1Sabata hombaŋ mocko farisaio jaŋere micne bapa moczi Jesu nânâre hefâreme ficticnao fewec. Eme ŋic gâcnezi ijaha mâmâc ŋehuc dâŋticnere ruc bambiŋ.
2Ehame ŋic moc sisiwiŋ sâko ecneweczi mi ferâ ijaha domazejec i.
3Eme Jesuzi honerâ sâcmutâc mamana â farisaio wio‐jarerâ muwec: “Ŋoŋe muniŋ, sabata hombaŋo ŋicko bâbâpiaŋ gie bapane fokac me mâcne?”
4Mume niniŋkerâ ŋembiŋ. Iŋuc epie menezi ŋic bâuahuc bâpiaŋkerâ soreme rawec.
5Eme ficko ŋembiŋ jaŋe ʒiŋuc jazawec: “Motec me bulimakao‐ŋeŋic moc hombaŋko nombâŋko hume behepie ŋeocmu, me hombaŋkoa sifu fârepie wefuocmu?”
6Indiŋ‐jopame dâŋ ŋifecne âzâcneniŋte basarâ behembiŋ.
7Eme ŋic gâcne nânâre mâmâc hefârec‐jopakicne jaŋe ŋeŋe mai jaha maŋjeŋicte erâ biac ŋepie honec‐joparâ sâc hehuc dâŋ ʒiŋuc jazawec:
8“Go ŋic moczi tiwâ bâzire hefârecgume maŋgere ŋeŋe mai jaha mi ŋezemec. Iŋuc ehaŋtecne hefârec‐jopakicne gâcne jaŋeraonec gore femicne moczi fisime
9tiwâ runezi go ʒiŋuc gazaocmu: ‘I ere ŋeŋe, go rârierâ ŋec.’ Gazame ŋeŋe rârâpe ŋehuc gâgâmârâcmu.
10Mâcne, moczi hefârecgume go ŋeŋe rârâpe ŋezemec. Ŋehaŋtecne tiwâ runezi honecgurâ ʒiŋuc gazaocmu: ‘Âgo, go ferâ ŋeŋe mai jaha ŋec.’ Iŋuc gazame ŋic gâcne jaŋere maio bubiaŋ manacmu.
11Moc e e jahacne maŋte feme bawahazo, â moc e e jahacne maŋte wahame bafezo.”
12Iŋuc murâ ŋic hefârewec e ʒiŋuc âzâcnewec: “Go tiwâ bâzi rikerâ âgo bagofâcge me seŋ sâme hahac ɋafâcge me haefâcge fekicne mi hefârec‐jopazemec. Jaŋe tiwâ bâzire hefârec‐jopatec go iŋuc jaha hefârecgurâ tofa bazu‐garepie taraocmu.
13Iŋuc mâcne, tiwâ bâzi rikerâ waha qaqane â kike demba, ʒeke puriŋ â tiŋtuŋ, iŋucne hefârec‐jopazemec.
14Eme ʒiŋucte manariŋguzo: Tofa i mâc fome juku mitiŋic fafahare dameŋ‐jeŋicko Anutuzi bazu‐gareocmu.”
15Mume nânâ nâhuc ŋembiŋ jaŋeraonec moczi dâŋ i manarâ ʒiŋuc muwec: “Anuture uucmaŋko nânâ nâocmu ŋic iŋucnere manape ʒerine ekac.”
16Mume Jesuzi binaŋ moc ʒiŋuc bawec: “Ŋic moczi tiwâ bâzi sâko qame fisime ŋic bocjaha hefârec‐jopawec.
17Erâ wiac bâmocke‐fârerâ ŋic ʒâfo ejarekicne jaŋerao kiŋaŋ motec‐ticne soreme rarâ ʒiŋuc jazawec: ‘Wiac rike bâmoc efârekicnere wareniŋ.’
