Luku 18:14-42

¹⁴Yesuma꞉ alota꞉ I̱ma꞉ iki pa꞉ta꞉ dupa la kitolome. Mo hande Pa꞉tisi halita꞉ da la꞉ka꞉la peeketa꞉ Koda꞉ yaapo halepe ekita꞉ tikitiki na pa꞉la꞉pate pa mo dakisi mu hala꞉ halita꞉ tikitiki pa꞉la꞉me. Pa ekipeke. Ma꞉nda꞉ epima꞉ ipikita꞉ aneke hali au lea꞉ka꞉na꞉ta꞉ kota꞉ Koda꞉ma꞉ ipikita꞉ mina꞉nialieke. Kutupa ma꞉nda꞉ epima꞉ ipika꞉ kone panda꞉ puniaya꞉ka꞉na꞉ta꞉ kota꞉ koto someta꞉ Koda꞉ma꞉ tieke au lalieke leekeme.

¹⁵Mandane wanda꞉halima꞉ ika꞉ hosiki wekiwandiki sunu Yesuna꞉ kikima꞉ wataena꞉ yeke hatuku epemekeme. Kutu pimikieki handolo hata꞉ ipika꞉ disaipolo haliwekima꞉ mo wanda꞉hali hando lemekeme.

¹⁶Koto lemekepate Yesuma꞉ mo wekiwandiki wi la꞉ mea alota꞉ Mo wekiwandiki sunuma꞉ I̱ pa꞉ta꞉ epena꞉ma꞉ sa꞉sa꞉ na pea꞉pa꞉peke. Pa ekipeke. Do wekiwandikima꞉ handeke wanda꞉halita꞉ mo Koda꞉na꞉ Kilu Tombuao Hala꞉ ekita꞉ ika꞉ ekie.

¹⁷Doeki hone wopu u hapa꞉peke. Wekiwandiki sunuma꞉ Koda꞉na꞉ Kilu Tombuao Hala꞉eki minolo piteleme tupa꞉ na mimika꞉na꞉ta꞉ kota꞉ ikita꞉ koto pa꞉ta꞉ ana꞉na꞉ na hondo pambilimikie leekeme.

¹⁸Mo Diu wanda꞉halina꞉ you hali homekema꞉ Yesu pa꞉ta꞉ lota꞉ pitolo hata꞉ alota꞉ Epeke Disao. I̱ma꞉ deto hala꞉eki muluekema꞉ta꞉ eki hau peonope laa lota꞉ piekeme.

¹⁹Yesuma꞉ ipika꞉ pi hombo peaaso alota꞉ I̱ta꞉ epeke halie pita꞉ ekipeke alo alepe. Ma꞉nda꞉ hali a꞉nda꞉ epeke tupa꞉ na hala꞉pate Koda꞉ homeke epeke tupa꞉ hala꞉me.

²⁰Hande Lo Pi Ula꞉eki paeyao hone wilime. Hali ma꞉nda꞉ ota꞉ homena꞉ na lia꞉peke. Hali ma꞉nda꞉na꞉ wanda꞉na꞉ hakopu na tunkula꞉peke. Pake na napeke. Yayapiki pi na lapeke. Makeaaso kone ma꞉nda꞉ ma̱leke na lia꞉peke. Naka꞉ ama꞉ apa꞉ yaapona꞉ pi opua꞉peke la꞉la꞉eki hone wilime leekeme.

²¹Mo halima꞉ Yesuna꞉ pi hombo peaaso alota꞉ I̱ hosiki weki siki hatia a꞉paata꞉ koto ale pi ula꞉eki paeyaota꞉ homeke a꞉nda꞉ na tunkuliki opua telia pu halome leekeme.

²²Yesuma꞉ do pi opuaata꞉ mo hali pa꞉ta꞉ alota꞉ Nakana꞉ma꞉ pulu pele hau ma꞉nda꞉ pa ula꞉me. Naka꞉ wia hale ala꞉ta꞉ ala꞉ta꞉ paeyao mandane wanda꞉halima꞉ hambena꞉ laa mo milipi manita꞉ mandane natehali wanda꞉hali pa꞉ta꞉ hale hale pea꞉peke. Kutu pikina꞉ta꞉ nakana꞉ma꞉ oli hepeni da tukiki pa꞉ta꞉ta꞉ mo epeke epeke ale wopu mu halipikie. Koto ekina꞉ta꞉ yaka hoki nane telia꞉peke leekeme.

²³Hande halima꞉ koto leekeeki opitolota꞉ ipika꞉ pukima꞉ ka꞉nda꞉ma꞉ homeekeme. Pa ekipeke ipikita꞉ hamoko tieke hayeke ekima꞉ piekeme.

²⁴Yesuma꞉ mo halina꞉ puki ka꞉nda꞉ma꞉ homeekeeki handa alota꞉ Mo hamoko wanda꞉halima꞉ Koda꞉na꞉ Kilu Tombuao Hala꞉eki pa꞉ta꞉ honda꞉ pamba꞉peketa꞉ tanda wopu pa꞉la꞉me.

²⁵Mo kemolo ma꞉na꞉ma꞉ mo no̱i̱ ka꞉ka꞉na꞉ pa꞉ta꞉ ana꞉na꞉ honda꞉ pamba yopua꞉peke ekina꞉ ka꞉nda꞉ta꞉ pa mo hamoko halima꞉ Koda꞉na꞉ Kilu Tombuao Hala꞉eki tukiki pa꞉ta꞉ pua꞉peke ekina꞉ mia꞉peke ka꞉nda꞉ tupa꞉ na milieke alome leekeme.

