Luka 18:14-42

¹⁴Iau tatike ta vavat: Go ra tutana i talil ra kubana, a tena takodo, ma ta ra tikai pata; tago nina i vangala pa mule, da vaikilik pa ia; ma nina i vaikilik pa mule, da vangala pa ia.

¹⁵Ma dia kap ra umana kuramana tadav ia, upi na bili diat; ba kana tarai na vartovo dia gire, dia tigal diat.

¹⁶Ma Iesu i oro pa diat pirana, ma i biti: Avat a nur vue ra umana bul ikilik upi diat a tadav iau, ma koko avat a tigal diat, tago kadiat dia dari ra varkurai kai God.

¹⁷A dovot go iau tatike ta vavat: Nina ba pa i kapupi ra varkurai kai God da ra bul ikilik, pa na olo muka tana.

¹⁸Tika na tena varkurai i tir ia: Bo na Tena Vartovo, ava ina pait ia upi kaugu ra nilaun tukum?

¹⁹Iesu i tatike tana: Dave u vatang iau ba iau boina? Pa ta i boina, ia kaka God.

²⁰U nunure ra lavur vartuluai: Koko una po, Koko una vardodoko, Koko una long, Koko una varvai vavaongo, Una ru tamam ma nam.

²¹Ma i biti: Go parika iau tar toratorom tana papa amana ba iau ga bul.

²²Ba Iesu i valongore, i biti tana: A kopono magit boko u iba upi ia; una ivure kaum vurvur magit parika, ma una tibe ra lavur luveana me, ma kaum boko ra bo na vuvuvung ra bala na bakut; ma una mai, una mur iau.

²³Ba i valongore go ra tinata i tabun muka ra balana tana, tago i manga uviana.

²⁴Ba Iesu i gire, i biti: I papait na dekdek muka upi ta tika na uviana na olo ta ra varkurai kai God!

²⁵Tago a niolo kai ra uviana ta ra varkurai kai God i manga dekdek ta dir ma ra nidolo kai ra kamel ta ra matana ingingit.

²⁶Ma diat dia valongore dia tatike: Ari ona damana, ia da valaun ia?

²⁷Ma i biti: A magit i dekdek pire ra tarai, God i pait valar pa ia.

²⁸Ma Petero i biti: Ave ga vana kan kaveve vurvur magit ma ave murmur u.

²⁹Ma i biti ta diat: A dovot go iau tatike ta vavat: Pa ta i ga vana kan ra pal, ba kan kana vavina ba ra umana turana, ba nana, ba tamana, ba ra umana natuna, ure ra varkurai kai God,

³⁰ba pa na vatur vake ra mangoro iat ta go ra nilaun ma namur ra nilaun tukum.

³¹Ma i agure vaire pa ra vinun ma a ivut, ma i biti ta diat: Go da vana urama Ierusalem, ma da pait nina ra lavur magit par ra umana propet dia ga tumu ia ure Natu i ra tutana.

³²Tago da tul tar ia tai ra lavur Tematana, ma da kulume, ma da vakaina muka, ma da nami ia;

³³diat a virit ia, ma diat a doka; ma ta ra vautuluna bung na laun mulai.

³⁴Ma pa dia matoto ta go ra magit; ma di ive go ra tinata kan diat, ma pa dia nukure ra kukurai ra lavur magit di ga tatike.

³⁵Ba i maravai Ieriko, tika na pula i ki ra papar a nga, i lulul;

³⁶ba i valongore ra kor dia vanavana, i titir ba ava go.

³⁷Ma dia ve ba Iesu ra te Nasaret i vanavana pakit.

³⁸Ma i oraoro dari: Iesu, u natu i David, una mari iau.

³⁹Ma diat dia lualua, dia tigal ia ba na ki mut uka; ma i manga oraoro ka dari: U natu i David, una mari iau.

⁴⁰Ma Iesu i tur, ma i vartuluai ba da ben ia pirana; ma ba i vana maravai pirana, i tir ia:

⁴¹Ava u mainge ba ina pait ia tam? Ma i tatike: Luluai, ba ina nana mulai.

⁴²Ma Iesu i biti tana: Una nana muka, kaum nurnur i tar valaun u.