Lucas 18:14-42

¹⁴Lee na nii lo gu, mbare xaabyi ne garli xaa nu mchela Dios re jwalt cheen xaa. Lee stub xaa namchet Dios re jwalt cheen. Nel lee re xaa nto yalxwa, zhin mbizh ton xaa; nu lee re xaa nantot yalxwa, zhin mbizh gak non xaa.

¹⁵Lee re myet nzhe re madwin lo Jesús nu noka nzhe xaa axta re madoo, zee zhiib Jesús yaa Jesús yek re mad win. Nu gorna ngune re xaa mseed lo Jesús lee re xaa tant nzhano mad lo Jesús, zee mgalno xaa re xaa nyaadno mad win.

¹⁶Jesús mrezh re xaa mseed lo xaa nu nzhé Jesús lo re xaa: —Laa gu yiid re madwin lo na, nu nasaawt gu lo mad zee nayiidt mad lo na. Nel Dios nabeyy leen lextoo re xaa nak kwenta re madwin ne.

¹⁷Wlipa na nii na lo gu, loka cho gu nakayaat pa nabeyy Dios, mod tub madwin, nyent mod zeeb gu pa nabeyy Dios.

¹⁸Tub xaa non ngwa mnabdizh lo Jesús: —Maestr wen, ¿cho kwaan le na, zee le na gan yalnaban kwaan tira?

¹⁹Jesús nzhé lo xaa: —¿Chozhiin né lu lo na, na nak tub xaa wen? Nik tub xaa wen nyent, nebse Dios nak xaa wen.

²⁰Nela lu re kwaan mlaa Dios le be. Re kwaane: nazoblazht lu kano lu stub ngwnaa, naguta lu sa myet lu, nalewannt lu, nagaazht lu tub kwaan nawlit tich sa myet lu, nu nazeret lu diizh lo xuz lu nu lo xnaa lu.

²¹Lee xaa non nzhé: —Rese kwaane kale na dubse nzexen na.

²²Gorna mbin Jesús kwaane, zee nzhé Jesús lo xaa: —Tubka kwaan nzho jwalt le lu. Zyaa, nu bto rese kwaan nkano lu nu bzaaya lo re xaa prob, zee gap lu zyen doo kwaan naz leen yiba, nu breke tich na.

²³Gorna lee xaa non mbin kwaane, nales doo ngok lextoo xaa, nel rik doo xaa.

²⁴Jesús mwii lo xaa nu nzhé xaa: —¡Nagan doo zeeb tub xaa rik naz leen yiba, pa nabeyy Dios!

²⁵Mas nanagant zeeb tub kamey leen yeer cheen tub aguj, ke tub xaa rik le gan nya yiba.

²⁶Nu gorna mbin re xaa kwaane, nzhé re xaa: —¿Cho le gan nya yiba chol sbaa naka?

²⁷Jesús nzhé: —Lo re myet yizhyo ne nyent moda, per Dios reseya nzho mod le Dios.

²⁸Zee nzhé Pér: —Lee rese nu, rese kwaan mlaa nu, nu mreke nu tich lu.

²⁹Jesús nzhé lo xaa: —Na nii lo re gu, loka cho xaa laa li, laa sa, laa wech, laa xuz nu xnaa, laa xinn kwent cheen pa nabeyy Dios,

³⁰zee zyen welt bareya lo xaa nu zhin mbizh kayaa xaa yalnaban kwaan tira leen yiba.

³¹Nu zeera mbe Jesús techosa re chiibchop xaa mseed lo Jesús tub lad nu nzhé Jesús lo re xaa: —Bkenzha gu nal. Nal ya be Jerusalén, nu baa gak rese kwaan nzhé re xaa mzaa kwent kwaan nzhé Dios lo lee xaa yilo, kwent cheen Xaa Mzhin Ngok Myet.

³²Zaa xaa na lo re xaa nanakt xaa Israel, nu xizhno re xaa na; nu koo xaa xkyalnto na, nu chuk re xaa lo na.

³³Nu gorna yilo zaa re xaaya yenn na kwaan tub le yed, zeera gut re xaa na; per lee mbizh yon lee na roban stuba.

³⁴Namlat xtizh Jesús yek re xaa mseed lo xaa; nanet re xaa cho kwaan mzaa Jesús kwent, nel mkaxlaan Dios diizh ne lo xaa.

³⁵Nu gorna nzhazhin Jesús gax yezh Jericó, ngune xaa lo tub xaabyi syeg nzob roo naz naab karda.

³⁶Lee syeg mbin nkee doo rezh, nel zyen doo xaa nzhake tich Jesús, kwaanzee ngunabdizh xaa lo re xaa nu nzhé xaa: —¿Cho kwaan kayak?

³⁷Zee nzhé re myet lo syeg: —Jesús xaa Nazaret nzhaded nee.

³⁸Zee lee syeg dub gan mrazhe nzhé: —¡Jesús, lu nak xaa dii cheen rey David, blesla lu ne lu na!

³⁹Zee lee re myet mgalno xaa nu nzhé xaa lo xaa: —¡Saaw roo lu! ¿Cho bi nkee lu? Per lee xaa mas nyera mrazhe xaa nu nzhé xaa: —¡Jesús, lu nak xaa dii cheen rey David, blesla lu ne lu na!

⁴⁰Zee mlaz Jesús nu nzhé Jesús: —Teno gu xaa nee. Gorna mzhin xaa zee mnabdizh Jesús lo xaa:

⁴¹—Guné, nen cho kwaan nzhekla lu le na lo lu. Lee xaa mkeb nzhé: —Xaa Nabeyy, nzhekla na wii na.

⁴²Jesús nzhé lo xaa: —Nzho mod yani garlo lu, nel kwaan dub lextoo lu ngwii lu lo na, zee gakwen zaalo lu.