²⁶Mo wanda꞉halima꞉ Yesuma꞉ do leekeeki opuaata꞉ ipiki pa꞉ta꞉ lota꞉ pitolo alota꞉ Koto pa꞉la꞉ ekina꞉ta꞉ kota꞉ epima꞉ ota꞉ Koda꞉na꞉ pa꞉ta꞉la꞉la꞉eki handa꞉peke ya꞉la꞉pe lemekeme.

²⁷Yesuma꞉ hombo peaaso alota꞉ Wanda꞉halima꞉ pea꞉peke na ya꞉la꞉ ekita꞉ Koda꞉ma꞉ ana꞉ pa꞉la꞉me leekeme.

²⁸Kutupa Pidama꞉ta꞉ dupa leekeme. Handa꞉e. Nikana꞉ma꞉ta꞉ nika꞉ damanu make kiao neke telia꞉ mea epoma꞉me leekeme.

²⁹Yesuma꞉ iki pa꞉ta꞉ alota꞉ Ota꞉e. I̱ma꞉ iki pa꞉ta꞉ ota꞉ pi alome. Ma꞉nda꞉ epima꞉ Koda꞉na꞉ Kilu Tombuao Hala꞉ ekina꞉ hone witolo ipika꞉ wanda꞉ o da o hameke titi o apa꞉ ama꞉ o wekiwandiki ma꞉nda꞉ hondo mina꞉pa꞉lao epea꞉ka꞉na꞉ta꞉

³⁰kota꞉ ame do kenkena꞉ haena꞉ kone ala꞉ta꞉ ala꞉ta꞉ paeyao haka꞉ta꞉pao meaata꞉ wetepena꞉ ipilia꞉ natena꞉ta꞉ deto hala꞉ ekita꞉ milieke leekeme.

³¹Yesuma꞉ ipika꞉ disaipolo haliweki talo pu mea mo pateleke pulu hata꞉ alota꞉ Opua꞉pe. Nikita꞉ Diutuseleme da teke pa꞉ta꞉ puluma꞉me. Koto pa꞉ta꞉ta꞉ hande potopede haliwekima꞉ Wanda꞉halina꞉ Eiyeke pa꞉ta꞉ pulu pa꞉la꞉ ekimanu lao wilimi ekita꞉ peneme yaalimikie.

³²Ipikita꞉ Diendaili haliweki pa꞉ta꞉ mea halimikie. Koto haliwekima꞉ta꞉ ipiki kitao laa manda꞉ manda꞉ meaota꞉ ipika꞉ lokena꞉ dopi taalimikie.

³³Ipiki yombua baota꞉ homena꞉ lilimikie. Kutu pilimipate ipikita꞉ wiaata꞉ nate tepona꞉ paa tiao da꞉ta halieke leekeme.

³⁴Koto leekepate mo disaipolo haliwekima꞉ta꞉ mo pina꞉ teketa꞉ ota꞉ homeke siki make na handa꞉ wimikime. Ekipeke koto leeke pi manuna꞉ teke paeyaota꞉ a꞉mbao wiekeeki yaalo ota꞉ na handa꞉ wimikime.

³⁵Yesuta꞉ mo Dietiko da pa꞉ta꞉ poluekema꞉ yeke pulu haena꞉ta꞉ pota꞉na꞉ pitieke leke holu piki halima꞉ ala꞉ta꞉ ala꞉ta꞉ honke alo pitiekeme.

³⁶Ipikita꞉ pitu hata꞉ mo wanda꞉hali tieke yopulu leekeeki opuaata꞉ lota꞉ pitolo alota꞉ Dota꞉ aleke ya꞉ka꞉ta꞉pe leekeme.

³⁷Mo wanda꞉halima꞉ alota꞉ Na꞉sa꞉tete hali Yesu yopu ala꞉me lemekeme.

³⁸Koto lemeke mo halima꞉ anekema꞉ e̱ wi alo hata꞉ alota꞉ Yesuo. Deipidina꞉ Eiyekeo. I̱ pa꞉ta꞉ a꞉ta꞉ma꞉ homa꞉e leekeme.

³⁹Mo titina꞉ yapemeke wanda꞉halima꞉ta꞉ Pi na lapema laa sa꞉sa꞉ pimikipate mo halima꞉ ota꞉ wi aneke hapu paa alo alota꞉ Deipidina꞉ Eiyekeo. I̱ pa꞉ta꞉ a꞉ta꞉ma꞉ homa꞉e leekeme.

⁴⁰Koto leeke Yesuma꞉ pua yola꞉ mea hata꞉ mo hali ipiki teke pa꞉ta꞉ hatuku mea ipupee leekeme. Mo hande hali teke pa꞉ta꞉ epeeke handa Yesuma꞉ lota꞉ pitolo alota꞉

⁴¹I̱ma꞉ neke pa꞉ta꞉ eki peaano hone pa꞉la꞉pe leeke handaa mo halima꞉ alota꞉ Tekehalio. Yaka hone pa꞉la꞉ ekita꞉ ota꞉ paa handuluekema꞉ loa꞉me leekeme.

⁴²Yesuma꞉ mo hali pa꞉ta꞉ alota꞉ A꞉pa꞉la꞉me. Handa꞉e. Naka꞉ hone tulale ekima꞉ neke epeaala꞉me.