Lukaj 18:14-42

¹⁴I indai on komail, ol men et kodila deu a punala mon me teio. Pwe me kin kajapwilada pein i, pan kajapwilidi, a me kin kajapwilidi pein i pan kajapwilada,

¹⁵Irail ap wa don i kijin jeri kai, pwen kotin jair ir. A japwilim a tounpadak kan lao kilaner, re ap kapoui irail.

¹⁶A Iejuj kotin molipe ir majani: Mueid on kijin jeri kan, en kodo re i! Der kalik irail edi! Pwe irail me udan wein Kot.

¹⁷Melel I indai on komail, meamen, me jota ale wein Kot rajon kijin jeri men, a jota pan pedelon on lole.

¹⁸A monjap amen idok re a majani: Jaunpadak mau, da me i en wiada, pwen jojoki maur joutuk?

¹⁹Iejuj ari kotin majani on i: Da me koe indaki, me I me mau? Jota me mau men, Kot eta.

²⁰Koe kin aja kujoned akan: Koe der kamal; koe der kamela aramaj; koe der pirap, koe der kinekine mal, kakaki jam om o in om!

²¹I ari indada: Nan mepukat karoj i kin wiawia jan ni ai tikitik kokodo.

²²Iejuj lao mani mepukat, ap majani on i: Me ta kij me lua, netikila om kapwa karoj, o nene on me jamama kan, a om pai pan mi nanlan, ap kodo idauen ia do.

²³A lao ronadar met, ap injenjuede kila melel, pwe a kapwapwa kaualap.

²⁴A Iejuj lao kotin majani, me a injenjuedela, ap majani: Nan me apwal on me kapwapwa kan, en pedelon on nan wein Kot.

²⁵Pwe me manai, kamel en tilon nan por en dikok, jan ol kapwapwa men pedelon on nan wein Kot.

²⁶Irail me roneron indada: Ari, ij me kak on maur?

²⁷A kotin majani: Me aramaj akan jo kak on, Kot me pan kak on.

²⁸Petruj ap potoan on: Re kotin mani, kit me likid maliela meakaroj ap idauen la ir.

²⁹A kotin majani on irail: Melel I indai on komail, nan jota me likidmaliela im a, de jam, de in a, de ri a ol akan, de a paud, de na jeri kan pweki wein Kot,

³⁰Me jo pan id aneki me lapalap ni anjau wet o ni muei kokodo maur joutuk.

³¹A kotin ukala ekriamen ko majani on irail: Kilan, kitail kin kodalan Ierujalem, o karoj pan pwaida, me intinidier ren jaukop akan duen Nain aramaj.

³²Pwe a pan panala ren men liki kan, pwe re pan kapikapiti i o ki jan wau i, o kondipi on i.

³³O re pan woki i o kamela, a ni kajilu en ran a pan maureda.

³⁴Irail ari jota man weweki mepukat, O majan pot et me rir jan irail. Re pil jaja, me a kotin majani.

³⁵A kadekadeo ni a koren ion Ieriko, ol majkun amen momod pon kailan al, poekipoeki.

³⁶I lao ronadar pokon o me daudaulul, ap idok due.

³⁷Irail ari indan i, me Iejuj men Najaret kotin daulul.

³⁸I ari nil laudeda potoan on: Iejuj, japwilim en Dawid, kotin kupura ia!

³⁹A me tion moa kidekidaue i, en nenenla: A i ap kalaudela a poekipoeki: Japwilim en Dawid, kotin kupura ia!

⁴⁰Iejuj ap kotin udi on waja o, majani, ol o en wijike don i. A lao koren ion imp a, ap kotin kainoma re a.

⁴¹Majani: Da me koe men, I en wiai on uk? A potoan on: Main, i men potoan narada waja.

⁴²A Iejuj kotin majani on i: Kilan waja, om pojon me kakel uk ada!