1Jesu e Tiri Mârozi maŋne fusucmarâ ecneme Jordaŋ opâ beherâ mâreŋ tuhuo rawec.
2Ira ŋafe ʒoaŋ 40 ju fofo ehuc juhame Sataŋzi esâickehuc juwec. Eme dameŋ ira nânâ tâmiric sasawa juku nânâre hâmowec.
3Ehame Sataŋzi ʒiŋuc âzâcnewec: “Go Anuture Ŋokâ jukomecko mutec qânâ ʒizi nânâ eoc me!”
4Mume Jesuzi ʒiŋuc âzâcnewec: “Aricne, dâŋqâreŋ kecʒiŋuc fokac: Ŋiczi nânâre sawa mi juhâmoocmu.”
5Eme Sataŋzi tiki ʒoricne mocko jowa ferâ mâreŋte faio ŋicne ŋicne ŋicwofuŋfâc‐jeŋichec jurambiŋ i beraŋnea jâutu‐fârewec.
6Ehuc ʒiŋuc âzâcnewec: “Tâpiri â ʒâŋe biŋe fojare rakac keci go gare‐fârepemu. I nore meo râekicnere e me e râcnezo murâ sâcne râcnepemu.
7Irec go maŋfuŋ‐naneo fodaperâ numu‐naretec gore efâreocmu.”
8Mume Jesuzi dâŋ ʒiŋuc bâtikiecnewec: “Dâŋqâreŋ kecʒiŋuc fokac: ‘Wofuŋ Anutuge dieŋzi herâ numucnezo â e mocjaha kiŋaŋ qacnezo.’”
9Eme Sataŋzi Jesu Jerusalem haeo taha ufuŋ bupu faio râerâ ʒiŋuc âzâcnewec: “Go Anuture Ŋokâ jukomecko ʒirec tara huc.
10Dâŋqâreŋ moc ʒiŋuc hâcne fokac: ‘E aŋelofâcne mejeŋicko râecgume ŋezicguniŋmu’,
11â moc ʒiŋuc ‘Jaŋe mefaio bahucgupie qânâzi kikege mi heocmu.’”
12Eme Jesuzi ʒiŋuc âzâcnewec: “Wofuŋ Anutu penaroŋ ecnehuc mi esâickezo.”
13Sataŋ e iŋuczi iŋuc eku esâicke tararâ beherâ dameŋ mocte woŋec juwec.
14Jesu e Mârozi neŋgoc ŋesiŋ ŋecnehame Galilaia mâreŋko risiewec. Risieme biŋe‐ticne hae sâc rafârewec.
15Eme ira mitificne ficne miti jazame muac baafec ecne‐fârembiŋ.
16Juraku sosoka hae‐ticne Nazarete ira iŋuc jaha fisirâ sabata hombaŋko mitificko fewec. E hombaŋ sâc iŋuc ejujec. Ferâ miti wose‐jareocte fahareme
17porofete Jesaja ere papia râcnembiŋ. Râcnepie qaratierâ dâŋ ʒiŋuc fowec i bâfuawec:
18“Wofuŋte Mârozi norao waharâ rua‐narehuc gie ʒiŋuc munarewec: Ŋic hujukicne Biŋebiaŋ jazazo, kâpâcwâru bacjopakicne firuec‐jopazo, ʒâŋe tiŋtuŋ ʒâŋe fifi bacjopazo, keke suec suec ejarekicne hefârec‐jopazo,
19â Wofuŋte dameŋ biaŋ maickekac irec biŋedâŋ muzo.”
20Dâŋ iŋuc woserâ papia bazurâ kiŋaŋŋic râcnerâ waha ŋewec. Ŋehame ŋic mitificko ŋembiŋ jaŋe mâmâc sasawa erao ʒâŋe fifârembiŋ.
21Eme dâŋ ʒiŋuc fuŋkerâ jazawec: “Mitidâŋ wosepe manaŋgopieŋ i miŋecgac fârine fuakac.”
22Mume jaŋe qâtâc herâ dâŋticne manapie aŋac ʒizine eme wareckerâ mumbiŋ: “Hâc, e Josefere ŋokâ i!”