18Jazame jaŋe wiac kosao ɋetickehuc qikiŋne‐fârembiŋ. Ehuc moc e muwec, ‘No mâreŋ moc furine bapo izi fârecnukacte honezo rakopac, go irec ŋicbomboŋge âzâcnetec maname mi sâqorezejec.’
19Â moc e muwec, ‘No bulimakao 10 furine bac‐jopapo i ra amec‐jopa warepemu, go irec ŋicbomboŋge âzâcnetec maname mi sâqorezejec.’
20Â moc e muwec, ‘No ŋokac ropore wemocko fâpemu.’
21Iŋuc mupie kiŋaŋ moteczi risierâ bomboŋ‐ticne dâŋ binaŋ ecneme maname gâpârewec. Erâ kiŋaŋ motec‐ticne ʒiŋuc muhuc âzâcne sorec ewec: ‘Go bâruŋ jaha bozene bozene jufârehuc ŋic roroc qaŋqaŋne â kike demba, ʒeke puriŋ â tiŋtuŋ rocjopatec warenʒepieŋ.’
22Eme kiŋaŋ motec e iŋuc erâ bomboŋ‐ticne ʒiŋuc âzâcnewec: ‘Bomboŋ, go dâŋ mumec i epac, erâ fic ine fâfâoc fokac.’
23Âzâcneme bomboŋzi ʒiŋuc muwec: ‘Irec go mocwâc rarâ haesoŋko ŋic juraŋgopieŋ fotarie‐jaretec ware‐jâmbâŋkerâ ficnane fusucmanʒepieŋ.
24Erâ ŋazape mananiŋ: Ŋic bâbâni hefârec‐jopakicne jaŋe mâc jâmbâŋ ŋenʒepieŋ.’”
25Eme ŋic guru sâko jâmbâŋ Jesu bâjâpepie fotikierâ ʒiŋuc jazawec:
26“Moc e nohec juzo murâ neŋgoc mamac, ŋokac motec, hahac ɋa seŋ baŋec jaŋe mi qaisoc‐jopaocmu, e motec jâmbâŋ‐nane sâcne mi erâ juocmu.
27Moc e jahacne maripoŋ mi hâpora bâjâpecnuocmu, e motec jâmbâŋ‐nane sâcne mi erâ juocmu.
28“Ŋoŋeraonec moczi wapafic sâko baocte qanaŋ furinere manarâ moneŋ‐ticne wose biric erâ eene me mi eene irec fuŋne bataniŋkeocmu.
29Me iŋuc mi ehuc onʒoŋ jaha ficticne wiseme hume ʒaeckerâ moneŋ basarâ beheocmuo ine ŋic jaŋe hone manac erâ mu gâgâwi ecnehuc
30ʒiŋuc muniŋmu: ‘Ŋic keci fazic erâ ficsâko wiseme hume eipierâ beheme ŋekac.’
31Ŋicwofuŋ moczi ŋicwofuŋ âgo‐ticne qaocte onʒoŋ jaha râsi mi raocmu. E qanaŋ ʒiŋuc muocmu: ‘Nâŋe ʒi afecne juŋgopeneŋzi ocni bocjaha juŋgopieŋ jaŋe sâcne jopanaŋmu me mâcne?’
32Iŋuc murâ e jahacne momorifâc jaŋere maname afeckeme rasi‐ticne hae‐ticnao juhame biac sahac taha‐ticne râecnehuc muocmu, ‘Wama fuame junac.’
33Eme ŋoŋeraonec moc e iŋuc jaha wiac‐ticne sasawa mi qikiŋne‐fârerâ weniŋuc motec‐nane erâ juocmu.
34“Hâwec i wiac aŋacne. Â nonocne eme ine weniŋuc ecnepene hâtâne‐ticne mocwâc fuaocmu, i aricne i!
35Izi iŋuc me iŋuc eene mi fokac, i mâc hoŋkepene raocmu. Moc e hazec‐ticneheczi dâŋ kecʒi manazejec.”
