Luk 18:14-42

¹⁴Nöŋön kewö jibi mötme: Yaŋön mönö Anutugö jeŋe solaniba miriŋe liliŋgöyökmö, Farisi (Köna keugö kapaŋkölköl) yaŋön mewö qahö. Denike yeŋön nanŋini uruŋini memba öŋgömei, Anutunöŋ mönö i körek memba et al eŋgimapmö, kunŋan nanŋi uruŋi memba etmawi, Anutunöŋ mönö i memba öŋgöba al waŋgima.” Mewö.

¹⁵Ambazip tosatŋan nahönbörat morömorö mewöyök eŋguaŋgita Jisösnöŋ böröŋan eŋgimisirimapköra yaŋgöreŋ kaget. Kagetmö, gwarek yeŋön mi eka jim qetal ak eŋgiget.

¹⁶Mewö aketmö, Jisösnöŋ nahönbörat mi köl öröm eŋgii kagetka kewö jiyök, “Nahönbörat moröŋi mi ölöp eŋgömosötketka nöŋgöreŋ kame. Anutunöŋ ambazip mewö mia bemtohoŋi buŋa qem eŋgima. Miaŋgöra i kude jöhöm eŋgime.

¹⁷Nöŋön keu ölŋi kun kewö jibi mötme: Kunŋan Anutugö bemtohoŋi mi nahönbörat ewö buŋa qahö qem aŋgumawi, yaŋön mönö miaŋgö uruŋe aŋgotmamgö osima.” Mewö.

¹⁸Galömkölköl azi kunŋan Jisösgöreŋ kaba kewö qesim waŋgiyök, “Böhi ölöpŋi, nöŋön mönö denöwö aka malmal köhöikŋaŋgö buŋa qem aŋgubileŋak?”

¹⁹Qesim waŋgiiga kewö jii mörök, “Gi nöŋgöra ‘Böhi ölöpŋi’, mi wuanöŋgöra jizan? Anutu mohotŋan ölöpŋi akza. Azi kunŋan i ewö ölöpŋi qahö akza.

²⁰Gi jöjöpaŋ keu ki möt teközan, ‘Sero yoŋgorö kude akŋan, Ambazip kun kude qenöŋ kömuma, Yoŋgorö kude meman, Jitnöŋ alal keu kude jiman, Iwinamgi mönö göda qem etkimakŋan.’”

²¹Mewö jiyökmö, galömkölköl azinöŋ kewö jiyök, “Mi pakpak mönö gwaböneyök tem köla mala kotzal.”

²²Jii Jisösnöŋ möta kewö jii mörök, “Mohot-kungöra kewö osizan. Gi mönö anda sukinapki pakpak söŋgöröŋi memegöra alnöŋ moneŋ kaiga meŋdeŋda ambazip wanapŋi eŋgiman. Mewö aknöŋga sukinapki ketaŋi (guli masapu, milyön kina ewö) mi Suep mire ahöm gihima. Mewö aka ni nuataŋgöba kaman.”

²³Mewö jiyökmö, azi miaŋön kindiŋbirik malöhaŋgöra aka keu mi möta wösöbirik aka jeŋi asöliiga öne mosöta anök.

²⁴Wösöbirik ahöhi Jisösnöŋ mi eka kewö jiyök, “Yei! Ambazip moneŋ inapŋinambuk yeŋön mönö Anutugö bemtohoŋnöŋ aŋgotpingö lömböriba kupuk-kapak akŋe.

²⁵Mi kewö jim tuarimam: Sömbup ketaŋi kamel mi kondi kinimŋe ölöp qahö aŋgotma. Miaŋgö dop ambazip pomŋi yeŋön Anutugö bemtohoŋ uruŋe aŋgotpingö lömböriba qaköme.”

²⁶Keu mi jii mötkeri, yeŋön kewö jiget, “Opopoŋ! Ambazip daŋön mönö Suepkö buŋaya akawak?”

²⁷Mewö jigetka kewö meleŋnök, “Ambazipnöŋ mi esapköba osiba qakömakzemö, Anutunöŋ mönö yuai pakpak ölöp ahakza. Yaŋön yuai kun aka memamgö qahö osiba qakömakza.”

²⁸Pitönöŋ keu mi möta meleŋda kewö jiyök, “Mötnöŋ, neŋön mönö miri gölmenini mosöta gi guataŋgöba kain.”

²⁹Mewö jiiga Jisösnöŋ kewö jii mötket, “Nöŋön keu ölŋi kun kewö jibi mötme: Kunŋan Anutugö bemtohoŋaŋgöra aka yuai kun mosöröhi, - mi miri gölmeŋi, anöm-moröŋi, darumunŋi me iwinamŋi - mi eŋgömosöriga

³⁰Anutunöŋ mönö salupŋe toroqeba oŋgita likepŋi meleŋ waŋgiiga mi gölmegö malmalnöŋ mema aka malmal könaŋgepŋe malmal köhöikŋi teteköŋi qahö buŋa qem aŋguma.”

³¹Jisösnöŋ gwarekurupŋi 12 mi öröm eŋgii kagetka kewö jiyök, “Mötket, nini Jerusalem öŋgöbin. Kezapqetok ambazipnöŋ Suep gölmegö azi ölŋaŋgöra keu pakpak ohogeri, mi mönö ölŋambuk ak teköma.

³²Kunöŋ i mamalolo mem waŋgiiga kian gawman yeŋgö böröŋine gema. Yeŋön jijiwilit aka mepaiköba keu töhöreŋ jim waŋgiba söutkölap qeme.

³³Söutkölap qeba ihilek wahiŋambuknöŋ tauköm waŋgiba qeget kömuma. Kömumba wehön karöbut aiga kömupnöhök wahötma.”

³⁴Mewö jiyökmö, gwarek yeŋön keu mi qahöpmahöp möt asariget. Keu jiyöhi, mi asa-asambötŋe ahöiga mi qahö möt kutuget. Mewö.

³⁵Jisösnöŋ anda Jeriko mire dopdowiiga jegömöl azi kunŋan nene moneŋ waŋgimegöra uleta köna jitŋe tarök.

³⁶Tariga ambazip kambu könanöŋ oŋgita angetka kourukŋini möta “Wanat yuai asuhuza?” jiba qesim eŋgiyök.

³⁷Qesim eŋgiiga kewö jiget, “Jisös, Nazaret azinöŋ mönö könanöŋ kaba goŋgitmamgö akza.”

³⁸Jigetka kewö qerök, “Jisös, Deiwidkö gwölönarökŋi! Gi mönö ak-kömum niŋgiman!”

³⁹Mewö qeriga ambazip mutuk angeri, yeŋön bök tatmapköra qetal waŋgigetmö, yaŋön kapaŋ köla qet gigilahöyök, “Deiwidkö gwölönarökŋi! Gi mönö ak-kömum niŋgiman!”

⁴⁰Qet gigilahöiga Jisösnöŋ dörök ala kewö jim kutuyök, “I mönö böröŋe memba nöŋgöreŋ kame.” Jiiga memba dowe kaŋgotketka kewö qesim waŋgiyök,

⁴¹“Alani! Gi mönö wani yuai ak gihimamgöra mötzan?” Qesim waŋgiiga jiyök, “Kembu! Ni jeni kunbuk umamgöra mötzal.”

⁴²Jiiga Jisösnöŋ kewö jii mörök, “Mönö jegi unöŋ. Mötnaripkan mönö mem ölöwak gihiza.”