Lucas 18:14-42

¹⁴Jesu gerudu dare: —Cha gerule ba ulita ole, Chube kwian igi ganga ta blitu, kwian igi ganga joni mo ullage Chube ole ta no giti, agwa kwian fariseo me dale. Kwian baige suge kweri mo tale kaire mo gbe no kweri kwian na gwa giti, Chube gwage kwian ene me kweri, ama ngwale ama soli. Agwa kwian baige suge soli mo tale kaire mo gbe daba na chudaboangale, Chube gwage kwian ene kweri.

¹⁵Kirogwa ñenua kirogwa chebia tanre chiu mo kirogwalla soli dbe Jesu kle ngwadi, kirogwa ñenua, chebia takalin Jesu ko gbe kirogwa soli e giti gerule Chube ole Chube age no kirogwa alin Chube kirogwa manade no. Kwian geru jwannga Jesuge ulita gwagedu kwian tanredi chie kirogwa dbe Jesuge gire ama ka bo kirogwa ñenua ole chebia ole: —¿Lledale ba kle chie kirogwa dbe Jesuge? ¡Joga, joga siere! Ba me chie kirogwa dbe Jesuge.

¹⁶Agwa Jesu gerudu kirogwa ñenua ole chebia ole: —Bai aini kirogwa dbe chage. Gire Jesu gerudu kwian geru jwannga ole: —Me no ka boi kirogwa ñenua ole chebia ole, ba ama ulita chugene chie mo kirogwalla dbe chage. Kirogwa soli ta kle biale Chube gerua gai ulia blike, kirogwa talla ene kare Chube takalinge, kwian ulita bai kaire mo ta gbe ulia Chube ole kirogwa talla ene kare ole, kwian ene chege Chubenu, ama be toi diali chui tangle Chube ole.

¹⁷Cha gerule ulia ba ulita ole, kwian ulita bai kaire me mo ta gbe kirogwa talla kare Chube ole, kwian ene me ñage toi ule Chube ole, ama be chege sugekare Chubege —Jesu gerudu ene kwian geru jwannga ulita ole.

¹⁸Kwian israelita chugagwalla gdaite chku Jesudi geru gweale kade Jesuge, ama gerudu Jesu ole: —Ba kwian tkanga tangle noare geruge, cha takalin ba gerule cha ole ¿cha llema boadale nga dba ai giti gire ene cha ñage toi no diali chui tangle Chube ole nga ngaña giti?

¹⁹Jesu jaindunga kwian e kalen: —¿Mineade ba gerudu cha no? Ulia ni kwian gdaite no trate, Chube alin allabi no trate ulita.

²⁰Bage uñale trate Chube nu geru gbaba kwian ulita alin kwian toidale mine Chube gwa giti, Moisés Chube gerua e degu unsuialin, ba chada e uñe trate, chada e gerule: “Ba onbre mo jwanba me mo chuge ke giti muinga na ole, ba muinga mo jwanba me mo chuge ke giti onbre na ole. Ba me daba na gweda. Ba me skwe boi daba ngeru. Ba me geru jinade ngwale daba na dollale. Ba mo ñenua mo chebia gai dage.” Moisés Chube gerua degu ene unsuialin kwian ulita alin, ba agedale ulita geru e kle degaba kare.

²¹Jesu gerudu ene onbre e ole gire onbre gerudu Jesu ole: —Cha kledubi soli gwangeabi cha jo juma gdate cha kle geru e gai dage age ulita geru e kle gbaba kare.

²²Jesu kwian keruchugu ene gire Jesu gerudu: —Noare ba kle age ene, agwa cha gerule ba ole, lle gdaite ba bebi age. Joga lle banu ulita chbade, igi ulita lle e ñanalla ba kete kwian me lle molenge. Ba age ene ulita gire ba chieni cha kle ngwadi ba mo ta gbe chage cha ole diali geru jwen chage. Gire ene ba be kle biale joge toi diali chui tangle Chube ole nga ngaña giti, Chube be age no ba alin ba agedu no ñanale.

²³Onbre Jesu keruchugu gerule ene, gire ama chegu ta olire tanre, onbre e lle molen tanre, malen ama me tadu lle ulita chbadakalin Jesu gerudu kare ama ole.

²⁴Jesu gwagedu onbre lle molen tanredi ta olire ole gire Jesu gerudu kwian geru jwannga ulita ole: —Ulia mnoare kwian lle molen tanre alin Chube gerua gai ulia mo ta gbe age ulita Chube takalin kare. Agwa kwian me age ene kwian me ñage toi diali chui tangle Chube ole nga ngaña giti.

²⁵Uñale bage bda kweri kada camello me ñage joge tangle agu kwebege, camello kweriare, ene kaire kwian lle molen tanre alin mnoare Chube gerua gai mo ta gbe age Chube takalin kare. Kwian ene kle mo ta dbe no no mo llea tanre ulita ole malen mnoare ama alin mo ta gbe mo llea chuge ngwadi Chube gerua gai ulia mo alin age Chube takalin kare, mnoare kwian ene alin mo ta dbe ma no Chube ole ama mo ta dbe no mo llea olege.

