Luka 18:14-42

¹⁴Manaŋgopieŋ, takesi roro e Anutuzi kiŋticne behecne‐fâreme ficticnao risiewec, farisaio e ine focnewec. Moc e jahacne maŋte feme Anutuzi bawahaocmu, â moc e jahacne maŋte wahame Anutuzi bafeocmu.”

¹⁵Eme ŋic ŋokac jaŋe ɋiefâc‐jeŋic Jesurao amec‐jopa rarâ mezi bâuac‐jopaocte mupie motec jaŋe hâhâwic hejarembiŋ.

¹⁶Jesuzi ine hefârec‐jopahuc muwec: “Ŋoŋe behehapie naru motec norao wareniŋ, mi hecke‐jareniŋ. Iŋucne jaŋe hâcne Anuture uucmaŋ bine qajarekicne.

¹⁷No jâmbomac ŋazape: Moc e ɋie jaŋere sâc ehuc Anuture uucmaŋ mi biŋeckeocmu, e maŋnao mi raʒiocmu.”

¹⁸Eme soŋaŋ moczi Jesu wiocnerâ muwec: “Qaqazu biaŋ, no weniŋuc erâ juju sanaŋte biŋe epemu?”

¹⁹Jesuzi muwec, “Biaŋne wemocte munarekomec? Biaŋne rune Anutu mocjaha.

²⁰Erâ go sâcmutâc dâŋ manaekic, kecʒiŋuc: Ŋowe ŋonâŋ ŋohe bebehec mi ezepirec, go ʒika mi qazemec, go fiuc mi rozemec, go micko âkec mi ezemec, go neŋgoc mamac jahecge sâsec‐jofazeme.”

²¹Mume soŋaŋzi ʒiŋuc muwec: “I ɋieo fuŋkerâ reŋke warehuc juekopac.”

²²Mume Jesuzi manarâ ʒiŋuc âzâcnewec: “Mocjaha fokac, i ezemec, go rarâ moneŋ mafage ŋic hapetac qikiŋne‐jarezemec, eme sambâŋko boreŋ ʒeŋaŋ fua‐gareocmu. Erâ ware bâjâpecnuzemec.”

²³Eme ŋic e moneŋ mafa ɋâfoŋne focnewecte dâŋ i manarâ bune boc sâqorewec.

²⁴Iŋuc eme Jesuzi honerâ muwec, “Moneŋ mafa mâririheczi Anuture uucmaŋko raʒiniŋte ququŋkenehec boc eekac.

²⁵Kamelizi buŋic hawecnao raraʒi i wiac afecne, â moneŋ mafa mâririheczi Anuture uucmaŋko raraʒi i wiac ŋemâcne.”

²⁶Mume manahuc domambiŋ ŋic i jaŋe mumbiŋ, “Hâc, eme mozi sambâŋko feocmu?”

²⁷Eme Jesuzi jazawec, “Wiac ŋiczi eniŋte quŋkeeŋgopieŋ i Anutuzi hatane bâfuaocte mi quŋkeekac.”

²⁸Eme Petorozi ʒiŋuc âzâcnewec: “Manakic, nâŋe wiac‐nâŋec sasawa râpecke‐fârerâ go bâjâpecgumbeŋ.”

²⁹Mume Jesuzi ʒiŋuc jazawec: “No jâmbomac ŋazape: Moc e hae‐ticne me ŋokac motecfâcne, me hahac ɋa seŋ baŋecfâcne, me neŋgoc mamac jahecne Anuture uucmaŋte erâ behec‐jopaocmu,

³⁰e irec okacne ʒira mâreŋko wiac fekicne tahackezo, â juku sambâŋko juju sanaŋ tahackezo.”

³¹Jesu e motecfâcne hefârec‐joparâ ʒiŋuc jazawec: “Manaŋgopieŋ, nâŋâc Jerusalem haeo feŋgopeneŋ. Eme porofete jaŋe Ŋic Fâri Wâtuŋne ere findaŋdâŋ qâreŋkembiŋ i sanaŋke‐fâreocmu.

³²E ŋic qâpuc jaŋere meo feme jaŋe mu ruruc ecnerâ qa imac ecnehuc tâfeckeniŋmu,

³³erâ becsahac biriŋneheczi qa qâʒâic ecnerâ qahâmoniŋmu. Eme ʒoaŋ jahec â moc eha hâmockonec ɋârerâ fahareocmu.”

³⁴Iŋuc mume jaŋe kâuc bambiŋ. Dâŋ i manapie quŋkeme fuŋne mananiŋte mana ririfirembiŋ.

³⁵Jesu e raku Jeriko hae bâqiŋkewec. Ehame hatamecko ŋic tiŋtuŋ moc nânâ moneŋte numuhuc ŋewec.

³⁶Eme ŋic guru sâko hata ira rapie kike fânâŋ‐jeŋic manarâ fuŋnere wiojareme

³⁷mumbiŋ, “Jesu Nazarete haeonec warekac.”

³⁸Mupie manarâ hahaŋne bahuc wirarâ muwec, “Jesu go Dawidire ɋâriczi nore mac buge sâqoreoc me!”

³⁹Iŋuc eme ŋic bâniembiŋ jaŋe niniŋkerâ ŋeocte dâŋ mucnembiŋ. Eme eki dâŋjeŋic mana takirehuc fotarierâ wirawec, “Go Dawidire ɋâriczi nore mac buge sâqoreoc.”

⁴⁰Eme Jesuzi manarâ hatao domahuc muwec, “Ŋoŋe norao bawareniŋ.” Mume tiŋtuŋzi erao fisime wiocnerâ muwec,

⁴¹“No wemo egarepemurâ mukic?” Eme tiŋtuŋzi muwec, “Wofuŋ, no ʒâŋe fifihec epere enarekac.”

⁴²Mume Jesuzi ʒiŋuc âzâcnewec: “Ʒâŋege fitâcneoc, mamanasiŋgere biaŋgukac.”