23Eme eki ʒiŋuc jazawec: “Ŋoŋe nore dâŋ suŋsuŋne qahuc ʒiŋuc mecne mueŋgopieŋ: Dokta go fuŋnege bataniŋkec, Kafanaum haeo gie batec biŋene manaeŋgopeneŋ, ijaha ʒira mame sâko haegao batec honenaŋ me!”
24Iŋuc murâ muwec: “No jâmbomac ŋazape: Porofere moc e jahacne haefuŋko âgo sâcne mi ecneeŋgopieŋ.
25Erâ jâmbomac ŋazape: Elia juhame ʒoaŋ sâko jara jahec â moc â mosa 6 qakume roroc fuarâ mâreŋ sâckerâ fowec. Eme dameŋ ira Israe mâreŋko hozec bocjaha juipiehapie
26Anutuzi Elia Zarefati haeo Sidoŋ mâreŋko qâpuc hozec moc juwec erao soreme rawec.
27Erâ porofete Elisa juwec dameŋ ira Israe mâreŋko wic sanaŋheczi bocjaha jumbiŋ. Eme jaŋeraonec moczi mi fâsâehame Naemaŋ Siria mâreŋkonec e mocjahazi fâsâewec.”
28Iŋuc muhuc jazame mitificko ŋembiŋ jaŋe dâŋ i mana gâpârerâ
29faharerâ hae râpeo tuŋke hurâ hae‐jeŋic ŋewec tiki irec tapinao jowa ferâ hârâc mecko bararâ ira behepie huocte muhapie
30eki ŋondeŋ‐jeŋicko fosiroŋnerâ rawec.
31Eme raku Galilaia mâreŋko hae moc ʒâŋene Kafanaum ira fisirâ sabata hombaŋko miti jaza qazuc ewec.
32Eme e runezi miti muŋɋârâŋkehuc mume jaŋe manapie bu ââkecnehec ewec.
33Eme mitificko ŋic demoŋ repicnehec moc ŋewec. E Jesu honerâ kâcɋene owackehuc muwec:
34“Jei, Jesu Nazarete rune, go nâŋere jujuo wemocte warekomec? Go sipiric‐nâpocmurâ warekomec me? No ʒâŋitacgukopac, go Anuture Tiriŋic.”
35Iŋuc mume Jesuzi dâŋ mucnerâ muwec, “Go niniŋkerâ ŋickonec wefu rac.” Mume demoŋzi ŋic âtetuŋkeme ŋicŋondeŋko hurâ qaha wefu rawec. Ehuc ŋic e ine qa qâpuriŋ mi ecnewec.
36Eme jaŋe bipic‐jeŋic tarame nazaŋ gazaŋ erâ mumbiŋ: “Hâc, dâŋ keci weniŋucne? E tâpiri sâkoheczi demoŋ dâŋ jazame wefurâ wiseeŋgopieŋ!”
37Eme biŋe‐ticne hae rârec rârec rafârewec.
38Jesu e mitifickonec waharâ Simoŋte ficko fewec. Ira Simoŋ safeŋ‐ticne huc ʒocnehec bame fowec. Eme ere erâ Jesu âzâcnembiŋ.
39Eme eki fowecko raʒirâ erao daperâ huc dâŋ mucneme behewec. Eme ŋokac e biac faherâ nânâ rike gumec ejarewec.
40Ʒoaŋ ŋetarame ŋic jaŋe âgofâc‐jeŋic huc ʒâichec Jesurao bacjopa warepie qizec‐jeŋicko meticne râerâ huc ʒâic bâniniŋke‐jarewec.
41Erâ demoŋ jâpe‐jareme ŋicmaŋkonec wefurâ owa kâcɋene ehuc ʒiŋuc mumbiŋ: “Go Anuture Ŋokâ.” Jaŋe fuŋne‐ticne ʒiŋuc manambiŋ, e Kristo. Eme i mujaŋgeŋkenʒipiŋte mu hezuc ejarewec.
42Hae fureme fickonec waharâ mâreŋ râricne mocko ra juwec. Eme ŋic jaŋe basaku bâfuarâ jaŋehec juocte sakarezo mupie
43ʒiŋuc jazawec: “No hae sâc ŋic Anuture uucmaŋ irec Biŋebiaŋ jazazepac, no gie irec hâcne sorecnukicne.”
44Iŋuc murâ Judaŋic jaŋere mitific ŋerawec sâc jufârehuc miti jaza rahuc jujujec.
