Job 37

1

2

3

4

5

6

7

8

9

10

11

12

13

14

15

16

17

18

19

20

21

22

23

24

25

26

27

28

29

30

31

32

33

34

35

36

37

38

39

40

41

42

¹“Ebpekehuyab is kumeng ku tenged keniyan te vagyu.

²Pemineǥa niw is edraǥeb he laǥeng te Megbevayà.

³Impekilat din diyà te langit taman te kineziyuan he vahin te kelibutan.

⁴Ne egkezineg is kedraǥeb te mezaǥing he laǥeng din. Wazè din eǥena is kedraǥeb te laǥeng din.

⁵Egkein-inuwan is edraǥeb he laǥeng te Megbevayà. Mibaal sikandin te egkein-inuwan he menge vaal he kenè tew egketegkad.

⁶Ebmenduan din is ayis te kedtanà diyà te tanà wey is uzan te ked-uzan te mereǥes,

⁷su para mekehimeley is menge etew te terebahu zan, ne ebpekepurung dan ebpekeisip-isip te menge vaal te Megbevayà.

⁸Is menge langgam, ed-eles diyà te menge elesè dan ne zutun dan dà emun timpu te vagyu.

⁹Is bagyu wey is meǥenew he keramag ne ziyà ebpuun te midteǥuan duen.

¹⁰Pinaaǥi te ǥehinawa te Megbevayà nepurma is ayis, wey nehimu he ayis is meluag he wahig.

¹¹Ebpenuen din te wahig is menge ǥapun, ne ibpekilat din heini.

¹²Ed-eneb-eneb is menge ǥapun seled te tivuuk he kelibutan sumalà te mandù te Megbevayà.

¹³Ibpeuzan te Megbevayà te mereǥes su para zuen wahig diyà te tanà, etawa pinaaǥi te kebmansu zin te etew, etawa pinaaǥi te kebpaahaa zin te gaǥew zin.

¹⁴“Pemineǥa nu heini, Job, wey ngunngunua nu is egkengein-inuwan he ebeelan te Megbevayà.

¹⁵Netuenan nu ve ke ebmenmenuwen te Megbevayà te edumala is menge ǥapun, wey ke ebmenmenuwen din is kebpekindab te kilat?

¹⁶Netuenan nu ve ke maan is edletewletew is menge ǥapun diyà te zivavew? Baal heini te egkein-inuwan he Megbevayà he kenà edtaman is ketau zin.

¹⁷Sikew is edrimrimusengan tenged te meinit he keramag he ebpuun diyà te zivavà,

¹⁸ebpekeuǥup ke ve te Megbevayà te kedempas te langit wey te kedhimuwa kayi he mezesen iring te peǥelungan he brunsi?

¹⁹Emun uluwanen ka, keǥiyi key ke hengkey is ereg he egkeǥiyen dey ziyà te Megbevayà. Kenè dey egketuenan ke ebmenmenuwen te egkaǥi is ketezengan dey su nerusireman is ked-isip-isip dey.

²⁰Kenà a egkaǥi ziyà te Megbevayà he ebpekidlalis a kandin, su kela ke zèdeeti e zin.

²¹Wazà etew he egkepurungan din egketengtengi is andew su ebpekesirang heini su utew mesiǥa he ziyà te langit emun idlayap te keramag is menge ǥapun.

²²Puun te zizaya, egawas is Megbevayà he ed-ilak-ilak iring te vulawan ne egkein-inuwan is kebpekesirang din.

²³Kenè tew egketegkad is Mekeǥeǥehem he Megbevayà he lavew te langun, ne kenè kiw ebpekeuvey ziyà te kandin. Metazeng sikandin wey kenà ebpenlupiglupig,

²⁴umbe, edtehuzen sikandin te menge etew. Ne kenè din edseǥipaan is menge etew he kunaan dan ke metau sikandan.”