Luku 18:14-42

¹⁴Amanage huna neramasamue, takisi eneria ne'mo'a Farisi ne'mofona agetereno Anumzamofo avurera fatgo huteno noma'arega vu'ne. Na'ankure agra avufga erisaga hanimofona, Anumzamo'a azeri fenka atregahie. Hianagi iza'o avufama anteramisimofona, Anumzamo'a azeri sga hugahie.

¹⁵Mago'a veamo'za ne'one mofavre'zmia Jisasi zamufare zmavako nehuno, asomu ke huzmantenogu zmavre'za neageno, amage'ma nentaza disaipol nagamo'za nege'za, ke zmasu'naze.

¹⁶Hianagi Jisasi'a amagema nentaza disaipol nagara zmagi huno zamasmi'ne, zmatrenke'za ne'one mofavre ramina Nagrite eho. Kazmia renkanire ozmanteho. Na'ankure Anumzamofo Kumara, e'inahu vahe'mokizmi kuma me'ne.

¹⁷Tmage hu'na neramasmue, iza'zo ama mofavre'mo'za enerizankna hu'za Anumzamofo Kumama e'orisamo'za, uofregahaze.

¹⁸Mago afufenone kva ne'mo amanage huno Jisasina antahige'ne, Knare Rempi Hurami Ne'moke, nankna hutena manivava asimura erigahue?

¹⁹Jisasi'a anage huno kenona ana nemofona asmi'ne. Na'a higenka Nagrikura knare hunane hunka nehane? Mago vahe'mo'a knarera osu'neanki, Anumzana magokemo knarera hu'ne.

²⁰Hanki kagra kasegea antahinane, rumofo aro vea avazu osuo. Vahera aheofrio. Maka'zana musufa oso. Ru vahe'mofonkura rempagari kea osuo. Negrerane negfane keznia erizafa huo, hu'nea kea antahinane. (Eks-Uti 20:12-16, Diu-Kas 5:16-20)

²¹Huno Jisasi'a higeno, ana kva ne'mo'a mofavre mani'na enoregatira ana mika kesegea amage ante'na e'noe, huno higeno,

²²Jisasi' ana ke antahiteno amanage huno ana ne'mofona asmi'ne, mago zantfa atupara hu'nane, maka zanka'a zgore atrenka zgo erinka, zamunte omne vahe nezamigeno, monafi fenonka'a mesigenka enka eme namage anto.

²³Hianagi ama ana naneke nentahino, rimpagna afufenoma'agura hu'ne. Na'ankure agra tusi'a afufeno antenegu ana hu'ne.

²⁴Jisasi'a ana nemofo negeno anage hu'ne, fenozmine vahe'mo'za Anumzamofo Kumapima vunaku'ma hanazana tusi'a mraguzatigahaze!

²⁵Na'ankure kemorimo'za fru hu'za kena hati nekazamofo kampina ufregahazanagi, afufenone vahe'mo'za tusi'a mraguzati'za Anumzamofo Kumapina ufregahaze.

²⁶Anampi mni'naza vahe'mo'za ana ne'kuma asamia kema nentahiza, hagi iza manivava asimura erigahie hu'za antahigenaze?

²⁷Hianagi Jisasi'a anage hu'ne, makazama vahe'mota osugazana, Anumzamo'a amne hugahie higeno,

²⁸Pita'a amanage huno hu'ne. Ko, mika zantia atreta, Kagri kamage anteta neone.

²⁹Higeno Jisasi'a anage huno zmasami'ne, tamage hu'na neramasamue, magomo'a noma'o nenarono, afu aganano, nererano nefano, mofavre'ama Anumzamofo Kumaku'ma huno atresimo'a,

³⁰amama mni'nea knafina rama'azantmi e'nerino, henkama esia knafina monarera, manivava asimura erigahie.

³¹Jisasi'a 12fu'a amage'nentaza disaipol naga'a zmavrekanti anteno, anage huno zmasami'ne, antahiho, Tagra Jerusale kumate marerita vanunkeno, maka kema kasnampa vahe'mo'za, Vahe'mofo Mofavregu hu'za kre'naza kemofo avufa'a fore hugahie.

³²Na'ankure megi'a vahe zmazampi avare amisageno, azanva ke hunente'za, azeri haviza nehu'za, avetu ahentegahaze.

³³Ana nehu'za, sefu amite'za, ahefrisageno friteno, ete tagufa knazupa otigahie.

³⁴Hianagi amage'ma nentaza disaipol nagamo'za fritena otigahue hiankemofo agafa'amo'a frakino oku'a me'negeno, ana kemofo agafa'a antahi amara osu'naze.

³⁵Jisasi'ma Jeriko kumate vugofa nehigeno, mago avusuhu ne'mo kamofo ankenarega meme nehuno mni'neno,

³⁶antahigeno rama'a vahe enevzageno, naza fore nehie? huno zmantahigege'za,

³⁷zamagra asmi'za, Nazareti kumateti ne' Jisasi enevie nehazageno,

³⁸Ranke huno kezatino, Jisasio Deviti Nemofoga kasuntginanto! Higeno,

³⁹kotama vaza vahe'mo'za ana ke nentahi'za kesu'za, kea osunka kagira hamunkinka manio hu'naze. Hianagi mago'ane kezatino, Deviti Nemofoga kasuntginanto!

⁴⁰Jisasi'a neviretira anante uotino, kehinkeno eno hige'za, ana nera ome avare'za erava'o hazageno, anage huno antahige'ne.

⁴¹Na'a huganteku hugenka nehane? Higeno, Ramoka ete navua kesuegu nehue!

⁴²Jisasi'a anage huno asmi'ne. Kamentintimo kazeri hari hianki kavua ko higeno,