wayarangina. Sheeri, tapeemsha wayarangitamana.
10Anumunsha mar warastakachu, nda arangeem yanumaam tsiyateeri kasarangina. Kizpuritaa warastakchush, nimunari itsipchiya. Arangeem yámcheeja, ndambari, tárangina.
12¿Antaati shiy psaanaa; Natu tarasingi, táyachush, k'keetsish mazinachu, 'sinitara sheeru, zarsha yakatan ashik?
13'Sineetssha tsapurunasee tuwasineeyaru, yutaritshishpan tputs parundama atusin, waptam pangup kanapkanaya.
14Taraseeramchu, zar manginaa kachingakataraa ashkachu, kizpur wanasir chumbeep tshungatara ashkiya.
15Tputs yutaritshishpan 'sinee ngatkusin, ndusha mantsirimshee patatkusin, kasakanaya. Watam tap ndunarshtawa. ¿Shiy anoo antaati kamachtarangish? Nduni. Nuwamari ashirangina. Mishat,
16¿antaati shiy yuwaa mar kung chtayashinu, shtungataru, anush wazawash karuweerush naparangish? Nduni. Shiy ashimaam wanindaja.
17Mishat, ¿yuwaa tputs tsipakchusin, wan shitungeeru, pshtuyarusin taakana, anoo tsiparee taarash shiy yasarish? ¿Yapeeja taak? Mishat,
18¿tsap waninll kapunguri taara, shiy anoo yasakish? Kamapari zurampatartaya yasarush nuwaa kamanitsha.
19¿Zareetssha 'sinee, misha tapeetstam yasarish? ¿Yapee zar káyashinu, 'sin shitungeeshinu, tapeerangitaa tarasitan ashik? Mishat, ¿yapimandtamsha káyashinu yusur tapitan ashka?
20¿Antaati shiy zaree, misha tapeetstam tuzanganirush, yuwaa taarangu anoo kasayaru, piyamsha taarangu yusur washtam wayaycheezish? Nduni.
21Yuwaa nuwaana maachta ichingaru tinarangi anoo shiy yasarush, ashiru nuwaa ¿tsiyatkish? ¿Antaati shiy urutari nllurtamish nuw tsapurunasi tinarangi?
22Mishat, ¿íwarsha kanindash kachizamash wayarangi; sisee iripchimashee anoo shiy parangitamtish?
23Nuw anoo yuwapas tputs waanpatatin mantsir chinakchusin, pachakaktangachinllina, anoo wanimaam wayarangina. Amb waneeship zangankachuri, waani kiyung kachiychinllinpa, aturi.
24¿Yapimandaja 'sin káyashinu tsapurunasish kusak? Kambusursha yap zar shitungku amb káyashinu, ¿tamayshtaja naanataranllu, nish tsapurunasish kusak? ¿Shiy yasakish?
25¿Chakshtaja sinaa tsapurunasip zanganku, kizpurinasha pantsatak? ¿Ndusha nuw ashki?
26Nuwaantamari ashkachuri, apusap yap kung ndunar kizpur puzatanu anoom, sinakchu, kachachtamaam wayakchuri ashkiya.
27Tsapurunasee kachachtakachu, tsap wanasirsha musáseekchu maachi ichingaru kissha kxunkanaya.
28¿Antaati sin, misha sirinatam wapar yuw kamachtaku an taar? nduni. Nuwaantamaricha anoo kamachtakshina.
29Mishat, ¿kachizamash tsapumun kuxinanaru, kizpur kachiz mzeetangat ashku, an wanir taaritam? Nduni. Nuwaantamaricha anoo kamachtakina.
30Mareetssha, ¿chakaja kizpur kachizakchu kungsha, mbamamaam wayarang? Anoo nuwaantari ashimaam wayakina. Min tputs ashimaam wanindaja.
31¿Antaati shiy tsangachee masachee psaan wayayarush, iparxinaru sunlleerutpeeja?
32¿Irunlleetssha shiy wayayarush, sunlleeru tarasitaranll sheecheeja? ¿Antaati shiy tsangacheewaa mbam wayarangush, ndusha pantsaku taak?
33¿Antaati shiy tsangachee ksutamaam waritarish? Nda. Nuwaantamari kanindaa ksutkuri taakina. Mishat, ¿shiy tsapurunasee ksutamaam waritartamtish? Shiy nda ashimaam waninda. Nuwaantamaricha tsapurunasee, kanindpicheetstam ichingaru ksutkina.
34Shiy msasee kuruzkachush, Sinaa sinangi. Tsapoo kachachtangi, táyachush, ¿nitaati shiyaa kukish mazinakchu, sin kapung kanindamand pantsacheeja? Nda.
35Kariyaatssha shiy, Piy minup tsap naayarush, kariytashini, tákchush, kariysha, Ayu, átu, ¿anuritandaja, naayaru, minupsha tsap kariytayach? ndambari.
36Mishat, ¿chak ktashootstam, zamzeetstam manginshuchi, psaan yusamaam chínasheem wanasir wayaranga? ¿Ndush nuw ashirangi?
37¿Tamamaja tputs, mang' kapung taaru nee msasee táchich? Mishat, ¿chakaja msasee, Piy arap naayarush, sin pantsatachpa, tákchu, nduniya ashiru, ningitamsha sinangcha, tákchu, sinsha anuritam sinach?
38Sin sinakchu, tsapsha kizpur puz, puyumbu tanxtakachu, wanasirsha musásich.
39¿Antaati shiy tumuzeem manginshucheem wip wachush katungtsingaz katungpani atusin, mariztarana anoom watungasheem wanutsee panakush, tazazarsin taakana? Tumuz wachush nguranazish iparinayaru, anshuri maakururtarsin, katungtsingaz katungpani atusin, napatarach anshkanaya.
41Mandarsha wip katungpani atusin, nachungaksin, ¿ndusha maachta watungasheem paku, mariz kayatkusin, tanukana anoom nuwcha watungasheem panakuri kchitakshinllinaya? Ashiriya, kamaneena yuwaa Apanll waana Jobaa tsiyatarangu anootsi.
