Hiobe 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Wiac iŋucne fuame hâcne buhândâŋ‐nanezi fâfârerâ ɋarac ɋarac qaekac.

²Oi, ŋicbureŋ, ŋoŋe sasawa Anutu marac fânâŋ‐ticnere hazec râeniŋ, ehuc micticnaonec parandaŋ fânâŋ wahaekac i wâc mananiŋ.

³Eki hâcne mume bâbâric‐ticnezi mâreŋ qaŋeŋne ŋifeckonec sawa hetâcnehuc ŋifecko ra qataraekac.

⁴Bâbâriczi iŋuc ehame Anutu marac fânâŋ sâko‐ticnezi jai jowarecko rame micʒonʒoŋ‐ticne mana‐fâreeŋgopeneŋ, ehame bâbâriczi sueme sue bâricne raekac.

⁵Anuture micte wiac fuaekac i hone wawarecnehec, erâ i ŋiczi mi mamana tarane.

⁶Eki hâcne mume mâreŋko sinou wahaekac, erâ wâc ekizia mume hoe micsâko heekac.

⁷E iŋuc ehuc ŋic ʒeŋgoma giere aka henâreekac, ehame ŋic bâfuac‐nâpowec nâŋâc ʒiŋuc mana taraeŋgopeneŋ: I Anuture gie hâcne.

⁸Wiac i fuame qowi jaŋe wiwiri hawec‐jeŋicko ra soŋkerâ ŋec foc eeŋgopieŋ.

⁹Mâŋâŋ ɋicwânʒâŋneheczi tiki mâreŋkonec wahaekac, â mâŋâŋ mâmâteŋ sâko‐ticnehec i wâc tiki mâreŋkonec jaha fisiekac.

¹⁰Anuture micrombâŋzi aisi bâfuaekac, ehame opâ jaŋe sanaŋke‐fâreeŋgopieŋ.

¹¹Erâ Anutuzia wâc mume hoe heocte karoraczi gâpâreekac, ehame karoraczi bâbâric‐ticne bârâwiŋneme sâcke‐fâreekac.

¹²Karoraczi Anuture mic reŋkerâ ririsiehuc rac warec eekac, ehuc mâreŋ ira me ira fuarâ Anutuzi gie mutâcnecneekac i bafâreekac.

¹³Anutu e ŋic nâŋâc dameŋ mocko bâtiŋ‐nâpoocte, â dameŋ mocko ehâmo‐nâreocte mume mâreŋko hoe heekac.

¹⁴“O Hiobe, go ʒiŋuc manac: Anutuzi wiac qeŋ bipinehec ebac eekac i moc hone warec ezemec.

¹⁵Anutu e weniŋuc erâ wiac i jaŋe giedâŋ mujareekac, ehuc bâbâric mucneme karorac maŋkonec waharâ tamaehuc raekac, i go moc manaekic me?

¹⁶Me Anutu e wiac bapa sariczi karorac bâfuame weniŋuc erâ faic sawao ririsiehuc rac warec eekac irec fuŋne go wâc manaekic me?

¹⁷Aricne, go jowarec mâŋâŋzi qahuc hae mâreŋ qâkereŋkeme fâroroc‐ticnere fofoŋac hecmu sawa.

¹⁸Go Anutuzi sambâŋ qaratieha sâcne bafickecmu, me aeŋ wiac rike sueŋkepene sanaŋkeekac irec sâc sambâŋ batec sanaŋkerâ foocmu me?

¹⁹Maŋnâŋec omaeha dâŋ munaŋte quŋkeŋgopeneŋte Anutu wemo dâŋ moc âzâcnenaŋmu i goki qazu‐nârec.

²⁰No Anutuzi dâŋnane manaocte mocwâc mi numucnepemu, no iŋuc epe imacnuzacte hâwicnume behekopac hâcne.

²¹“Mâŋâŋ qahuc karorac ficne sueme tâtieha qânikiŋ fuame ʒoaŋ ʒâziriŋko fipene ʒâŋe‐nâŋec âke hâpome fiqe ruruc eeŋgopeneŋ.

²²Faic mâreŋkonec furic râehame ware fisikac, ehame Anutu huriri saŋguac â huriri bojac bojac‐ticne hone ʒâireŋgopeneŋ.

²³Anuture tâpiri i qeŋ bipinehec, irec ere maŋfuŋko sâcne mi ra fisinaŋmu, e tiŋne rune jukacte ŋic dâŋnâŋec mutiŋne‐fâreekac.

²⁴Ehame, ‘nâŋe maŋɋârâŋhec juŋgopeneŋ’, iŋuc mueŋgopieŋ ŋic i jaŋe hone takic ejareekac. Irec ŋic nâŋâc ʒeŋgoma ere hâwic‐nâpozejec.”