Job 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹Bang i lang nib gel e ma pug e marus rog.

²Mmotoyilgad, ni gimed gubin, nga laman Got, ni dirra’ ni be yib u langan.

³Ma pi’ e uluch nge th’ab lanelang, u barba’ e fayleng nge thang nga barba’.

⁴Ma aram mini rung’ag ga’ngin laman, nib lingan dirra’ nib ga’, ma aram n’umngin nap’an ma yug be mat e uluch.

⁵Yugra pag Got lungun me buch bogi ban’en ni yira ngat ngay, bogi ban’en ni bfel’ ma dab dananged fan.

⁶Ma yog ko ayis ni nge aw nga daken e fayleng, mma pi’ e n’uw nge aw nib almirin.

⁷Ir e ma taleg e maruwel rodad; ma dag ngodad ko mang e rayag rok.

⁸Gamanman ni malboch e yad ma yan nga taferad.

⁹Nifngin e yoko’ e ma yib ko yimuch, me yib e garbeb ko lel’och.

¹⁰Pogofan rok Got e ma garbebnag e ran nge el, me pilyeg nge ngal’ ni ayis.

¹¹Uluch e ma mat u fithik’ e manileng,

¹²nma mat ni bod rogon ni ba’adag Got. Yad ma rin’ gubin e tin ke tay Got chiylen, u ga’ngin yang u fayleng.

¹³I Got e ma pi’ e n’uw ni nge tarannag e fayleng; ma pi’ ni nge gechignag e girdi’, fa nge dag ngorad nib gol.

¹⁴Job, aygumtal boch ngiyal’, ngam motoyil; ma ga leamnag e pin’en ni bfel’ nma rin’ Got.

¹⁵Ga manang rogon nma non Got me mat e uluch u fithik’ e manileng?

¹⁶Ga manang rogon nma man’ e yung i manileng u lanelang, nge maruwel rok Got nib pag feni salap?

¹⁷Danga’, kemus ni ngam gafgow ko gawel u nap’an nra yib nifngin e yimuch ni nge mliknag e but’.

¹⁸Mog rayag rom ni ngam ayweg Got i fileth lanelang nge par nib el ni bod e wasay ni kan gichiy?

¹⁹Mu fil ngomad e n’en ni ngogned ngak Got; ya keman lanin’mad; dakriy e n’en ngogned.

²⁰Dab gu de’eriy ni nggu non ngak Got; mangfan ni nggu k’aring nge thangeg?

²¹Ma chiney e ra’en lanelang e be matmat, ni kaygi gel ra’en ni dabkiyag ni ngad changargad ngay; ke walguy e nifeng ke tamilang.

²²Kaniguy ba ra’en nib maluplup u lan e lel’och, ma fal’ngin Got e ke suguydad ka da ngatgad ngay.

²³Gelngin Got e rib gel ni dabyag ni ngad chugurgad ngak; ir e bmat’aw ma ba yal’uw rogon nma farwoliy e girdi’.

²⁴Aramfan, ni gubin e girdi’ nma ngat ngak; mma fek owchen rok e pi’in yad ma yog ni yad ba gonop.