Lucas 18:14-42

¹⁴“Ani Jesús, an bega sogmar, ar we-dule bur gwage nugus-naddo, Fariseoba. Ar ade dule-wargwen na nug dummarba na saele, a-dule bur nug-bipii guoed. Ar dule na nug bipii na saerdi, adi a-dule bur nug odummolegoed.”

¹⁵Degine, Jesússe mimmigan-sedani-gusmalad, Jesús ega ebugegar, adi Bab Dummad nued mimmigangi binsaegar. Jesús-sapingan deyob dakarmargu, dulemar-mimmigan-senonimaladse uluarmalad.

¹⁶Ar Jesús na e-sapinganse gochagu, ega sogded: —Mer ese urwemar. Mimmigan anse daged be imakmar, mer be bargamar, ar Bab-Dummad-neg-dakmaid we-mimmiganyob damaladgadid.

¹⁷Napira an bemarga sogmalad, ar dule-wargwen Bab-Dummad-neg-dakmaid mimmiganyob abingasulile, geg Bab-Dummad-neg-dakmaidse doged.

¹⁸Dule-wargwen nue-nug-nikagwad Jesússe egisnonikid: —Odurdaked-saila-nued, ¿ibi an imaker-gebe, burba-geg-bergued an abingaegar?

¹⁹Jesús, abin-sogded: —¿Ibiga dule-nuedye be anga soge? Dule-nued sulid, unnila Bab Dummadbi wargwennaa dule-nued gued.

²⁰Ar Bab-Dummad-igar-mesisad be wisid: Mer sui-dikarba, degi, ome-dikarba yolemalo, mer dule-oburgwemalo, mer atursamalo, mer gakansaar aimargi sunmakmalo, be-babgi, degi, be-nangi, nue-binsaed-nikaa damalo.

²¹Dule, abin-sogded: —Gusgu an sapingwagwad-akar bela we-igarmar-mamaidba an nanadiid.

²²Jesús, weyob dule-ega-soge itosgu, ega sogded: —Ibmar-gwensak amba be napi. Bela ibmar-be-nikad manigi be uknae, geb agi mani wileganaga be mimmioed. Geb degiir be nibneggi ibmar-nued be nikuoed. Geb a-sorba anba be dagoed, an-sapinga guegar.

²³Dule, weyob Jesús-ega-soge itosgu, nue-bukib-binsaded, ar ade dule nue-mani-ibedid.

²⁴Jesús, dule-nue-bukib-binsa-ito daksagu, sogded: —¡Ibiyobi dulemar-mani-ibganga Bab-Dummad-neg-dakmaidse-doged-igar dutusuli, ar ade dogdar maniginbi binsamalad!

²⁵Ar ade moli-yargan-mureged bur-baisursunna iko-ibyagi doged, ar dule-mani-ibeddi bur-beedse Bab-Dummad-neg-dakmaidse doged.

²⁶Ar dulemar weyob Jesús-ibmar-soge-itosmalad, sogdemar: —¿Ar doa degite sunna abonolegosunna? Deyob sogsamardo, ar ade binsamalad, mani-ibgan baisursunnaa bur abonolegoye.

²⁷Jesús, dulemar-abin sogded: —Ar dulemargardi ibmar-geg-guedi, Bab Dummadgardi bela ibmar sunna guedbiid.

²⁸Geb degi Pedro, Jesúsga sogded: —¿Anmardina? Emide wegi anmar na-ibmar-nikamalad bela an na obesmalad, adi anmar beba naegar.

²⁹Geb degi Jesús, abin-sogded: —Napira an bemarga soged, ar dule-wargwensaar Bab-Dummad-neg-dakmaid-ular na e-neg, e-babgan, e-gwenadgan, e-ome, e-mimmigan, obesale,

³⁰bur-bule, we-napneggi ibmar-abingaosurdeeye soglesulid, degine, burba-geg-bergued yoedse amba-deyob abingabaloed.

³¹Jesús na e-sapingan-warambe-gakabogwad bachikii sesgua, ega sogded: “Anmar Jerusalénse nadapid, Bab-Dummad-gaya-burba-berbemalad bela angi Dule-Machigi narmaksadba igargan anga guedsegad.

³²“Ani Dule-Machi, Judiosurmaladse uklegoed, amar angi dodomaloed, istar angi sunmakmaloed, degi, angi wiakmarbaloed.

³³Ar sabsur an-bibyosmalad-sorba, an-oburgwemaloed. Geb ibapaagwadgi gannar an durguoed.”

³⁴Ar Jesús-e-sapingan-ambe-gakabogwad aku itosmalad, ar ade amba egi odukuar we-gaya-burba maid, degisoggu, aku-ito gusmarsundo.

³⁵Ibagwengine, Jesús Jericó-neggweburse warmaknadapgua, deunni dule-ibya-sulidi, igar-naba sii, mani egissii-gusad.

³⁶Dule-aku-ataked dulemar-bukidar duurmaknadap itoargu, amarse egichided: —¿Igi neg-gunai?

³⁷Ega sogdemalad: —Jesús-Nazaretgined nadapye.

³⁸Geb degi dule-aku-ataked binnasur gote, sogded: —¡Jesús, Rey-David-wagwa, wile be an-dake!

³⁹Dulemar-Jesús-iduar-nadapmalad dule-aku-atakedse uludmalad, adi mer binnasur golegar. Ar dule-aku-ataked aka-bur-bule binnasur gorsigisad: —¡Rey-David-wagwa, wile be an-dake!

⁴⁰Geb degi Jesús gwisgusgua, dule-aku-ataked ese sedaged imaksad. Dule-aku-ataked ese nonigu, Jesús ese egichialid,

⁴¹ega sogded: —¿Ibu bega imakbi be an-abege? Dule-aku-ataked, Jesús-abin-sogded: —Dummad, mag-atak be an-imake.

⁴²Jesús ega sogded: —Be-ibya nugusun. Be an-bengussursoggu, be nugussun.