²⁶Kwian geru jwannga Jesu gerua keruchugu gire geru kadu Jesuge: —E ene ulia mnoare age Chube takalin kare ba kle gerule kare, gire ¿chema ñage age ulita Chube takalin kare, ene toi no diali chui tangle Chube ole nga ngaña giti?

²⁷Jesu gerudu: —Kwian agali gballa me ñage age ulita Chube takalin kare me ñage age mau alin agali toi diali chui tangle Chube ole. Agwa Chube alin allabi ñage kwian kira gbe age ulita Chube takalin kare ñage kwian gbe toi diali chui tangle ama ole. Chube alin allabi ñage age ulita, lle ulita me mno ama alin boadale.

²⁸Gire Pedro gerudu Jesu ole: —Cha ulita geru jwannga bage kle chage ba ole diali geru jwen bage, cha ulita mo llea ulita nga dba ai giti chugu ngwadi gire cha ulita mo ta gbu chage diali ba ole baini kaire ba kle joge ngwadi, cha ulita agedu ulita ba gerudu kare onbre lle molen tanre ole.

²⁹Jesu gerudu kwian geru jwannga ulita ole: —Cha gerule ulia ba ulita ole, kwian ulita bai kaire mo ta dbe ma no Chube ole kwian kle mo ta dbe no mo bitalla ulita olege mo llea ulita olege, kwian ene ta kle biale mo llea chuge ngwadi mo bitalla chuge ngwadi tañachuge ngeru Chube giti age ulita Chube takalin kare. Kwian u chuge ngwadi, kwian mo ñenua mo chebia chuge ngwadi, kwian mo daballa chuge ngwadi, kwian mo kirogwalla chuge ngwadi, kaire kwian mo ta gbe me mo jwen muinga ole, kwian bai mo ta gbe lle gweale o bitalla gweale chuge ngwadi ene Chube giti tañachuge ngeru Chube giti age Chube takalin kare,

³⁰kwian enege Chube be lle ma no ma ngle kwian e nu lle chugaba ngwadige kete amage nga dba ai giti, kaire bdagli kwian ene be toi no diali chui tangle Chube ole nga ngaña giti —Jesu gerudu ene kwian geru jwannga ulita ole.

³¹Jesu kwian geru jwannga amage gdataboko giti gdaboke kadu sugekare kwian ngleage gerule ama ole Jesu be boi giti ulita, Jesu gerudu: —Nege che be joge una Jerusalénge, Chube cha kagu nga dba ai giti kwian kare, una Jerusalénge cha be boi ulita kwian Chube gerua ketanga nu chada degaba unsuialin gerule kare.

³²Cha ketabe kwian me israelitage gwaleda, kwian e be age me no tanre cha ole, be cha gbe gidagda, be ka boi cha ole me no, be jolo tke chadi,

³³be cha bate tanre obere giska giti, be age ene ulita dagale cha ole gire bdagli ama be cha gweda. Cha gwabeda agwa chui mongikege cha be chkeni gwadeni.

³⁴Kwian geru jwannga ulita Jesu keruchugu gerule ene Jesu be boi giti una Jerusalénge, geru e me sugedu gbaite amage, geru chegu skwlenre amage, me uñale Jesu kle llema geruade ama ole, ama tañachugu me mi boi ene ulia Jesu gerudu kare.

³⁵Jesu kledu chage una Jerusalén ngnagu ule kwian geru jwannga amage ulita ole, gire Jesu jo chke kodi una Jericóge, kwian gdaite gwagwa me kle toiba dba jonke igi kade kwiange.

³⁶Kwian gwagwa me ologe sugedu kwian nglea kle chage amage kodi tangle, gire ama geru kadu kwian nage: —¿Mineade kwian nglea kle chage? ¿Kle boi mine?

³⁷Jaindrenga kwian gwagwa me kalen: —Jesu una Nazaremu kle chage tangle aini.

³⁸Kwian gwagwa me kwian na keruchugu Jesu kle joge tangle kodi amage gire ama ngautu Jesuge: —Jesu, ba kwian chugagwalla kweri unsuialin kada David oindalla, ba tai dage chage.

³⁹Kwian kle chage jonkare Jesu ngeru ama kwian gwagwa me keruchugu ngaute Jesuge, gire kwian ka bo jabale kwian gwagwa me ole ama ka chitedale, kwian ka bo ene ama ole ama me talladu ama me ka chitedu, ama mo ta gbu ngaute gwangerugu ma ngle: —Ba kwian chugagwalla kweri unsuialin David oindalla, ba tai dage chage.

⁴⁰Jesu kwian gwagwa me keruchugu gire Jesu me chagedu dare, Jesu chegu jagenga gdate jonke Jesu gerudu kwian na ole chie kwian gwagwa me dbe Jesudige. Kwian gwagwa me dbachku Jesudi gire Jesu geru kadu amage:

⁴¹—¿Ba takalin cha llema boi ba alin ba chudaboagda? Kwian gwagwa me jaindunga Jesu kalen: —Cha ba gai kweri, cha takalin ba cha gwagwa dodade ba cha gbe ten.

⁴²Jesu gerudu ama ole: —Nege ba be gwagwa molen, ba mo ta gbu ulia cha ole malen cha ba gwagwa dodade ulita, nege ba jo chkeni noni.